6.7

शुद्धसूतं समं गन्धं रक्तोत्पलदलद्रवैः

śuddhasūtaṃ samaṃ gandhaṃ raktotpaladaladravaiḥ

6.7.2

यामं मर्द्यं पुनर्गन्धं सार्धं तत्र विनिक्षिपेत्

yāmaṃ mardyaṃ punargandhaṃ sārdhaṃ tatra vinikṣipet

6.8

पूर्वद्रावैर्दिनं मर्द्यं रसार्धं गन्धकं पुनः

pūrvadrāvairdinaṃ mardyaṃ rasārdhaṃ gandhakaṃ punaḥ

6.8.2

दत्त्वा तद्वद्दिनं मर्द्यं काचकूप्यां निरोधयेत्

dattvā tadvaddinaṃ mardyaṃ kācakūpyāṃ nirodhayet

6.9

दिनैकं वालुकायन्त्रे पक्वमुद्धृत्य चूर्णयेत्

dinaikaṃ vālukāyantre pakvamuddhṛtya cūrṇayet

6.9.2

भूकुष्माण्डीकषायेण भावयेद्दिनसप्तकम्

bhūkuṣmāṇḍīkaṣāyeṇa bhāvayeddinasaptakam

6.10

छायायां तत्सितातुल्यं निष्कैकं भक्षयेत्सदा

chāyāyāṃ tatsitātulyaṃ niṣkaikaṃ bhakṣayetsadā

6.10.2

शणमूलं सबीजं च मुसली शर्करा समम्

śaṇamūlaṃ sabījaṃ ca musalī śarkarā samam

6.11

गवां क्षीरैः पलार्धं तु अनु रात्रौ सदा पिबेत्

gavāṃ kṣīraiḥ palārdhaṃ tu anu rātrau sadā pibet

6.11.2

अनन्तं वर्धते वीर्यं रसोऽयं मदनोदयः

anantaṃ vardhate vīryaṃ raso'yaṃ madanodayaḥ

6.12

शुद्धसूतसमं गन्धं बदरीचित्रकद्रवैः

śuddhasūtasamaṃ gandhaṃ badarīcitrakadravaiḥ

6.12.2

मर्द्यं चाङ्कोल्लजैर्द्रावैस्तप्तखल्वे दिनत्रयम्

mardyaṃ cāṅkollajairdrāvaistaptakhalve dinatrayam

6.13

सद्यो हताजमांसस्य पिण्डे न्यस्तं च सीवयेत्

sadyo hatājamāṃsasya piṇḍe nyastaṃ ca sīvayet

6.13.2

तत्पिण्डं तिलतैलेन लोहपात्रे शनैः पचेत्

tatpiṇḍaṃ tilatailena lohapātre śanaiḥ pacet

6.14

यावन्मांसं रक्तवर्णं ततः सूतं समुद्धरेत्

yāvanmāṃsaṃ raktavarṇaṃ tataḥ sūtaṃ samuddharet

6.14.2

त्रिदिनं मुसलीक्वाथैर्भावितं सितया युतम्

tridinaṃ musalīkvāthairbhāvitaṃ sitayā yutam

6.15

निष्कैकं भक्षयेन्नित्यं रसोऽयं मदनेश्वरः

niṣkaikaṃ bhakṣayennityaṃ raso'yaṃ madaneśvaraḥ

6.15.2

विदारीकन्दचूर्णं तु क्षीराज्येन पलं पिबेत्

vidārīkandacūrṇaṃ tu kṣīrājyena palaṃ pibet

6.16

रमयेत्स्त्रीशतं नित्यं तत्त्यागादन्धतां व्रजेत्

ramayetstrīśataṃ nityaṃ tattyāgādandhatāṃ vrajet

6.16.2

मृताभ्रं पारदं स्वर्णं तुल्यं मर्द्यं दिनत्रयम्

mṛtābhraṃ pāradaṃ svarṇaṃ tulyaṃ mardyaṃ dinatrayam

Rasaratnākara