12.66.2

देव इव सविता सत्यधर्मेन्द्रो न तस्थौ समरे पथीनाम्

deva iva savitā satyadharmendro na tasthau samare pathīnām

12.67

सीरा युञ्जन्ति कवयो युगा वितन्वते पृथक्

sīrā yuñjanti kavayo yugā vitanvate pṛthak

12.67.2

धीरा देवेषु सुम्नया

dhīrā deveṣu sumnayā

12.68

युनक्त सीरा वि युगा तनुध्वं कृते योनौ वपतेह बीजम्

yunakta sīrā vi yugā tanudhvaṃ kṛte yonau vapateha bījam

12.68.2

गिरा च श्रुष्टिः सभरा असन् नो नेदीय इत् सृण्यः पक्वम् एयात्

girā ca śruṣṭiḥ sabharā asan no nedīya it sṛṇyaḥ pakvam eyāt

12.69

शुनं सु फाला विकृषन्तु भूमिं शुनं कीनाशा अभियन्तु वाहैः

śunaṃ su phālā vikṛṣantu bhūmiṃ śunaṃ kīnāśā abhiyantu vāhaiḥ

12.69.2

शुनासीरा हविषा तोशमाना सुपिप्पला ओषधीः कर्तनास्मे

śunāsīrā haviṣā tośamānā supippalā oṣadhīḥ kartanāsme

12.70

घृतेन सीता मधुना समज्यतां विश्वैर् देवैर् अनुमता मरुद्भिः

ghṛtena sītā madhunā samajyatāṃ viśvair devair anumatā marudbhiḥ

12.70.2

ऊर्जस्वती पयसा पिन्वमानास्मान्त् सीते पयसाभ्याववृत्स्व

ūrjasvatī payasā pinvamānāsmānt sīte payasābhyāvavṛtsva

12.71

लाङ्गलं पवीरवत् सुशेवं सोमपित्सरु

lāṅgalaṃ pavīravat suśevaṃ somapitsaru

12.71.2

तद् उद्वपति गाम् अविं प्रफर्व्यं च पीवरीं प्रस्थावद् रथवाहनम्

tad udvapati gām aviṃ prapharvyaṃ ca pīvarīṃ prasthāvad rathavāhanam

12.72

कामं कामदुघे धुक्ष्व मित्राय वरुणाय च

kāmaṃ kāmadughe dhukṣva mitrāya varuṇāya ca

12.72.2

इन्द्रायाश्विभ्यां पूष्णे प्रजाभ्य ओषधीभ्यः

indrāyāśvibhyāṃ pūṣṇe prajābhya oṣadhībhyaḥ

12.73

विमुच्यध्वम् अघ्न्या देवयाना अगन्म तमसस् पारम् अस्य ज्योतिर् आपाम

vimucyadhvam aghnyā devayānā aganma tamasas pāram asya jyotir āpāma

12.74

सजूर् अब्दो अयवोभिः सजूर् उषा अरुणीभिः सजोषसाव् अश्विना दंसोभिः सजूः सूर एतशेन सजूर् वैश्वानर इडया घृतेन स्वाहा

sajūr abdo ayavobhiḥ sajūr uṣā aruṇībhiḥ sajoṣasāv aśvinā daṃsobhiḥ sajūḥ sūra etaśena sajūr vaiśvānara iḍayā ghṛtena svāhā

12.75

या ओषधीः पूर्वा जाता देवेभ्यस् त्रियुगं पुरा

yā oṣadhīḥ pūrvā jātā devebhyas triyugaṃ purā

12.75.2

मनै नु बभ्रूणाम् अहं शतं धामानि सप्त

nu babhrūṇām ahaṃ śataṃ dhāmāni sapta ca

12.76

शतं वो अम्ब धामानि सहस्रम् उत वो रुहः

śataṃ vo amba dhāmāni sahasram uta vo ruhaḥ

12.76.2

अधा शतक्रत्वो यूयम् इमं मे अगदं कृत

adhā śatakratvo yūyam imaṃ me agadaṃ kṛta

12.77

ओषधीः प्रतिमोदध्वं पुष्पवतीः प्रसूवरीः

oṣadhīḥ pratimodadhvaṃ puṣpavatīḥ prasūvarīḥ

Vājasaneyisaṃhitā (Mādhyandina)