1.10

षष्ट्योदनं यवान्नं च गोधूमं मुद्गयूषकम्

ṣaṣṭyodanaṃ yavānnaṃ ca godhūmaṃ mudgayūṣakam

1.10.2

जाङ्गलं भक्षयेन् मांसं केवलं क्षीरम् एव वा

jāṅgalaṃ bhakṣayen māṃsaṃ kevalaṃ kṣīram eva vā

1.11

बलान्नं वाथ भुञ्जीत शाकलोणविवर्जितम्

balānnaṃ vātha bhuñjīta śākaloṇavivarjitam

1.11.2

अभ्यङ्गं मस्तुना कुर्यात् स्नानं चैव सुखाम्बुना

abhyaṅgaṃ mastunā kuryāt snānaṃ caiva sukhāmbunā

1.12

काकिनीं स्त्रीं भजेन् नित्यं स्वानुकूलां सुयौवनाम्

kākinīṃ strīṃ bhajen nityaṃ svānukūlāṃ suyauvanām

1.12.2

रसेन्द्रे भक्ष्यमाणे तु कामान्धो जायते नरः

rasendre bhakṣyamāṇe tu kāmāndho jāyate naraḥ

1.13

मैथुनेन विना तस्य ह्य् अजीर्णो जायते रसः

maithunena vinā tasya hy ajīrṇo jāyate rasaḥ

1.13.2

अजीर्णे कम्पदाहार्ती हिक्का मूर्छा ज्वरो ऽरतिः

ajīrṇe kampadāhārtī hikkā mūrchā jvaro 'ratiḥ

1.14

कासश्वासारुचिच्छर्दिभ्रममोहा भवन्ति हि

kāsaśvāsārucicchardibhramamohā bhavanti hi

1.14.2

सेवेत सुभगां तस्माद् दुर्भगां परिवर्जयेत्

seveta subhagāṃ tasmād durbhagāṃ parivarjayet

1.15

अभ्यङ्गं कटुतैलेन काञ्जिकं मदिरां दधि

abhyaṅgaṃ kaṭutailena kāñjikaṃ madirāṃ dadhi

1.15.2

कलिङ्गकारवल्ल्यम्लतैलकूष्माण्डराजिकाः

kaliṅgakāravallyamlatailakūṣmāṇḍarājikāḥ

1.16

बिल्वछत्राकवार्ताकविदलं काकमाचिकाम्

bilvachatrākavārtākavidalaṃ kākamācikām

1.16.2

मूलकं लशुनं तीक्ष्णं शीतम् उष्णं च वर्जयेत्

mūlakaṃ laśunaṃ tīkṣṇaṃ śītam uṣṇaṃ ca varjayet

1.17

रात्रौ जागरणं त्याज्यं दिवास्वापं च मैथुनम्

rātrau jāgaraṇaṃ tyājyaṃ divāsvāpaṃ ca maithunam

1.17.2

कलहोद्वेगचिन्ताश् च शोकं चैव विवर्जयेत्

kalahodvegacintāś ca śokaṃ caiva vivarjayet

1.18

आवर्जनाद् भवेच्छूलं निद्रालस्यं ज्वरो ऽरतिः

āvarjanād bhavecchūlaṃ nidrālasyaṃ jvaro 'ratiḥ

1.18.2

त्र्यहं पिबेत् तत्प्रशान्त्यै वारिणा कर्कटीफलम्

tryahaṃ pibet tatpraśāntyai vāriṇā karkaṭīphalam

1.19

शुण्ठीसैन्धवचूर्णं वा मातुलुङ्गाम्लकैर् लिहेत्

śuṇṭhīsaindhavacūrṇaṃ vā mātuluṅgāmlakair lihet

1.19.2

सौवर्चलं गवां मूत्रैः पिबेद् वा तत्प्रशान्तये

sauvarcalaṃ gavāṃ mūtraiḥ pibed vā tatpraśāntaye

Rasaratnākara