2.5.5

स्नात्वाचान्तं पुण्याहं वाचयित्वा भुक्तवन्तम् आसयति दक्षिणे कुमारम्

snātvācāntaṃ puṇyāhaṃ vācayitvā bhuktavantam āsayati dakṣiṇe kumāram

2.5.6

अथ परिस्तीर्यायुर्दा अग्न आयुर्दा देवेति प्रधानं पञ्च वारुणं व्याहृतिपर्यन्तं जुहोति

atha paristīryāyurdā agna āyurdā deveti pradhānaṃ pañca vāruṇaṃ vyāhṛtiparyantaṃ juhoti

2.5.7

आतिष्ठेति वायव्याम् अश्म पादाङ्गुष्ठेन दक्षिणेन स्पर्शयति

ātiṣṭheti vāyavyām aśma pādāṅguṣṭhena dakṣiṇena sparśayati

2.5.8

या अकृन्तन्निति वस्त्रम् इयम् दुरुक्तादिति मेखलां परीदम् इत्य् उत्तरीयं यज्ञोपवीतमित्युपवीतं मित्रस्य चक्षुरिति कृष्णाजिनं तस्मै ददाति

yā akṛntanniti vastram iyam duruktāditi mekhalāṃ parīdam ity uttarīyaṃ yajñopavītamityupavītaṃ mitrasya cakṣuriti kṛṣṇājinaṃ tasmai dadāti

2.6.1

ततो विधिवदाचमनं कारयित्वा सदस्याननुज्ञाप्य देवस्य त्वेति बाहू आलभ्योत्तरे प्राङ्मुखः प्राङ्मुखम् उपनयीत

tato vidhivadācamanaṃ kārayitvā sadasyānanujñāpya devasya tveti bāhū ālabhyottare prāṅmukhaḥ prāṅmukham upanayīta

2.6.2

आयुष् टे विश्वत इति दक्षिणपाणिं गृहीत्वोद्धरति

āyuṣ ṭe viśvata iti dakṣiṇapāṇiṃ gṛhītvoddharati

2.6.3

अग्निष् टे हस्तम् अग्रभीदिति विसर्जति

agniṣ ṭe hastam agrabhīditi visarjati

2.6.4

असाव् अपो ऽशानेत्य् आचारं मम हृदय इति तस्य हृदयस्पर्शनं कृत्वा भूर्भुवः सुवः सुप्रजा इति प्रशंसति

asāv apo 'śānety ācāraṃ mama hṛdaya iti tasya hṛdayasparśanaṃ kṛtvā bhūrbhuvaḥ suvaḥ suprajā iti praśaṃsati

2.6.5

भूर् ऋक्षु त्वेति भुवो यजुःषु त्वेति सुवः सामसु त्वेतीष्टुतस्त इत्य् अनलस्य त इतीदं वत्स्याव इति षड्भिः कर्णे जपित्वा नाम शर्मान्तं कुर्यात्

bhūr ṛkṣu tveti bhuvo yajuḥṣu tveti suvaḥ sāmasu tvetīṣṭutasta ity analasya ta itīdaṃ vatsyāva iti ṣaḍbhiḥ karṇe japitvā nāma śarmāntaṃ kuryāt

2.6.6

अग्निर् आयुष्मान् इत्यादिकैः पञ्चभिर् दक्षिणहस्ते कनिष्ठाद्यङ्गुल्यग्राणि पर्यायेण विसृजेद् आयुर्दा इति दक्षिणे कर्णे प्रतिष्ठ वायाविति वामे च जपति

agnir āyuṣmān ityādikaiḥ pañcabhir dakṣiṇahaste kaniṣṭhādyaṅgulyagrāṇi paryāyeṇa visṛjed āyurdā iti dakṣiṇe karṇe pratiṣṭha vāyāviti vāme ca japati

2.6.7

स्वस्ति देवेत्यग्निं प्रदक्षिणं कारयित्वा दक्षिणे निवेश्य राष्ट्रभृद् असीति कूर्चं दत्त्वा शं नो देवीर् इति प्रोक्ष्य मूलहोमं व्याहृतिपर्यन्तं जुहोति

svasti devetyagniṃ pradakṣiṇaṃ kārayitvā dakṣiṇe niveśya rāṣṭrabhṛd asīti kūrcaṃ dattvā śaṃ no devīr iti prokṣya mūlahomaṃ vyāhṛtiparyantaṃ juhoti

