1.13.3

तृप्यधिद्वयेन द्विधाग्नौ होम्यं दर्शयित्वाग्निर् ज्योतिर् द्वयेन समिदुल्केन द्विधा

dvidhāgnau homyaṃ darśayitvāgnir jyotir dvayena samidulkena dvidhā dahati

1.13.4

समिदसि स्वाहेति समिधं जुहोति

samidasi svāheti samidhaṃ juhoti

1.13.5

स्रुवेणाज्यं गृहीत्वामृतमसीति अनुत्तानम् अन्तरितम् इत्य् उत्तानं प्रत्युष्टम् इत्य् अनुत्तानं होम्यं प्रदक्षिणम् अभिमन्त्र्याज्यं गृहीत्वोत्तानं स्वतो दक्षिणतो वामतः प्रणीतायां संधाय चित्पतिस्त्वादिभिस्त्रिभिरेव त्रिधाग्नौ संवपति

sruveṇājyaṃ gṛhītvāmṛtamasīti anuttānam antaritam ity uttānaṃ pratyuṣṭam ity anuttānaṃ homyaṃ pradakṣiṇam abhimantryājyaṃ gṛhītvottānaṃ svato dakṣiṇato vāmataḥ praṇītāyāṃ saṃdhāya citpatistvādibhistribhireva tridhāgnau saṃvapati

1.14.1

गायत्र्या समिधः प्रोक्ष्यैकविंशतिर् आहुतिप्रमाणाः करसम्पूर्णा वा समिधो गृहीत्वा मूलाग्राभ्यां घृतं स्पर्शयित्वाभ्यर्च्याक्षताज्यचरुभिरिमा मे अग्न इति मूलमध्याग्राणि स्पृशन्नधो नीत्वोर्ध्वभागे मध्ये च संदधाति

gāyatryā samidhaḥ prokṣyaikaviṃśatir āhutipramāṇāḥ karasampūrṇā vā samidho gṛhītvā mūlāgrābhyāṃ ghṛtaṃ sparśayitvābhyarcyākṣatājyacarubhirimā me agna iti mūlamadhyāgrāṇi spṛśannadho nītvordhvabhāge madhye ca saṃdadhāti

1.14.2

दैवेन तीर्थेन दक्षिणस्याम् अद्भिः प्रागन्तम् अदिते ऽनुमन्यस्वेति पश्चिमस्याम् उत्तरान्तम् अनुमते ऽनुमन्यस्वेत्युत्तरस्यां प्रागन्तं सरस्वते ऽनुमन्यस्वेति देव सवितः प्रसुवेति पूर्वस्यामुदगन्तम् आग्नेयाद्यन्तं सर्वतश्च प्रदक्षिणं परिषिञ्चति

daivena tīrthena dakṣiṇasyām adbhiḥ prāgantam adite 'numanyasveti paścimasyām uttarāntam anumate 'numanyasvetyuttarasyāṃ prāgantaṃ sarasvate 'numanyasveti deva savitaḥ prasuveti pūrvasyāmudagantam āgneyādyantaṃ sarvataśca pradakṣiṇaṃ pariṣiñcati

1.14.3

षष्टिं शतेत्य् अभिमन्त्र्यायं त इध्म इतीध्मान् असंकुलाञ्छरो ऽङ्गारे ऽग्नौ जुहुयात्

ṣaṣṭiṃ śatety abhimantryāyaṃ ta idhma itīdhmān asaṃkulāñcharo 'ṅgāre 'gnau juhuyāt

1.14.4

यस्यै देवतायै हविर्निरुप्यते तां देवतां मनसा ह वै ध्यायन्निर्वपेद्यथा ह वास्य सुषुम्ना ज्योतिष्मती प्राणवती रेतोधा इत्येता हुतं गृहीत्वा रश्मयश् चतस्रः पृश्नौ संदधीरन् स ह वा शुद्धामृतवहा चिनुही दिव्या लोकपावनीत्य् एताभिश् चन्द्रमसम् आप्याययति

yasyai devatāyai havirnirupyate tāṃ devatāṃ manasā ha vai dhyāyannirvapedyathā ha vāsya suṣumnā jyotiṣmatī prāṇavatī retodhā ityetā hutaṃ gṛhītvā raśmayaś catasraḥ pṛśnau saṃdadhīran sa ha vā śuddhāmṛtavahā cinuhī divyā lokapāvanīty etābhiś candramasam āpyāyayati

1.14.5

असौ नु राजा सोम आप्यायितो मूलगामी वपायन्य् अमृतोद्गारी सुरप्रियेत्येताभिर् अमृतेन तां देवतां तर्पयति

asau nu rājā soma āpyāyito mūlagāmī vapāyany amṛtodgārī surapriyetyetābhir amṛtena tāṃ devatāṃ tarpayati

1.15.1

स्रुवेणाज्यं स्रावयन्परिधी स्पृष्ट्वा वायव्याद्याग्नेयान्तं प्रजापतये स्वाहेति नैरृत्यादीशानान्तमिन्द्राय स्वाहेत्याघारौ जुहुयात्

sruveṇājyaṃ srāvayanparidhī spṛṣṭvā vāyavyādyāgneyāntaṃ prajāpataye svāheti nairṛtyādīśānāntamindrāya svāhetyāghārau juhuyāt

