19.1.2

रत्नादीनां विशेषात् करणमिह शुभं गंधवादं समग्रं ज्ञात्वा तत्तत् सुसिद्धं ह्यनुभवपथगं पावनं पण्डितानाम्

ratnādīnāṃ viśeṣāt karaṇamiha śubhaṃ gaṃdhavādaṃ samagraṃ jñātvā tattat susiddhaṃ hyanubhavapathagaṃ pāvanaṃ paṇḍitānām

19.2

चतुर्गुणेन तोयेन लाक्षां पिष्ट्वा तु तद्द्रवैः

caturguṇena toyena lākṣāṃ piṣṭvā tu taddravaiḥ

19.2.2

वस्त्रपूतं शतपलं गृह्य मृद्भाण्डगं पचेत्

vastrapūtaṃ śatapalaṃ gṛhya mṛdbhāṇḍagaṃ pacet

19.3

मृद्वग्निना पादशेषं जातं यावच्च तस्य वै

mṛdvagninā pādaśeṣaṃ jātaṃ yāvacca tasya vai

19.3.2

क्षिपेत्पलं पलं चूर्णं सर्जिटंकणलोध्रकम्

kṣipetpalaṃ palaṃ cūrṇaṃ sarjiṭaṃkaṇalodhrakam

19.4

किंचित्पच्यात्ततः शीतं काचकूप्यां सुरक्षयेत्

kiṃcitpacyāttataḥ śītaṃ kācakūpyāṃ surakṣayet

19.4.2

स्थूलमत्स्यत्वचं पच्याद्दिवारात्रं जलेन तत्

sthūlamatsyatvacaṃ pacyāddivārātraṃ jalena tat

19.5

घनीभूतं समुत्तार्य ख्यातोऽयं मत्स्यकज्जलम्

ghanībhūtaṃ samuttārya khyāto'yaṃ matsyakajjalam

19.5.2

एतत्कर्षद्वयं तस्याः काचकूप्यां विनिक्षिपेत्

etatkarṣadvayaṃ tasyāḥ kācakūpyāṃ vinikṣipet

19.6

वर्षोपलास्तु तेनैव लालयित्वा सुपाचिते

varṣopalāstu tenaiva lālayitvā supācite

19.6.2

मधूकतैलमध्ये तु क्षणं पक्त्वा समुद्धरेत्

madhūkatailamadhye tu kṣaṇaṃ paktvā samuddharet

19.6.3

जायन्ते पद्मरागाणि दिव्यतेजोमयानि च

jāyante padmarāgāṇi divyatejomayāni ca

19.7

नीलीचूर्णं पलैकं तु पूर्वकूप्यां तु तद्द्रवम्

nīlīcūrṇaṃ palaikaṃ tu pūrvakūpyāṃ tu taddravam

19.7.2

तद्द्रवं द्विपलं चूर्णे क्षिप्त्वा सर्वं विलोलयेत्

taddravaṃ dvipalaṃ cūrṇe kṣiptvā sarvaṃ vilolayet

19.8

क्षिप्त्वा वर्षोत्पलांस्तेन पूर्वतैलगतान्पचेत्

kṣiptvā varṣotpalāṃstena pūrvatailagatānpacet

19.8.2

इन्द्रनीलानि तान्येव जायन्ते नात्र संशयः

indranīlāni tānyeva jāyante nātra saṃśayaḥ

19.9

मञ्जिष्ठां तालकं नीली समचूर्णं प्रकल्पयेत्

mañjiṣṭhāṃ tālakaṃ nīlī samacūrṇaṃ prakalpayet

19.9.2

काचकूप्यां स्थितैर्द्रावैः सर्वमेतत् सुलोलयेत्

kācakūpyāṃ sthitairdrāvaiḥ sarvametat sulolayet

19.10

वर्षोत्पलांस्तु तेनैव सिक्त्वा पच्याच्च पूर्ववत्

varṣotpalāṃstu tenaiva siktvā pacyācca pūrvavat

19.10.2

सर्वे मरकतास्तेन समीचीना भवन्ति वै

sarve marakatāstena samīcīnā bhavanti vai

Rasaratnākara