3.3.11

प्रेयम् अगाद् इत्य् उर्व् अन्तरिक्षं प्रेहीति चाहवनीयम् अभिप्रैति

preyam agād ity urv antarikṣaṃ prehīti cāhavanīyam abhipraiti

3.4.1

इह बर्हिर् आसद इति वेदिं प्रत्यवेक्षते

iha barhir āsada iti vediṃ pratyavekṣate

3.4.2

यत्र बर्हिर् दास्यन् भवति ताम् दिशम् एत्य विष्णोः सूपो ऽसीत्य् एकं स्तम्बम् उत्सृज्य देवानां परिषूतम् असीत्य् अन्यं परिषौति

yatra barhir dāsyan bhavati tām diśam etya viṣṇoḥ sūpo 'sīty ekaṃ stambam utsṛjya devānāṃ pariṣūtam asīty anyaṃ pariṣauti

3.4.3

पशूनां त्वा भागम् उत्सृजामीति परिषूतस्यैकां दर्भनाडीम् उत्सृज्येदं देवानाम् इति परिषूतम् अभिमृश्येदं पशूनाम् इत्य् उत्सृष्टम् अभिमृश्य देवस्य त्वेति परिषूतम् अभिगृह्य देवेभ्यस् त्वेत्य् ऊर्ध्वम् उन्मृज्य देव बर्हिर् इत्य् असिदं निधाय या जाता इत्य् अभिमन्त्र्याच्छेत्ता त इत्य् आच्छिन्दन् संनखं मुष्टिं दाति

paśūnāṃ tvā bhāgam utsṛjāmīti pariṣūtasyaikāṃ darbhanāḍīm utsṛjyedaṃ devānām iti pariṣūtam abhimṛśyedaṃ paśūnām ity utsṛṣṭam abhimṛśya devasya tveti pariṣūtam abhigṛhya devebhyas tvety ūrdhvam unmṛjya deva barhir ity asidaṃ nidhāya yā jātā ity abhimantryācchettā ta ity ācchindan saṃnakhaṃ muṣṭiṃ dāti

3.4.4

स प्रस्तरः

sa prastaraḥ

3.4.5

एतयैवावृता परिषवणोत्सर्जनवर्जम् इतरांस् त्रीन् पञ्च सप्त वा मुष्टीन् निधनानि वा दाति यावद् आप्तं भवति

etayaivāvṛtā pariṣavaṇotsarjanavarjam itarāṃs trīn pañca sapta vā muṣṭīn nidhanāni vā dāti yāvad āptaṃ bhavati

3.4.6

देवबर्हिर् इत्य् आव्रश्चनान्य् अभिमृशति

devabarhir ity āvraścanāny abhimṛśati

3.4.7

सहस्रवल्शा इत्य् आत्मानं प्रत्यभिमृश्यादित्यै रास्नासीति प्रदक्षिणं शुल्बम् आवेष्ट्यायुपिता योनिर् इति त्रिधातु पञ्चधातु वा प्रतिदधाति

sahasravalśā ity ātmānaṃ pratyabhimṛśyādityai rāsnāsīti pradakṣiṇaṃ śulbam āveṣṭyāyupitā yonir iti tridhātu pañcadhātu vā pratidadhāti

3.4.8

धातौ धातौ मन्त्रम् आवर्तयति

dhātau dhātau mantram āvartayati

3.4.9

पृथिव्याः संपृचः पाहीति शुल्बं प्रागग्रम् उदगग्रं वास्तीर्यापरिमितानाम् इत्य् अभिमन्त्र्य सुसंभृता त्वेति यथालूनं शुल्बे मुष्टीन् निधनानि वा संभरति

pṛthivyāḥ saṃpṛcaḥ pāhīti śulbaṃ prāgagram udagagraṃ vāstīryāparimitānām ity abhimantrya susaṃbhṛtā tveti yathālūnaṃ śulbe muṣṭīn nidhanāni vā saṃbharati

3.4.10

अलुभिता योनिर् इत्य् उत्तमे प्रस्तरम्

alubhitā yonir ity uttame prastaram

3.4.11

अपां मेध्यं यज्ञियम् इति पितृभ्यः समूलम् उपमूललूनं वा सकृद् आच्छिन्नं बर्हिर् आच्छिद्य तूष्णीं संभरति परिभोजनीयं च

apāṃ medhyaṃ yajñiyam iti pitṛbhyaḥ samūlam upamūlalūnaṃ vā sakṛd ācchinnaṃ barhir ācchidya tūṣṇīṃ saṃbharati paribhojanīyaṃ ca

3.4.12

इन्द्राण्यै संनहनम् इति सर्वान् संनह्य पूषा त इति प्रदक्षिणं ग्रथ्नाति

indrāṇyai saṃnahanam iti sarvān saṃnahya pūṣā ta iti pradakṣiṇaṃ grathnāti

3.4.13

स ते मास्थाद् इति पश्चात् प्राञ्चं ग्रन्थिम् उपगूहति

sa te māsthād iti paścāt prāñcaṃ granthim upagūhati

3.4.14

आपस् त्वाम् अश्विनाव् इति स्पृशति

āpas tvām aśvināv iti spṛśati

3.4.15

इन्द्रस्य त्वेत्य् उद्यम्य बृहस्पतेर् इति शीर्ष्णा हरति

indrasya tvety udyamya bṛhaspater iti śīrṣṇā harati

3.4.16

उर्व् अन्तरिक्षम् अन्विहीति प्रत्येत्यादित्याः सद इत्य् अपरेणाहवनीयम् अन्धः सादयति

urv antarikṣam anvihīti pratyetyādityāḥ sada ity apareṇāhavanīyam andhaḥ sādayati

3.4.17

देवंगमम् असीत्य् अभिमन्त्र्यादित्यास् त्वा पृष्ठे सादयामीति गार्हपत्यदेश उपरीव निदधाति

devaṃgamam asīty abhimantryādityās tvā pṛṣṭhe sādayāmīti gārhapatyadeśa uparīva nidadhāti

3.5.1

तूष्णीं त्रिधातु शुल्बं कृत्वा यत् कृष्णो रूपम् इति पालाशेन खादिरेण याज्ञिकैर् वा वृक्षैर् एकविंशतिदारुम् इध्मं संभृत्य कृष्णो ऽस्य् आखरेस्थ इति संनह्य पूषा त इति प्रदक्षिणं ग्रन्थिं कृत्वा बर्हिःकल्पेन बर्हिषा सह निदधाति

tūṣṇīṃ tridhātu śulbaṃ kṛtvā yat kṛṣṇo rūpam iti pālāśena khādireṇa yājñikair vā vṛkṣair ekaviṃśatidārum idhmaṃ saṃbhṛtya kṛṣṇo 'sy ākharestha iti saṃnahya pūṣā ta iti pradakṣiṇaṃ granthiṃ kṛtvā barhiḥkalpena barhiṣā saha nidadhāti

3.5.2

वेदो ऽसीति वत्सज्ञुं त्रिवृच्छिरसं दार्भं वेदं कृत्वाग्रात् प्रादेशे परिवासयति

vedo 'sīti vatsajñuṃ trivṛcchirasaṃ dārbhaṃ vedaṃ kṛtvāgrāt prādeśe parivāsayati

Vaikhānasaśrautasūtra