1.15.2

चक्षुषी बुद्ध्वाग्नये स्वाहा सोमाय स्वाहेत्य् आज्यभागाव् उत्तरदक्षिणयोर् जुहोति

cakṣuṣī buddhvāgnaye svāhā somāya svāhety ājyabhāgāv uttaradakṣiṇayor juhoti

1.15.3

युक्तो वहेति पश्चिमादिसौम्यान्तं या तिरश्चीति सौम्यादीन्द्रान्तं संराधन्यै देव्यै स्वाहेतीन्द्रादियाम्यान्तं प्रसाधन्यै देव्यै स्वाहेति याम्यादिवारुणान्तं स्रावयन् हुत्वा मध्यमास्यम् इति बुद्ध्वा तत्र व्याहृतीर् जुहोति

yukto vaheti paścimādisaumyāntaṃ yā tiraścīti saumyādīndrāntaṃ saṃrādhanyai devyai svāhetīndrādiyāmyāntaṃ prasādhanyai devyai svāheti yāmyādivāruṇāntaṃ srāvayan hutvā madhyamāsyam iti buddhvā tatra vyāhṛtīr juhoti

1.15.4

तदग्निमुखमिति ब्रह्मवादिनो वदन्ति

tadagnimukhamiti brahmavādino vadanti

1.15.5

सत्येनेत्यभिमृश्याज्येन जुहोत्यग्नये स्वाहा सोमाय स्वाहाग्नीषोमाभ्यां स्वाहा प्रजापतये स्वाहा ब्रह्मणे स्वाहेन्द्राय स्वाहा वसुभ्यः स्वाहा मरुद्भ्यः स्वाहा रुद्रेभ्यः स्वाहा विष्णवे स्वाहा बृहस्पतये स्वाहा मित्राय स्वाहा वरुणाय स्वाहादित्येभ्यः स्वाहाश्विभ्यां स्वाहा पूष्णे स्वाहा कक्षाय स्वाहा कक्षदैवतसोमाय स्वाहौपासनयज्ञाय स्वाहा यज्ञदैवतविश्वेभ्यो देवेभ्यः स्वाहा सर्वदेवेभ्यः स्वाहेत्यन्तं हुत्वा दर्व्याभिघार्य चरुं सावित्र्या गृहीत्वा जुह्वा व्याहृतीर् जुहोति

satyenetyabhimṛśyājyena juhotyagnaye svāhā somāya svāhāgnīṣomābhyāṃ svāhā prajāpataye svāhā brahmaṇe svāhendrāya svāhā vasubhyaḥ svāhā marudbhyaḥ svāhā rudrebhyaḥ svāhā viṣṇave svāhā bṛhaspataye svāhā mitrāya svāhā varuṇāya svāhādityebhyaḥ svāhāśvibhyāṃ svāhā pūṣṇe svāhā kakṣāya svāhā kakṣadaivatasomāya svāhaupāsanayajñāya svāhā yajñadaivataviśvebhyo devebhyaḥ svāhā sarvadevebhyaḥ svāhetyantaṃ hutvā darvyābhighārya caruṃ sāvitryā gṛhītvā juhvā vyāhṛtīr juhoti

1.15.6

अतो देवा इदं विष्णुर् इत्य् आज्यं समृद्ध्यै जुहुयात्

ato devā idaṃ viṣṇur ity ājyaṃ samṛddhyai juhuyāt

1.15.7

पैतृके वैश्वदेवयज्ञाय स्वाहा यज्ञदैवतविश्वेभ्यो देवेभ्यः स्वाहेत्यन्तं हुत्वा पक्वं जुहुयात्

paitṛke vaiśvadevayajñāya svāhā yajñadaivataviśvebhyo devebhyaḥ svāhetyantaṃ hutvā pakvaṃ juhuyāt

1.15.8

इति सर्वहोमानामादिराघारो विज्ञायते

iti sarvahomānāmādirāghāro vijñāyate

1.16.1

अथ सामान्यतः क्रियाया होममन्त्राः

atha sāmānyataḥ kriyāyā homamantrāḥ

1.16.2

धाता ददातु नो रयिं धाता प्रजाया धाता ददातु नो रयिं प्राचीं धाता ददातु दाशुषे ऽनु नो ऽद्यानुमतिर् अन्विद् अनुमते त्वम् आ मा वाजस्य समाववर्त्य् अनुमन्यतां यस्यामिदं राकामहं यास्ते राके सिनीवालि या सुपाणिः कुहूम् अहं कुहूर्देवानामिति धातादि षोडश

dhātā dadātu no rayiṃ dhātā prajāyā dhātā dadātu no rayiṃ prācīṃ dhātā dadātu dāśuṣe 'nu no 'dyānumatir anvid anumate tvam ā mā vājasya samāvavarty anumanyatāṃ yasyāmidaṃ rākāmahaṃ yāste rāke sinīvāli yā supāṇiḥ kuhūm ahaṃ kuhūrdevānāmiti dhātādi ṣoḍaśa

1.17.1

इमं मे वरुण तत्त्वा यामि त्वं नो अग्ने स त्वं नो अग्ने त्वमग्ने अयास्य् अयासन्निति

imaṃ me varuṇa tattvā yāmi tvaṃ no agne sa tvaṃ no agne tvamagne ayāsy ayāsanniti

1.17.2

प्रजापते न त्वत्प्रजापतिर्जयानित्युपांशुयाजे प्राजापत्ये

prajāpate na tvatprajāpatirjayānityupāṃśuyāje prājāpatye

Vaikhānasagṛhyasūtra