2.6.8

अदितिस् ते कक्ष्यामिति हुतशेषं भोजयित्वा योगे योगे तवस्तरम् इत्य् आचमनं ददाति

aditis te kakṣyāmiti hutaśeṣaṃ bhojayitvā yoge yoge tavastaram ity ācamanaṃ dadāti

2.6.9

शतम् इन् न्व् इत्यादित्यं नमस्कृत्यागन्त्रा समगन्महीति प्रदक्षिणं कारयित्वा शकाय त्वेत्य् उत्तमाङ्गम् अभिमृश्याधीहि भो इति तेन प्रार्थितो गुरुरथाह सावित्रीं भो इति शिष्यम् अनुशास्ति

śatam in nv ityādityaṃ namaskṛtyāgantrā samaganmahīti pradakṣiṇaṃ kārayitvā śakāya tvety uttamāṅgam abhimṛśyādhīhi bho iti tena prārthito gururathāha sāvitrīṃ bho iti śiṣyam anuśāsti

2.6.10

गणानां त्वेति गणमुख्यमोजो ऽसीति सावित्रीं पावका नः सरस्वतीति सरस्वतीं च प्रणम्य यथोक्तं सावित्रीं पच्छो ऽर्धर्चशो व्यस्तां समस्तामध्यापयेत्

gaṇānāṃ tveti gaṇamukhyamojo 'sīti sāvitrīṃ pāvakā naḥ sarasvatīti sarasvatīṃ ca praṇamya yathoktaṃ sāvitrīṃ paccho 'rdharcaśo vyastāṃ samastāmadhyāpayet

2.7.1

धातादिपूर्वं सवित्रे काण्डर्षये सदसस्पतिम् आ देवो यात्व् अभीवृतं स घा नो वि जनाञ्छ्यावा वि सुपर्णो भगं धियमिति सावित्रव्रतसूक्तम् अग्ने वायव् इन्द्रादित्य व्रतानामिति सावित्रव्रतबन्धं पञ्चभिर् व्याहृत्यन्तं जुहोति

dhātādipūrvaṃ savitre kāṇḍarṣaye sadasaspatim ā devo yātv abhīvṛtaṃ sa ghā no vi janāñchyāvā vi suparṇo bhagaṃ dhiyamiti sāvitravratasūktam agne vāyav indrāditya vratānāmiti sāvitravratabandhaṃ pañcabhir vyāhṛtyantaṃ juhoti

2.7.2

अग्नये समिधमिति द्वे अग्नये समिधाविति चत्वार्य् अग्नये समिध इति सप्त पालाशाङ्कुराणि घृताक्तानि जुहोति

agnaye samidhamiti dve agnaye samidhāviti catvāry agnaye samidha iti sapta pālāśāṅkurāṇi ghṛtāktāni juhoti

2.7.3

सूर्य एष ते पुत्र इत्यादित्यं दर्शयति

sūrya eṣa te putra ityādityaṃ darśayati

2.7.4

अष्टाभिः समिद्भिर् होमकर्मणि शिष्यं योजयेत्

aṣṭābhiḥ samidbhir homakarmaṇi śiṣyaṃ yojayet

2.7.5

यथा हेति दक्षिणादिप्रदक्षिणं वेदिं परिमृज्य पूर्ववत्परिस्तृणाति व्याहृतीर् एषा ते मेधां म इन्द्रो ददात्व् अप्सरास्व् आ मां मेधेत्यष्टौ जुहोति

yathā heti dakṣiṇādipradakṣiṇaṃ vediṃ parimṛjya pūrvavatparistṛṇāti vyāhṛtīr eṣā te medhāṃ ma indro dadātv apsarāsv ā māṃ medhetyaṣṭau juhoti

2.7.6

यथा हेति तथा परिमृज्य प्रासावीर् इत्यन्तैश् चतुर्भिः प्रवाहणं कृत्वा भूतिः स्मेति भस्मालिप्यापो हि ष्ठेति प्रोक्ष्य यत्ते अग्ने तेजस् तेनेत्य् अग्निम् उद् वयम् इत्यादित्यं चोपतिष्ठेत

yathā heti tathā parimṛjya prāsāvīr ityantaiś caturbhiḥ pravāhaṇaṃ kṛtvā bhūtiḥ smeti bhasmālipyāpo hi ṣṭheti prokṣya yatte agne tejas tenety agnim ud vayam ityādityaṃ copatiṣṭheta

Vaikhānasagṛhyasūtra