3.6.3

अग्न्यन्तरसंसर्गे ऽनुगते वा पत्नी कृच्छ्रं चरति

agnyantarasaṃsarge 'nugate vā patnī kṛcchraṃ carati

3.6.4

श्रोत्रियागारान्मथित्वा वाग्निमादाय पुनर् औपासनम् आदधीत

śrotriyāgārānmathitvā vāgnimādāya punar aupāsanam ādadhīta

3.6.5

उदक्याशुच्यादिसंसर्गे च विधानं यज्ञप्रायश्चित्ते वक्ष्यामः

udakyāśucyādisaṃsarge ca vidhānaṃ yajñaprāyaścitte vakṣyāmaḥ

3.6.6

वियोगे पक्षस्योपावरोहेति समिधं यावत्कृष्णं तावत् तप्त्वा समारोप्य गच्छेत्

viyoge pakṣasyopāvaroheti samidhaṃ yāvatkṛṣṇaṃ tāvat taptvā samāropya gacchet

3.6.7

अहरहस् तां प्रज्वाल्य हुत्वा तथान्यां समिधं निदधाति

aharahas tāṃ prajvālya hutvā tathānyāṃ samidhaṃ nidadhāti

3.7.1

पचने वावसथ्ये चरुमभिघार्य वैश्वदेवम्

pacane vāvasathye carumabhighārya vaiśvadevam

3.7.2

यथा हेति मण्डलं प्रदक्षिणम् उपलिप्य परिमृज्याग्नये स्वाहा सोमाय स्वाहेत्युत्तरदक्षिणयोर्मध्ये व्याहृतीर् विश्वेभ्यो देवेभ्यः स्वाहा धन्वन्तरये स्वाहा कुह्वै स्वाहानुमत्यै स्वाहा प्रजापतये स्वाहा द्यावापृथिवीभ्याम् स्वाहा व्याहृतीर् इमा मे अग्न इति चरुं सेध्मं जुहुयाद् अग्निहोत्राय स्वाहा वैश्वदेवयज्ञाय स्वाहा ब्रह्मयज्ञाय स्वाहा देवयज्ञाय स्वाहा भूतयज्ञाय स्वाहा मनुष्ययज्ञाय स्वाहा पितृयज्ञाय स्वधा नमः स्वाहा पञ्चमहायज्ञाय स्वाहा व्याहृतीः स्विष्टकृद्व्याहृतीः

yathā heti maṇḍalaṃ pradakṣiṇam upalipya parimṛjyāgnaye svāhā somāya svāhetyuttaradakṣiṇayormadhye vyāhṛtīr viśvebhyo devebhyaḥ svāhā dhanvantaraye svāhā kuhvai svāhānumatyai svāhā prajāpataye svāhā dyāvāpṛthivībhyām svāhā vyāhṛtīr imā me agna iti caruṃ sedhmaṃ juhuyād agnihotrāya svāhā vaiśvadevayajñāya svāhā brahmayajñāya svāhā devayajñāya svāhā bhūtayajñāya svāhā manuṣyayajñāya svāhā pitṛyajñāya svadhā namaḥ svāhā pañcamahāyajñāya svāhā vyāhṛtīḥ sviṣṭakṛdvyāhṛtīḥ

3.7.3

अथ गृहदेवताभ्यो यथादिशं बलिहरणं ब्रह्मणे नमो ब्रह्मपुरुषेभ्यो नमो वास्तोष्पतये नम इति गृहमध्ये

atha gṛhadevatābhyo yathādiśaṃ baliharaṇaṃ brahmaṇe namo brahmapuruṣebhyo namo vāstoṣpataye nama iti gṛhamadhye

3.7.4

इन्द्राय नम इन्द्रपुरुषेभ्यो नमो यमाय नमो यमपुरुषेभ्यो नमो वरुणाय नमो वरुणपुरुषेभ्यो नमः सोमाय नमः सोमपुरुषेभ्यो नमो ऽग्नये नमो निरृतये नमो वायवे नम ईशानाय नम इति

indrāya nama indrapuruṣebhyo namo yamāya namo yamapuruṣebhyo namo varuṇāya namo varuṇapuruṣebhyo namaḥ somāya namaḥ somapuruṣebhyo namo 'gnaye namo nirṛtaye namo vāyave nama īśānāya nama iti

3.7.5

सर्वं दक्षिणे पितृभ्यो ज्ञातिवर्गपत्न्यन्तेभ्यः

sarvaṃ dakṣiṇe pitṛbhyo jñātivargapatnyantebhyaḥ

3.7.6

कृतोपवीती यावन्तो ऽन्नार्थिनस्तावद्भ्यो निर्वपामीति निरुप्याकाशे विश्वेभ्यो देवेभ्यो नमो दिवाचरेभ्यो नमो भूतेभ्यो नमो नक्तंचरेभ्यो नम इति

kṛtopavītī yāvanto 'nnārthinastāvadbhyo nirvapāmīti nirupyākāśe viśvebhyo devebhyo namo divācarebhyo namo bhūtebhyo namo naktaṃcarebhyo nama iti

3.7.7

उच्छीर्षके श्रिया इति

ucchīrṣake śriyā iti

3.7.8

पादतो भद्रकाल्या इति

pādato bhadrakālyā iti

3.7.9

प्रतिद्वारं पूर्वान्तम् उत्तरान्तं वा भुवंगयोर् मरुद्भ्य इति

pratidvāraṃ pūrvāntam uttarāntaṃ vā bhuvaṃgayor marudbhya iti

3.7.10

चुल्याः पक्षयोरग्नय इति

culyāḥ pakṣayoragnaya iti

3.7.11

उदधान्याम् अद्भ्य इति

udadhānyām adbhya iti

3.7.12

पेषण्योर् उभयोर् दृषद इत्य् उलूखलमुसलयोर् वनस्पतिभ्य इति

peṣaṇyor ubhayor dṛṣada ity ulūkhalamusalayor vanaspatibhya iti

3.7.13

शूर्प ओषधीभ्य इति

śūrpa oṣadhībhya iti

3.7.14

वास्तुपृष्ठे शुनां च पतितानां च श्वपचां पापरोगिणाम्

vāstupṛṣṭhe śunāṃ ca patitānāṃ ca śvapacāṃ pāparogiṇām

3.7.15

वयसां च क्रिमीणां च भूमावन्नं वपाम्यहमिति बलिशेषं निर्वपति

vayasāṃ ca krimīṇāṃ ca bhūmāvannaṃ vapāmyahamiti baliśeṣaṃ nirvapati

Vaikhānasagṛhyasūtra