3.59

एरण्डवृक्षमध्ये तु तत्फले वा क्षिपेत्पविम्

eraṇḍavṛkṣamadhye tu tatphale vā kṣipetpavim

3.59.2

मासमात्रात्समुद्धृत्य जानुमध्ये तु पूर्ववत्

māsamātrātsamuddhṛtya jānumadhye tu pūrvavat

3.60

कोमलं जायते वज्रं दिनान्ते नात्र संशयः

komalaṃ jāyate vajraṃ dinānte nātra saṃśayaḥ

3.60.2

वज्रं तित्तिरमांसेन वेष्टयेन्निक्षिपेन्मुखे

vajraṃ tittiramāṃsena veṣṭayennikṣipenmukhe

3.61

अतिस्थूलस्य भेकस्य मुखं सूत्रेण वेष्टयेत्

atisthūlasya bhekasya mukhaṃ sūtreṇa veṣṭayet

3.61.2

निखनेद्धस्तमात्रायां भूमौ मासात्समुद्धरेत्

nikhaneddhastamātrāyāṃ bhūmau māsātsamuddharet

3.62

मण्डूकसंपुटे रुद्ध्वा सम्यग्गजपुटे पचेत्

maṇḍūkasaṃpuṭe ruddhvā samyaggajapuṭe pacet

3.62.2

तद्वज्रं पूर्वगोलस्थं जानुमध्ये गतं दिनम्

tadvajraṃ pūrvagolasthaṃ jānumadhye gataṃ dinam

3.63

भवेद्वज्रौदनं साक्षान्मार्यं पश्चाच्च योजयेत्

bhavedvajraudanaṃ sākṣānmāryaṃ paścācca yojayet

3.63.2

सर्ववज्रौदनानां तु मारणं पूर्ववद्भवेत्

sarvavajraudanānāṃ tu māraṇaṃ pūrvavadbhavet

3.64

त्रिक्षारैः पञ्चलवणैर् वसामूत्राम्लकोद्रवैः

trikṣāraiḥ pañcalavaṇair vasāmūtrāmlakodravaiḥ

3.64.2

मत्स्यपित्तैस्तैलघृतैः कुलत्थैः काञ्जिकान्वितैः

matsyapittaistailaghṛtaiḥ kulatthaiḥ kāñjikānvitaiḥ

3.65

सप्ताहं दोलकायन्त्रे व्याघ्रीकन्दगतं पचेत्

saptāhaṃ dolakāyantre vyāghrīkandagataṃ pacet

3.65.2

सप्तवर्णं तु वैक्रान्तं शुद्धिमायाति निश्चितम्

saptavarṇaṃ tu vaikrāntaṃ śuddhimāyāti niścitam

3.66

जम्बीराणां द्रवे मग्नमातपे धारयेद्दिनम्

jambīrāṇāṃ drave magnamātape dhārayeddinam

3.66.2

शुध्यन्ति टङ्कणं शंखो वराटाञ्जनगैरिकम्

śudhyanti ṭaṅkaṇaṃ śaṃkho varāṭāñjanagairikam

3.66.3

कासीसं भूखगं चैव शुद्धं योगेषु योजयेत्

kāsīsaṃ bhūkhagaṃ caiva śuddhaṃ yogeṣu yojayet

3.67

यामैकं गन्धकं मर्द्यं द्रवैर् निम्बाजगन्धयोः

yāmaikaṃ gandhakaṃ mardyaṃ dravair nimbājagandhayoḥ

3.67.2

शृङ्गीधत्तूरयोर्वाथ तिलपर्ण्याश्च वा द्रवैः

śṛṅgīdhattūrayorvātha tilaparṇyāśca vā dravaiḥ

3.67.3

तदादाय घृतैस्तुल्यं लोहपात्रे क्षणं पचेत्

tadādāya ghṛtaistulyaṃ lohapātre kṣaṇaṃ pacet

Rasaratnākara