4.11.2

गोमूत्रान्तः कृतं यामं नरमूत्रैर्दिनत्रयम्

gomūtrāntaḥ kṛtaṃ yāmaṃ naramūtrairdinatrayam

4.12

शोषयेच्च पुनर्वस्त्रे बद्ध्वावेष्ट्य सदा दृढम्

śoṣayecca punarvastre baddhvāveṣṭya sadā dṛḍham

4.12.2

शुष्कं निरुध्य मूषायां ततस्तुषाग्निना पचेत्

śuṣkaṃ nirudhya mūṣāyāṃ tatastuṣāgninā pacet

4.13

ऊर्ध्वभागमधः कृत्वा अधोभागं च ऊर्ध्वगम्

ūrdhvabhāgamadhaḥ kṛtvā adhobhāgaṃ ca ūrdhvagam

4.13.2

इत्यादिपरिवर्तेन स्वेदयेद्दिवसत्रयम्

ityādiparivartena svedayeddivasatrayam

4.14

पश्चाद् उद्धृत्य तं सूतं योगवाहं रुजापहम्

paścād uddhṛtya taṃ sūtaṃ yogavāhaṃ rujāpaham

4.15

सद्योजातस्य बालस्य विष्ठां पालाशबीजकम्

sadyojātasya bālasya viṣṭhāṃ pālāśabījakam

4.15.2

चाण्डाली रुधिरं सूतं सूतपादं च टङ्कणम्

cāṇḍālī rudhiraṃ sūtaṃ sūtapādaṃ ca ṭaṅkaṇam

4.16

जयन्त्या मर्दयेद् द्रावैर् दिनैकं तत्तु गोलकम्

jayantyā mardayed drāvair dinaikaṃ tattu golakam

4.16.2

पेषयेत्सहदेव्याथ लेपयेत् ताम्रसंपुटम्

peṣayetsahadevyātha lepayet tāmrasaṃpuṭam

4.17

तन्मध्ये गोलकं क्षिप्त्वा द्वियामं स्वेदयेल्लघु

tanmadhye golakaṃ kṣiptvā dviyāmaṃ svedayellaghu

4.17.2

वालुकायन्त्रमध्ये तु समुद्धृत्य ततः पुनः

vālukāyantramadhye tu samuddhṛtya tataḥ punaḥ

4.18

चित्रकैः सहदेव्या च गन्धकैर् लेपयेद् बहिः

citrakaiḥ sahadevyā ca gandhakair lepayed bahiḥ

4.18.2

सम्पुटं बन्धयेद्वस्त्रे मृदालेप्य च शोषयेत्

sampuṭaṃ bandhayedvastre mṛdālepya ca śoṣayet

4.19

तं रुद्ध्वान्धमूषायां ध्माते सम्पुटमाहरेत्

taṃ ruddhvāndhamūṣāyāṃ dhmāte sampuṭamāharet

4.19.2

सूक्ष्मचूर्णं हरेद्रोगान् योगवाहो महारसः

sūkṣmacūrṇaṃ haredrogān yogavāho mahārasaḥ

4.20

सम्पुटं सूततुल्यं स्याच्छास्त्रदृष्टेन कर्मणा

sampuṭaṃ sūtatulyaṃ syācchāstradṛṣṭena karmaṇā

4.21

धत्तूरकद्रवैर् मर्द्यं दिनं गन्धं ससूतकम्

dhattūrakadravair mardyaṃ dinaṃ gandhaṃ sasūtakam

4.21.2

अन्धमूषे दिनं स्वेद्यं भूधरे मूर्छितो भवेत्

andhamūṣe dinaṃ svedyaṃ bhūdhare mūrchito bhavet

4.22

कृत्वा षडङ्गुलां मूषां सुपक्वां मृन्मयीं दृढाम्

kṛtvā ṣaḍaṅgulāṃ mūṣāṃ supakvāṃ mṛnmayīṃ dṛḍhām

Rasaratnākara