2.63

तत्कालकृतमूल्यो वा तत्र तिष्ठेद् अवृद्धिकः

tatkālakṛtamūlyo vā tatra tiṣṭhed avṛddhikaḥ

2.63.2

विना धारणकाद् वापि विक्रीणीत ससाक्षिकम्

vinā dhāraṇakād vāpi vikrīṇīta sasākṣikam

2.64

यदा तु द्विगुणीभूतम् ऋणम् आधौ तदा खलु

yadā tu dviguṇībhūtam ṛṇam ādhau tadā khalu

2.64.2

मोच्य आधिस् तदुत्पन्ने प्रविष्टे द्विगुणे धने

mocya ādhis tadutpanne praviṣṭe dviguṇe dhane

2.65

वासनस्थम् अनाख्याय हस्ते ऽन्यस्य यद् अर्प्यते

vāsanastham anākhyāya haste 'nyasya yad arpyate

2.65.2

द्रव्यं तद् औपनिधिकं प्रतिदेयं तथैव तत्

dravyaṃ tad aupanidhikaṃ pratideyaṃ tathaiva tat

2.66

न दाप्यो ऽपहृतं तं तु राजदैविकतस्करैः

na dāpyo 'pahṛtaṃ taṃ tu rājadaivikataskaraiḥ

2.66.2

भ्रेषश् चेन् मार्गिते ऽदत्ते दाप्यो दण्डं च तत्समम्

bhreṣaś cen mārgite 'datte dāpyo daṇḍaṃ ca tatsamam

2.67

आजीवन् स्वेच्छया दण्ड्यो दाप्यस् तं चापि सोदयम्

ājīvan svecchayā daṇḍyo dāpyas taṃ cāpi sodayam

2.67.2

याचितान्वाहितन्यासनिक्षेपादिष्व् अयं विधिः

yācitānvāhitanyāsanikṣepādiṣv ayaṃ vidhiḥ

2.68

तपस्विनो दानशीलाः कुलीनाः सत्यवादिनः

tapasvino dānaśīlāḥ kulīnāḥ satyavādinaḥ

2.68.2

धर्मप्रधाना ऋजवः पुत्रवन्तो धनान्विताः

dharmapradhānā ṛjavaḥ putravanto dhanānvitāḥ

2.69

त्र्यवराः साक्षिणो ज्ञेयाः श्रौतस्मार्तक्रियापराः

tryavarāḥ sākṣiṇo jñeyāḥ śrautasmārtakriyāparāḥ

2.69.2

यथाजाति यथावर्णं सर्वे सर्वेषु वा स्मृताः

yathājāti yathāvarṇaṃ sarve sarveṣu vā smṛtāḥ

2.70

स्त्रीबालवृद्धकितवमत्तोन्मत्ताभिशस्तकाः

strībālavṛddhakitavamattonmattābhiśastakāḥ

2.70.2

रङ्गावतारिपाखण्डिकूटकृद्विकलेन्द्रियाः

raṅgāvatāripākhaṇḍikūṭakṛdvikalendriyāḥ

2.71

पतिताप्तार्थसंबन्धिसहायरिपुतस्कराः

patitāptārthasaṃbandhisahāyariputaskarāḥ

2.71.2

साहसी दृष्टदोषश् च निर्धूताद्यास् त्व् असाक्षिणः

sāhasī dṛṣṭadoṣaś ca nirdhūtādyās tv asākṣiṇaḥ

2.72

उभयानुमतः साक्षी भवत्य् एको ऽपि धर्मवित्

ubhayānumataḥ sākṣī bhavaty eko 'pi dharmavit

2.72.2

सर्वः साक्षी संग्रहणे चौर्यपारुष्यसाहसे

sarvaḥ sākṣī saṃgrahaṇe cauryapāruṣyasāhase

Yājñavalkyasmṛti