9.4.2

तेषां विशिप्रियाणां वो ऽहम् इषम् ऊर्जं समग्रभम्

teṣāṃ viśipriyāṇāṃ vo 'ham iṣam ūrjaṃ samagrabham

9.4.3

उपयामगृहीतो ऽसीन्द्राय त्वा जुष्टं गृह्णामि

upayāmagṛhīto 'sīndrāya tvā juṣṭaṃ gṛhṇāmi

9.4.4

एष ते योनिर् इन्द्राय त्वा जुष्टतमम्

eṣa te yonir indrāya tvā juṣṭatamam

9.4.5

सम्पृचौ स्थः सं मा भद्रेण पृङ्क्तम्

sampṛcau sthaḥ saṃ mā bhadreṇa pṛṅktam

9.4.6

विपृचौ स्थो वि मा पाप्मना पृङ्क्तम्

vipṛcau stho vi mā pāpmanā pṛṅktam

9.5

इन्द्रस्य वज्रो ऽसि वाजसास् त्वयायं सेत्

indrasya vajro 'si vājasās tvayāyaṃ set

9.5.2

वाजस्य नु प्रसवे मातरं महीम् अदितिं नाम वचसा करामहे

vājasya nu prasave mātaraṃ mahīm aditiṃ nāma vacasā karāmahe

9.5.3

यस्याम् इदं विश्वं भुवनम् आविवेश तस्यां नो देवः सविता धर्म साविषत्

yasyām idaṃ viśvaṃ bhuvanam āviveśa tasyāṃ no devaḥ savitā dharma sāviṣat

9.6

अप्स्व् अन्तर् अमृतम् अप्सु भेषजम् अपाम् उत प्रशस्तिष्व् अश्वा भवत वाजिनः

apsv antar amṛtam apsu bheṣajam apām uta praśastiṣv aśvā bhavata vājinaḥ

9.6.2

देवीर् आपो यो व ऊर्मिः प्रतूर्तिः ककुन्मान् वाजसास् तेनायं वाजं सेत्

devīr āpo yo va ūrmiḥ pratūrtiḥ kakunmān vājasās tenāyaṃ vājaṃ set

9.7

वातो वा मनो वा गन्धर्वाः सप्तविंशतिः

vāto vā mano vā gandharvāḥ saptaviṃśatiḥ

9.7.2

ते अग्रे ऽश्वम् अयुञ्जंस् ते अस्मिन् जवम् आदधुः

te agre 'śvam ayuñjaṃs te asmin javam ādadhuḥ

9.8

वातरंहा भव वाजिन् युज्यमान इन्द्रस्येव दक्षिणः श्रियैधि

vātaraṃhā bhava vājin yujyamāna indrasyeva dakṣiṇaḥ śriyaidhi

9.8.2

युञ्जन्तु त्वा मरुतो विश्ववेदस आ ते त्वष्टा पत्सु जवं दधातु

yuñjantu tvā maruto viśvavedasa ā te tvaṣṭā patsu javaṃ dadhātu

9.9

जवो यस् ते वाजिन् निहितो गुहा यः श्येने परीत्तो अचरच् च वाते

javo yas te vājin nihito guhā yaḥ śyene parītto acarac ca vāte

9.9.2

तेन नो वाजिन् बलवान् बलेन वाजजिच् च भव समने च पारयिष्णुः

tena no vājin balavān balena vājajic ca bhava samane ca pārayiṣṇuḥ

9.9.3

वाजिनो वाजजितो वाजं सरिष्यन्तो बृहस्पतेर् भागम् अवजिघ्रत

vājino vājajito vājaṃ sariṣyanto bṛhaspater bhāgam avajighrata

9.10

देवस्याहं सवितुः सवे सत्यसवसो बृहस्पतेर् उत्तमं नाकं रुहेयम्

devasyāhaṃ savituḥ save satyasavaso bṛhaspater uttamaṃ nākaṃ ruheyam

9.10.2

देवस्याहं सवितुः सवे सत्यसवस इन्द्रस्योत्तमं नाकं रुहेयम्

devasyāhaṃ savituḥ save satyasavasa indrasyottamaṃ nākaṃ ruheyam

9.10.3

देवस्याहं सवितुः सवे सत्यप्रसवसो बृहस्पतेर् उत्तमं नाकम् अरुहम्

devasyāhaṃ savituḥ save satyaprasavaso bṛhaspater uttamaṃ nākam aruham

Vājasaneyisaṃhitā (Mādhyandina)