9.25.2

द्रवैः कुरण्टपत्रोत्थैः लौहचूर्णं विमर्दयेत्

dravaiḥ kuraṇṭapatrotthaiḥ lauhacūrṇaṃ vimardayet

9.26

दिनैकमातपे तीव्रे द्रवैर्मर्द्यं त्रिकण्टकैः

dinaikamātape tīvre dravairmardyaṃ trikaṇṭakaiḥ

9.26.2

वन्ध्याभृङ्गीपुनर्नवयोर् गोमूत्रैश्च दिनं पुनः

vandhyābhṛṅgīpunarnavayor gomūtraiśca dinaṃ punaḥ

9.27

गोमूत्रैस्त्रिफला क्वाथ्या तत्कषायेण भावयेत्

gomūtraistriphalā kvāthyā tatkaṣāyeṇa bhāvayet

9.27.2

त्रिसप्ताहं प्रयत्नेन दिनैकं मर्दयेत् ततः

trisaptāhaṃ prayatnena dinaikaṃ mardayet tataḥ

9.28

रुद्ध्वा गजपुटे पञ्चादिं क्वाथेन मर्दयेत्

ruddhvā gajapuṭe pañcādiṃ kvāthena mardayet

9.28.2

दिवा मर्द्यं पुटं रात्रावेकविंशतिदिनानि वै

divā mardyaṃ puṭaṃ rātrāvekaviṃśatidināni vai

9.29

एकविंशद्दिनेनैव म्रियते त्रिविधं ह्ययः

ekaviṃśaddinenaiva mriyate trividhaṃ hyayaḥ

9.29.2

माक्षिकं च शिला ह्यम्लैर् हरिद्रा मरिचानि च

mākṣikaṃ ca śilā hyamlair haridrā maricāni ca

9.30

पिष्ट्वा मर्द्यं लोहपत्रं तप्तं तप्तं निषेचयेत्

piṣṭvā mardyaṃ lohapatraṃ taptaṃ taptaṃ niṣecayet

9.30.2

सप्तधा त्रिफलाक्वाथे जलेन क्षालयेत्पुनः

saptadhā triphalākvāthe jalena kṣālayetpunaḥ

9.31

कुट्टयेल्लोहदण्डेन पेषयेत्त्रिफलाजलैः

kuṭṭayellohadaṇḍena peṣayettriphalājalaiḥ

9.31.2

षोडशांशेन लोहस्य दातव्यं माक्षिकं शिला

ṣoḍaśāṃśena lohasya dātavyaṃ mākṣikaṃ śilā

9.32

अम्लेन लोडितं रुद्ध्वा गजान्धकपुटे पचेत्

amlena loḍitaṃ ruddhvā gajāndhakapuṭe pacet

9.32.2

निरुत्थं जायते भस्म कान्तं तीक्ष्णादिमुण्डकम्

nirutthaṃ jāyate bhasma kāntaṃ tīkṣṇādimuṇḍakam

9.33

तिन्दूफलस्य मज्जाभिर्लिप्त्वा स्थाप्यातपे खरे

tindūphalasya majjābhirliptvā sthāpyātape khare

9.33.2

धारयेत् कांस्यपात्रस्थं दिनैकेन पुटत्यलम्

dhārayet kāṃsyapātrasthaṃ dinaikena puṭatyalam

9.34

लेप्यं पुनः पुनः कुर्यात् दिनान्तान्तं प्रलेपयेत्

lepyaṃ punaḥ punaḥ kuryāt dināntāntaṃ pralepayet

9.34.2

त्रिफलाक्वाथसंयुक्तं दिनैकेन मृतं भवेत्

triphalākvāthasaṃyuktaṃ dinaikena mṛtaṃ bhavet

9.35

स्थाल्यां वा लोहपात्रे वा लौहदर्व्या विलोडयेत्

sthālyāṃ vā lohapātre vā lauhadarvyā viloḍayet

Rasaratnākara