2.53

दर्शने प्रत्यये दाने प्रातिभाव्यं विधीयते

darśane pratyaye dāne prātibhāvyaṃ vidhīyate

2.53.2

आद्यौ तु वितथे दाप्याव् इतरस्य सुता अपि

ādyau tu vitathe dāpyāv itarasya sutā api

2.54

दर्शनप्रतिभूर् यत्र मृतः प्रात्ययिको ऽपि वा

darśanapratibhūr yatra mṛtaḥ prātyayiko 'pi vā

2.54.2

न तत्पुत्रा ऋणं दद्युर् दद्युर् दानाय यः स्थितः

na tatputrā ṛṇaṃ dadyur dadyur dānāya yaḥ sthitaḥ

2.55

बहवः स्युर् यदि स्वांशैर् दद्युः प्रतिभुवो धनम्

bahavaḥ syur yadi svāṃśair dadyuḥ pratibhuvo dhanam

2.55.2

एकच्छायाश्रितेष्व् एषु धनिकस्य यथारुचि

ekacchāyāśriteṣv eṣu dhanikasya yathāruci

2.56

प्रतिभूर् दापितो यत् तु प्रकाशं धनिनो धनम्

pratibhūr dāpito yat tu prakāśaṃ dhanino dhanam

2.56.2

द्विगुणं प्रतिदातव्यम् ऋणिकैस् तस्य तद् भवेत्

dviguṇaṃ pratidātavyam ṛṇikais tasya tad bhavet

2.57

संततिः स्त्रीपशुष्व् एव धान्यं त्रिगुणम् एव च

saṃtatiḥ strīpaśuṣv eva dhānyaṃ triguṇam eva ca

2.57.2

वस्त्रं चतुर्गुणं प्रोक्तं रसश् चाष्टगुणस् तथा

vastraṃ caturguṇaṃ proktaṃ rasaś cāṣṭaguṇas tathā

2.58

आधिः प्रणश्येद् द्विगुणे धने यदि न मोक्ष्यते

ādhiḥ praṇaśyed dviguṇe dhane yadi na mokṣyate

2.58.2

काले कालकृतो नश्येत् फलभोग्यो न नश्यति

kāle kālakṛto naśyet phalabhogyo na naśyati

2.59

गोप्याधिभोगे नो वृद्धिः सोपकारे च हापिते

gopyādhibhoge no vṛddhiḥ sopakāre ca hāpite

2.59.2

नष्टो देयो विनष्टश् च दैवराजकृताद् ऋते

naṣṭo deyo vinaṣṭaś ca daivarājakṛtād ṛte

2.60

आधेः स्वीकरणात् सिद्धी रक्ष्यमाणो ऽप्य् असारताम्

ādheḥ svīkaraṇāt siddhī rakṣyamāṇo 'py asāratām

2.60.2

यातश् चेद् अन्य आधेयो धनभाग् वा धनी भवेत्

yātaś ced anya ādheyo dhanabhāg vā dhanī bhavet

2.61

चरित्रबन्धककृतं स वृद्ध्या दापयेद् धनम्

caritrabandhakakṛtaṃ sa vṛddhyā dāpayed dhanam

2.61.2

सत्यंकारकृतं द्रव्यं द्विगुणं प्रतिदापयेत्

satyaṃkārakṛtaṃ dravyaṃ dviguṇaṃ pratidāpayet

2.62

उपस्थितस्य मोक्तव्य आधिः स्तेनो ऽन्यथा भवेत्

upasthitasya moktavya ādhiḥ steno 'nyathā bhavet

2.62.2

प्रयोजके ऽसति धनं कुले न्यस्याधिम् आप्नुयात्

prayojake 'sati dhanaṃ kule nyasyādhim āpnuyāt

Yājñavalkyasmṛti