3.39.2

नृतैले गन्धतैले वा म्रियते नात्र संशयः

nṛtaile gandhataile vā mriyate nātra saṃśayaḥ

3.40

भूनागं गन्धकं वाथ नारीस्तन्येन पेषयेत्

bhūnāgaṃ gandhakaṃ vātha nārīstanyena peṣayet

3.40.2

तद्गोलस्य पचेद्वज्रं पूर्वतैले मृतं भवेत्

tadgolasya pacedvajraṃ pūrvataile mṛtaṃ bhavet

3.41

स्नुहीक्षीरेण विमलां पिष्ट्वा तद्गोलके क्षिपेत्

snuhīkṣīreṇa vimalāṃ piṣṭvā tadgolake kṣipet

3.41.2

वज्रं निरुध्य मूषां तां शुष्कां तीव्राग्निना धमेत्

vajraṃ nirudhya mūṣāṃ tāṃ śuṣkāṃ tīvrāgninā dhamet

3.42

तप्तमश्वस्य मूत्रे तु क्षिप्त्वा वज्रं समाहरेत्

taptamaśvasya mūtre tu kṣiptvā vajraṃ samāharet

3.42.2

इत्येवं सप्तधा कार्यं ततस्तालकमत्कुणाः

ityevaṃ saptadhā kāryaṃ tatastālakamatkuṇāḥ

3.43

कृत्वा गोलं क्षिपेत्तस्मिन्वज्रमूषां निरुध्य च

kṛtvā golaṃ kṣipettasminvajramūṣāṃ nirudhya ca

3.43.2

धामितं पूर्ववत्सेच्यं सप्तवारैर्मृतं भवेत्

dhāmitaṃ pūrvavatsecyaṃ saptavārairmṛtaṃ bhavet

3.44

वज्रं मत्कुणरक्तेषु क्षिप्त्वा लिप्त्वातपे क्षिपेत्

vajraṃ matkuṇarakteṣu kṣiptvā liptvātape kṣipet

3.44.2

शुष्कं लेप्यं पुनः शोष्यं यावत् सप्तदिनावधि

śuṣkaṃ lepyaṃ punaḥ śoṣyaṃ yāvat saptadināvadhi

3.45

विष्णुक्रान्तापेटकार्योर् द्रवैः सिञ्चेत् पुनः पुनः

viṣṇukrāntāpeṭakāryor dravaiḥ siñcet punaḥ punaḥ

3.45.2

तप्तं तप्तं तु तद्वज्रं शतवारान्मृतं भवेत्

taptaṃ taptaṃ tu tadvajraṃ śatavārānmṛtaṃ bhavet

3.46

गन्धकं चूर्णितं भाव्यं स्त्रीपुष्पेण तु सप्तधा

gandhakaṃ cūrṇitaṃ bhāvyaṃ strīpuṣpeṇa tu saptadhā

3.46.2

पुनः स्त्रीरजसालोड्य तस्मिन्वज्रं सुतापितम्

punaḥ strīrajasāloḍya tasminvajraṃ sutāpitam

3.47

सेचयेत्तापयेदेवं मृतं स्यात्तु त्रिसप्तधा

secayettāpayedevaṃ mṛtaṃ syāttu trisaptadhā

3.47.2

मातुलुङ्गगतं वज्रं रुद्ध्वा बाह्ये मृदा लिपेत्

mātuluṅgagataṃ vajraṃ ruddhvā bāhye mṛdā lipet

3.47.3

पचेत् पुटे समुद्धृत्य तद्वच्छतपुटैः पचेत्

pacet puṭe samuddhṛtya tadvacchatapuṭaiḥ pacet

3.48

नागवल्ल्या द्रवैर् लिप्तं तत्पत्रेणैव वेष्टितम्

nāgavallyā dravair liptaṃ tatpatreṇaiva veṣṭitam

3.48.2

जानुमध्यस्थितं यामं तद्वज्रं मृदुतां व्रजेत्

jānumadhyasthitaṃ yāmaṃ tadvajraṃ mṛdutāṃ vrajet

Rasaratnākara