1.51

गुरवे तु वरं दत्त्वा स्नायाद् वा तदनुज्ञया

gurave tu varaṃ dattvā snāyād vā tadanujñayā

1.51.2

वेदं व्रतानि वा पारं नीत्वा ह्य् उभयम् एव वा

vedaṃ vratāni vā pāraṃ nītvā hy ubhayam eva vā

1.52

अविप्लुतब्रह्मचर्यो लक्षण्यां स्त्रियम् उद्वहेत्

aviplutabrahmacaryo lakṣaṇyāṃ striyam udvahet

1.52.2

अनन्यपूर्विकां कान्ताम् असपिण्डां यवीयसीम्

ananyapūrvikāṃ kāntām asapiṇḍāṃ yavīyasīm

1.53

अरोगिणीं भ्रातृमतीम् असमानार्षगोत्रजाम्

arogiṇīṃ bhrātṛmatīm asamānārṣagotrajām

1.53.2

पञ्चमात् सप्तमाद् ऊर्ध्वं मातृतः पितृतस् तथा

pañcamāt saptamād ūrdhvaṃ mātṛtaḥ pitṛtas tathā

1.54

दशपूरुषविख्याताच्छ्रोत्रियाणां महाकुलात्

daśapūruṣavikhyātācchrotriyāṇāṃ mahākulāt

1.54.2

स्फीताद् अपि न संचारिरोगदोषसमन्वितात्

sphītād api na saṃcārirogadoṣasamanvitāt

1.55

एतैर् एव गुणैर् युक्तः सवर्णः श्रोत्रियो वरः

etair eva guṇair yuktaḥ savarṇaḥ śrotriyo varaḥ

1.55.2

यत्नात् परीक्षितः पुंस्त्वे युवा धीमान् जनप्रियः

yatnāt parīkṣitaḥ puṃstve yuvā dhīmān janapriyaḥ

1.56

यद् उच्यते द्विजातीनां शूद्राद् दारोपसंग्रहः

yad ucyate dvijātīnāṃ śūdrād dāropasaṃgrahaḥ

1.56.2

नैतन् मम मतं यस्मात् तत्रायं जायते स्वयम्

naitan mama mataṃ yasmāt tatrāyaṃ jāyate svayam

1.57

तिस्रो वर्णानुपूर्व्येण द्वे तथैका यथाक्रमम्

tisro varṇānupūrvyeṇa dve tathaikā yathākramam

1.57.2

ब्राह्मणक्षत्रियविशां भार्या स्वा शूद्रजन्मनः

brāhmaṇakṣatriyaviśāṃ bhāryā svā śūdrajanmanaḥ

1.58

ब्राह्मो विवाह आहूय दीयते शक्त्यलंकृता

brāhmo vivāha āhūya dīyate śaktyalaṃkṛtā

1.58.2

तज्जः पुनात्य् उभयतः पुरुषान् एकविंशतिम्

tajjaḥ punāty ubhayataḥ puruṣān ekaviṃśatim

1.59

यज्ञस्थ ऋत्विजे दैव आदायार्षस् तु गोद्वयम्

yajñastha ṛtvije daiva ādāyārṣas tu godvayam

1.59.2

चतुर्दश प्रथमजः पुनात्य् उत्तरजश् च षट्

caturdaśa prathamajaḥ punāty uttarajaś ca ṣaṭ

1.60

इत्य् उक्त्वा चरतां धर्मं सह या दीयते ऽर्थिने

ity uktvā caratāṃ dharmaṃ saha yā dīyate 'rthine

1.60.2

स कायः पावयेत् तज्जः षट् षड्वंश्यान् सहात्मना

sa kāyaḥ pāvayet tajjaḥ ṣaṭ ṣaḍvaṃśyān sahātmanā

Yājñavalkyasmṛti