54.31

एनस्विभिर् निर्णिक्तैर् नार्थं किंचित् समाचरेत्

enasvibhir nirṇiktair nārthaṃ kiṃcit samācaret

54.31.2

कृतनिर्णेजनांश्चैतान् न जुगुप्सेत धर्मवित्

kṛtanirṇejanāṃścaitān na jugupseta dharmavit

54.32

बालघ्नांश्च कृतघ्नांश्च विशुद्धान् अपि धर्मतः

bālaghnāṃśca kṛtaghnāṃśca viśuddhān api dharmataḥ

54.32.2

शरणागतहन्तॄंश्च स्त्रीहन्तॄंश्च न संवसेत्

śaraṇāgatahantṝṃśca strīhantṝṃśca na saṃvaset

54.33

अशीतिर् यस्य वर्षाणि बालो वाप्य् ऊनषोडशः

aśītir yasya varṣāṇi bālo vāpy ūnaṣoḍaśaḥ

54.33.2

प्रायश्चित्तार्धम् अर्हन्ति स्त्रियो रोगिण एव च

prāyaścittārdham arhanti striyo rogiṇa eva ca

54.34

अनुक्तनिष्कृतीनां तु पापानाम् अपनुत्तये

anuktaniṣkṛtīnāṃ tu pāpānām apanuttaye

54.34.2

शक्तिं चावेक्ष्य पापं च प्रायश्चित्तं प्रकल्पयेत्

śaktiṃ cāvekṣya pāpaṃ ca prāyaścittaṃ prakalpayet

55.1

अथ रहस्यप्रायश्चित्तानि भवन्ति

atha rahasyaprāyaścittāni bhavanti

55.2

स्रवन्तीम् आसाद्य स्नातः प्रत्यहं षोडश प्राणायामान् सलक्षणान् कृत्वैककालं हविष्याशी मासेन ब्रह्महा पूतो भवति

sravantīm āsādya snātaḥ pratyahaṃ ṣoḍaśa prāṇāyāmān salakṣaṇān kṛtvaikakālaṃ haviṣyāśī māsena brahmahā pūto bhavati

55.3

कर्मणो ऽन्ते पयस्विनीं गां दद्यात्

karmaṇo 'nte payasvinīṃ gāṃ dadyāt

55.4

व्रतेनाघमर्षणेन च सुरापः पूतो भवति

vratenāghamarṣaṇena ca surāpaḥ pūto bhavati

55.5

गायत्रीदशसाहस्रजपेन सुवर्णस्तेयकृत्

gāyatrīdaśasāhasrajapena suvarṇasteyakṛt

55.6

त्रिरात्रोपोषितः पुरुषसूक्तजपहोमाभ्यां गुरुतल्पगः

trirātropoṣitaḥ puruṣasūktajapahomābhyāṃ gurutalpagaḥ

55.7

यथाश्वमेधः क्रतुराट् सर्वपापापनोदकः

yathāśvamedhaḥ kraturāṭ sarvapāpāpanodakaḥ

55.7.2

तथाघमर्षणं सूक्तं सर्वपापापनोदकम्

tathāghamarṣaṇaṃ sūktaṃ sarvapāpāpanodakam

55.8

प्राणायामं द्विजः कुर्यात् सर्वपापापनुत्तये

prāṇāyāmaṃ dvijaḥ kuryāt sarvapāpāpanuttaye

55.8.2

दह्यन्ते सर्वपापानि प्राणायामैर् द्विजस्य तु

dahyante sarvapāpāni prāṇāyāmair dvijasya tu

55.9

सव्याहृतिं सप्रणवां गायत्रीं शिरसा सह

savyāhṛtiṃ sapraṇavāṃ gāyatrīṃ śirasā saha

55.9.2

त्रिः पठेद् आयतप्राणः प्राणायामः स उच्यते

triḥ paṭhed āyataprāṇaḥ prāṇāyāmaḥ sa ucyate

Viṣṇusmṛti