2.7.7

नित्यं सायं प्रातर् एवं जुहुयाद् यतो ब्रह्मदत्तम् इदम् इज्यम् अग्निहोत्रम् एतन्मूलास्तदग्नय इति ब्रह्मवादिनो वदन्ति

nityaṃ sāyaṃ prātar evaṃ juhuyād yato brahmadattam idam ijyam agnihotram etanmūlāstadagnaya iti brahmavādino vadanti

2.8.1

अग्निष् ट आयुरिति दण्डमिन्द्रो मरुद्भिर् इति शरावं कठिनं वा भैक्षपात्रं दद्यात्

agniṣ ṭa āyuriti daṇḍamindro marudbhir iti śarāvaṃ kaṭhinaṃ vā bhaikṣapātraṃ dadyāt

2.8.2

भवति भिक्षां देहीति ब्राह्मणो ब्रूयात् क्षत्रियो भिक्षां भवति देहीति वैश्यो भिक्षां देहि भवतीति

bhavati bhikṣāṃ dehīti brāhmaṇo brūyāt kṣatriyo bhikṣāṃ bhavati dehīti vaiśyo bhikṣāṃ dehi bhavatīti

2.8.3

मौनव्रतेन ब्राह्मणेभ्यो भैक्षमामम् इतरेभ्यो गृह्णीयात्

maunavratena brāhmaṇebhyo bhaikṣamāmam itarebhyo gṛhṇīyāt

2.8.4

यस्य त इति गुरुर् भैक्षम् आदाय सुश्रव इति प्रोक्षयति

yasya ta iti gurur bhaikṣam ādāya suśrava iti prokṣayati

2.8.5

हविषापूपलाजसमायुतेन मिन्दाहुती हुत्वान्तहोमो हूयते

haviṣāpūpalājasamāyutena mindāhutī hutvāntahomo hūyate

2.8.6

मौनव्रतेना संध्यागमात्तिष्ठति

maunavratenā saṃdhyāgamāttiṣṭhati

2.8.7

तस्मा आश्रमधर्माण्याचक्षीत

tasmā āśramadharmāṇyācakṣīta

2.8.8

चोदितातिक्रमे दण्डेन न हन्याद्दुष्टवाक्यैर्न शपत्य् अतिक्रमानुरूपं कृच्छ्रमादिशति

coditātikrame daṇḍena na hanyādduṣṭavākyairna śapaty atikramānurūpaṃ kṛcchramādiśati

2.8.9

गुरुणा शिष्यो रक्षितव्यो यस्माच्छिष्यकृतं दुरितं प्राप्नोत्य् अवश्यम् अकुर्वन्तं शिष्यं त्यजति

guruṇā śiṣyo rakṣitavyo yasmācchiṣyakṛtaṃ duritaṃ prāpnoty avaśyam akurvantaṃ śiṣyaṃ tyajati

2.8.10

अन्यथा त्यागे पत्नीपुत्रशिष्याणां पतति

anyathā tyāge patnīputraśiṣyāṇāṃ patati

2.8.11

काषायाजिनयोरन्यतरवासा जटी शिखी वा मेखली दण्डी सूत्राजिनधारी ब्रह्मचारी शुचिर् अक्षारलवणाशी यथोक्तेषु वर्णेषु ब्रह्मचारिधर्माण्यनुतिष्ठतीति विज्ञायते

kāṣāyājinayoranyataravāsā jaṭī śikhī vā mekhalī daṇḍī sūtrājinadhārī brahmacārī śucir akṣāralavaṇāśī yathokteṣu varṇeṣu brahmacāridharmāṇyanutiṣṭhatīti vijñāyate

2.9.1

अथ पारायणव्रतानि

atha pārāyaṇavratāni

2.9.2

चतुर्थे पञ्चमे सप्तमे वा पुण्ये पुंनाम्नि नक्षत्रे शिष्यम् आचान्तं पुण्याहं वाचयित्वाग्निं परिस्तीर्य प्राङ्मुखम् उपवेशयति

caturthe pañcame saptame vā puṇye puṃnāmni nakṣatre śiṣyam ācāntaṃ puṇyāhaṃ vācayitvāgniṃ paristīrya prāṅmukham upaveśayati

2.9.3

तस्योत्तरे माता ब्रह्मचारी वासीत

tasyottare mātā brahmacārī vāsīta

2.9.4

धातादिपूर्वं सावित्रव्रतसूक्तम् अग्ने वायव् इन्द्रादित्य व्रतानाम् इत्य् ऊहित्वाचारिषं विसर्जयामीति सावित्रव्रतविसर्गं हुत्वा पूर्वाणि सूत्रदण्डादीन्य् अप्सु विसृज्य स्नाताय नवान्युपवीतादीनि पूर्ववद् दत्त्वा तम् अद्भिर् अभ्युक्ष्य दक्षिणे निवेश्य धातादिपूर्वं प्रजापतये काण्डर्षये सदसस्पतिं प्रजापते न त्वद् रयीणां पतिं प्रजापते त्वं निधिपास् तवेमे लोकाः प्रजापतिं प्रथमं यो राय इत्य् अग्न्यादिषु पञ्चसु प्राजापत्यम् इत्य् उभयत्रोहित्वा वार्षिकं प्राजापत्यव्रतबन्धं हुत्वा शिष्येण व्रतं बन्धयति वर्षे वर्षे

dhātādipūrvaṃ sāvitravratasūktam agne vāyav indrāditya vratānām ity ūhitvācāriṣaṃ visarjayāmīti sāvitravratavisargaṃ hutvā pūrvāṇi sūtradaṇḍādīny apsu visṛjya snātāya navānyupavītādīni pūrvavad dattvā tam adbhir abhyukṣya dakṣiṇe niveśya dhātādipūrvaṃ prajāpataye kāṇḍarṣaye sadasaspatiṃ prajāpate na tvad rayīṇāṃ patiṃ prajāpate tvaṃ nidhipās taveme lokāḥ prajāpatiṃ prathamaṃ yo rāya ity agnyādiṣu pañcasu prājāpatyam ity ubhayatrohitvā vārṣikaṃ prājāpatyavratabandhaṃ hutvā śiṣyeṇa vrataṃ bandhayati varṣe varṣe

2.9.5

तथैव व्रतविसर्गं हुत्वा तत् तद् व्रतं विसृज्यान्यद्व्रतं बध्नाति

tathaiva vratavisargaṃ hutvā tat tad vrataṃ visṛjyānyadvrataṃ badhnāti