2.3.12

सजूर् देवैः सायंयावभिर् इत्य् उन्नीतं स्थालीं च सायं संमृशति सजूर् देवैः प्रातर्यावभिर् इति प्रातः

sajūr devaiḥ sāyaṃyāvabhir ity unnītaṃ sthālīṃ ca sāyaṃ saṃmṛśati sajūr devaiḥ prātaryāvabhir iti prātaḥ

2.4.1

तां समिधम् आदायोपरिष्टात् स्रुग्दण्ड उपसंगृह्य पशून् मे यच्छेत्य् अपरेण गार्हपत्यं कूर्चे निदधाति

tāṃ samidham ādāyopariṣṭāt srugdaṇḍa upasaṃgṛhya paśūn me yacchety apareṇa gārhapatyaṃ kūrce nidadhāti

2.4.2

यजमानो नम ईशानाय प्रजा इति जपति

yajamāno nama īśānāya prajā iti japati

2.4.3

अध्वर्युर् उर्व् अन्तरिक्षं वीहीति समया गार्हपत्यार्चिर् हरति

adhvaryur urv antarikṣaṃ vīhīti samayā gārhapatyārcir harati

2.4.4

प्राङ् हरन् दशहोतारं व्याख्यायाग्नये त्वा वैश्वानरायेति मध्यदेशे निगृह्य वाताय त्वेत्य् उद्यम्यायुर् मे यच्छेत्य् अपरेणाहवनीयं कूर्च उपसादयति

prāṅ haran daśahotāraṃ vyākhyāyāgnaye tvā vaiśvānarāyeti madhyadeśe nigṛhya vātāya tvety udyamyāyur me yacchety apareṇāhavanīyaṃ kūrca upasādayati

2.4.5

एषा ते अग्ने समिद् इति पालाशीं समिधम् आदधाति

eṣā te agne samid iti pālāśīṃ samidham ādadhāti

2.4.6

विद्युद् असीत्य् अप उपस्पृश्यादीप्तायां समिधि प्राणायामं कृत्वा पयसा घृतेन दध्ना तण्डुलैर् यवाग्वौदनेन सोमेन वाग्निर् ज्योतिर् ज्योतिर् अग्निः स्वाहेति सायं कनीयसीं पूर्वाम् आहुतिं जुहुयात् सूर्यो ज्योतिर् ज्योतिः सूर्यः स्वाहेति प्रातः

vidyud asīty apa upaspṛśyādīptāyāṃ samidhi prāṇāyāmaṃ kṛtvā payasā ghṛtena dadhnā taṇḍulair yavāgvaudanena somena vāgnir jyotir jyotir agniḥ svāheti sāyaṃ kanīyasīṃ pūrvām āhutiṃ juhuyāt sūryo jyotir jyotiḥ sūryaḥ svāheti prātaḥ

2.4.7

अग्निर् ज्योतिर् ज्योतिः सूर्यः स्वाहेति सायं सूर्यो ज्योतिर् ज्योतिर् अग्निः स्वाहेति प्रातर् इत्य् एवं संसृष्टहोमम् एके समामनन्ति

agnir jyotir jyotiḥ sūryaḥ svāheti sāyaṃ sūryo jyotir jyotir agniḥ svāheti prātar ity evaṃ saṃsṛṣṭahomam eke samāmananti

2.5.1

वर्चो मे यच्छेति पुनर् एव कूर्चे उपसादयति

varco me yaccheti punar eva kūrce upasādayati

2.5.2

लेपम् आदायोत्तरतः कूर्चे ओषधीभ्यस् त्वौषधीर् जिन्वेति लेपं निमृज्याग्ने गृहपत इति गार्हपत्यं दक्षिणावृत् प्रतीक्षते

lepam ādāyottarataḥ kūrce oṣadhībhyas tvauṣadhīr jinveti lepaṃ nimṛjyāgne gṛhapata iti gārhapatyaṃ dakṣiṇāvṛt pratīkṣate

2.5.3

अतिहाय पूर्वाम् आहुतिं भूर् भुवः सुवर् इत्य् उत्तरां भूयसीं जुहुयात् तूष्णीं वा

atihāya pūrvām āhutiṃ bhūr bhuvaḥ suvar ity uttarāṃ bhūyasīṃ juhuyāt tūṣṇīṃ vā

2.5.4

भक्षाय भूयः कुर्यात्

bhakṣāya bhūyaḥ kuryāt

2.5.5

हुत्वा भूमानं विष्णुं ध्यायेत्

hutvā bhūmānaṃ viṣṇuṃ dhyāyet

2.5.6

स्रुचम् उद्गृह्य रुद्र मृडेति स्रुचोदीचीं ज्वालां त्रिर् अतिवल्गयति

srucam udgṛhya rudra mṛḍeti srucodīcīṃ jvālāṃ trir ativalgayati

2.5.7

इषे त्वेति सायं लेपम् अभ्यवमार्ष्टि

iṣe tveti sāyaṃ lepam abhyavamārṣṭi

2.5.8

ऊर्जे त्वेत्य् ऊर्ध्वं प्रातर् उन्मार्ष्टि

ūrje tvety ūrdhvaṃ prātar unmārṣṭi

2.5.9

कूर्चे स्रुचं निधाय पितृभ्यस् त्वा पितॄञ् जिन्वेति दक्षिणतः स्थण्डिले नीचा पाणिना लेपं निमृज्य वृष्टिर् असीत्य् अप उपस्पृश्य पूषासीति द्विर् अनामिकाङ्गुल्याशिञ्जन्न् अतिहाय दतः प्राश्याचम्य पुनः प्राश्नाति

kūrce srucaṃ nidhāya pitṛbhyas tvā pitṝñ jinveti dakṣiṇataḥ sthaṇḍile nīcā pāṇinā lepaṃ nimṛjya vṛṣṭir asīty apa upaspṛśya pūṣāsīti dvir anāmikāṅgulyāśiñjann atihāya dataḥ prāśyācamya punaḥ prāśnāti

2.5.10

आग्नेयं हविः प्रजननम् इति प्राचीनदण्डया स्रुचा भक्षयति सौर्यं हविः प्रजननम् इति प्रातर् द्विश् च निर्लेढि

āgneyaṃ haviḥ prajananam iti prācīnadaṇḍayā srucā bhakṣayati sauryaṃ haviḥ prajananam iti prātar dviś ca nirleḍhi

2.5.11

दर्भैः स्रुचं शोधयित्वाद्भिः पूरयित्वोच्छिष्टभाजो जिन्वेत्य् उत्तरेणाहवनीयम् अपो विसृजेत्

darbhaiḥ srucaṃ śodhayitvādbhiḥ pūrayitvocchiṣṭabhājo jinvety uttareṇāhavanīyam apo visṛjet

2.6.1

ताम् अग्निहोत्रहवणीं निष्टप्य पुनस् तोयैः संशोध्य पुनर् अद्भिः पूरयित्वा सर्पेभ्यस् त्वा सर्पाञ् जिन्वेति पूर्वस्यां संस्राव्याक्षितम् असीति वेदिमध्ये गृहेभ्यस् त्वा गृहाञ् जिन्वेति पत्न्य् अञ्जलौ च

tām agnihotrahavaṇīṃ niṣṭapya punas toyaiḥ saṃśodhya punar adbhiḥ pūrayitvā sarpebhyas tvā sarpāñ jinveti pūrvasyāṃ saṃsrāvyākṣitam asīti vedimadhye gṛhebhyas tvā gṛhāñ jinveti patny añjalau ca

Vaikhānasaśrautasūtra