2.3

अपश्यता कार्यवशाद् व्यवहारान् नृपेण तु

apaśyatā kāryavaśād vyavahārān nṛpeṇa tu

2.3.2

सभ्यैः सह नियोक्तव्यो ब्राह्मणः सर्वधर्मवित्

sabhyaiḥ saha niyoktavyo brāhmaṇaḥ sarvadharmavit

2.4

रागाल् लोभाद् भयाद् वापि स्मृत्यपेतादिकारिणः

rāgāl lobhād bhayād vāpi smṛtyapetādikāriṇaḥ

2.4.2

सभ्याः पृथक् पृथग् दण्ड्या विवादाद् द्विगुणं दमम्

sabhyāḥ pṛthak pṛthag daṇḍyā vivādād dviguṇaṃ damam

2.5

स्मृत्याचारव्यपेतेन मार्गेणाधर्षितः परैः

smṛtyācāravyapetena mārgeṇādharṣitaḥ paraiḥ

2.5.2

आवेदयति चेद् राज्ञे व्यवहारपदं हि तत्

āvedayati ced rājñe vyavahārapadaṃ hi tat

2.6

प्रत्यर्थिनो ऽग्रतो लेख्यं यथावेदितम् अर्थिना

pratyarthino 'grato lekhyaṃ yathāveditam arthinā

2.6.2

समामासतदर्धाहर्नामजात्यादिचिह्नितम्

samāmāsatadardhāharnāmajātyādicihnitam

2.7

श्रुतार्थस्योत्तरं लेख्यं पूर्वावेदकसंनिधौ

śrutārthasyottaraṃ lekhyaṃ pūrvāvedakasaṃnidhau

2.7.2

ततो ऽर्थी लेखयेत् सद्यः प्रतिज्ञातार्थसाधनम्

tato 'rthī lekhayet sadyaḥ pratijñātārthasādhanam

2.8

तत्सिद्धौ सिद्धिम् आप्नोति विपरीतम् अतो ऽन्यथा

tatsiddhau siddhim āpnoti viparītam ato 'nyathā

2.8.2

चतुष्पाद् व्यवहारो ऽयं विवादेषूपदर्शितः

catuṣpād vyavahāro 'yaṃ vivādeṣūpadarśitaḥ

2.9

अभियोगम् अनिस्तीर्य नैनं प्रत्यभियोजयेत्

abhiyogam anistīrya nainaṃ pratyabhiyojayet

2.9.2

अभियुक्तं च नान्येन नोक्तं विप्रकृतिं नयेत्

abhiyuktaṃ ca nānyena noktaṃ viprakṛtiṃ nayet

2.10

कुर्यात् प्रत्यभियोगं च कलहे साहसेषु च

kuryāt pratyabhiyogaṃ ca kalahe sāhaseṣu ca

2.10.2

उभयोः प्रतिभूर् ग्राह्यः समर्थः कार्यनिर्णये

ubhayoḥ pratibhūr grāhyaḥ samarthaḥ kāryanirṇaye

2.11

निह्नवे भावितो दद्याद् धनं राज्ञे च तत्समम्

nihnave bhāvito dadyād dhanaṃ rājñe ca tatsamam

2.11.2

मिथ्याभियोगी द्विगुणम् अभियोगाद् धनं वहेत्

mithyābhiyogī dviguṇam abhiyogād dhanaṃ vahet

2.12

साहसस्तेयपारुष्यगोऽभिशापात्यये स्त्रियाम्

sāhasasteyapāruṣyago'bhiśāpātyaye striyām

2.12.2

विवादयेत् सद्य एव कालो ऽन्यत्रेच्छया स्मृतः

vivādayet sadya eva kālo 'nyatrecchayā smṛtaḥ

Yājñavalkyasmṛti