2.3.3

तेषाम् उद्दालकप्रायश्चित्तम्

teṣām uddālakaprāyaścittam

2.3.4

द्वौ मासौ यावकेन मासं क्षीरेणामिक्षयार्धमासमष्टरात्रं घृतेनायाचितं षड्रात्रं त्रिरात्रम् उदकेनोपवासम् अहोरात्रं वर्तत इत्य् एतद् उद्दालकम्

dvau māsau yāvakena māsaṃ kṣīreṇāmikṣayārdhamāsamaṣṭarātraṃ ghṛtenāyācitaṃ ṣaḍrātraṃ trirātram udakenopavāsam ahorātraṃ vartata ity etad uddālakam

2.3.5

अनेन वाश्वमेधावभृथस्नानेन वा व्रात्यस्तोमेन वेष्ट्वा पुनर्गर्भाधानादिसंस्कारान्कृत्वा शुद्धा उपनेयाः सावित्रीपतिता भवन्तीति विज्ञायते

anena vāśvamedhāvabhṛthasnānena vā vrātyastomena veṣṭvā punargarbhādhānādisaṃskārānkṛtvā śuddhā upaneyāḥ sāvitrīpatitā bhavantīti vijñāyate

2.4.1

ब्राह्मणस्य पालाशो बैल्वो वा केशान्तो निर्व्रणो ऽनुमृष्टो ऽनुद्वेजनो यूपवद् अवक्रो दण्डः कृष्णमृगस्याजिनं मौञ्जी मेखला

brāhmaṇasya pālāśo bailvo vā keśānto nirvraṇo 'numṛṣṭo 'nudvejano yūpavad avakro daṇḍaḥ kṛṣṇamṛgasyājinaṃ mauñjī mekhalā

2.4.2

क्षत्रियस्य नैयग्रोधो ललाटान्तो दण्डो रौरवमजिनं मौर्वी मेखला

kṣatriyasya naiyagrodho lalāṭānto daṇḍo rauravamajinaṃ maurvī mekhalā

2.4.3

वैश्यस्यौदुम्बरो नासिकान्तो दण्डो बास्तवम् अजिनं शाणी मेखला

vaiśyasyaudumbaro nāsikānto daṇḍo bāstavam ajinaṃ śāṇī mekhalā

2.4.4

ॐ भूर्भुवः सुवस् तत्सवितुरिति सावित्री ॐ भूर्भुवः सुवस् तत् सवितुर् आपो ज्योती रस इति प्राणायाम ॐ भूर्भुवः सुवः स्वाहेति व्याहृतिः

oṃ bhūrbhuvaḥ suvas tatsavituriti sāvitrī oṃ bhūrbhuvaḥ suvas tat savitur āpo jyotī rasa iti prāṇāyāma oṃ bhūrbhuvaḥ suvaḥ svāheti vyāhṛtiḥ

2.4.5

अग्नये समिधमिति द्वे अग्नये समिधाविति चत्वार्यग्नये समिध इति समिदाधानमेतानि ब्राह्मणस्य

agnaye samidhamiti dve agnaye samidhāviti catvāryagnaye samidha iti samidādhānametāni brāhmaṇasya

2.4.6

ॐ भूर्भुवस्तत्सवितुरिति सावित्री

oṃ bhūrbhuvastatsavituriti sāvitrī

2.4.7

ॐ भूर्भुवस्तत्सवितुस्तेजो ज्योती रस इति प्राणायामः

oṃ bhūrbhuvastatsavitustejo jyotī rasa iti prāṇāyāmaḥ

2.4.8

ॐ भूर्भुवः स्वाहेति व्याहृतिः

oṃ bhūrbhuvaḥ svāheti vyāhṛtiḥ

2.4.9

अग्नये समिधमिति द्वे अग्नये समिधाविति समिदाधानमेतानि क्षत्रियस्य

agnaye samidhamiti dve agnaye samidhāviti samidādhānametāni kṣatriyasya

2.4.10

ॐ भूस्तत्सवितुरिति सावित्री

oṃ bhūstatsavituriti sāvitrī

2.4.11

ॐ भूस्तत्सवितुरग्निर्ज्योती रस इति प्राणायामः

oṃ bhūstatsavituragnirjyotī rasa iti prāṇāyāmaḥ

2.4.12

ॐ भूः स्वाहेति व्याहृतिः

oṃ bhūḥ svāheti vyāhṛtiḥ

2.4.13

अग्नये समिधमिति समिदाधानमेतानि वैश्यस्य भवन्ति

agnaye samidhamiti samidādhānametāni vaiśyasya bhavanti

2.5.1

प्रोष्ठपदहस्ताव् अश्विन्यनूराधापूर्वोत्तरपुनर्वसू मृगशिरो वा यावन्ति पुंनामानि नक्षत्राणि तत्राग्नेर् वायव्याम् उपवीताजिनमेखलाहतवस्त्रदण्डशरावाश्मसमिद्दर्भादिसम्भारान् दर्भेषु संभृत्य सं च त्वे जग्मुरिति प्रोक्षयति

proṣṭhapadahastāv aśvinyanūrādhāpūrvottarapunarvasū mṛgaśiro vā yāvanti puṃnāmāni nakṣatrāṇi tatrāgner vāyavyām upavītājinamekhalāhatavastradaṇḍaśarāvāśmasamiddarbhādisambhārān darbheṣu saṃbhṛtya saṃ ca tve jagmuriti prokṣayati

2.5.2

अथाज्येनाघारं हुत्वाचान्तं मङ्गलयुक्तं कुमारम् आसयित्वाग्नेर् नैरृत्यां मस्तके दर्भौ प्रागुत्तराग्रौ विन्यस्य सरोमाणं दर्भम् इन्द्र शस्त्रमिति चतुर्भिः प्रदक्षिणं चतुर्दिशं छित्त्वा येनावपद्यत्क्षुरेणेति सर्वतो वपति नाधो जत्रोः

athājyenāghāraṃ hutvācāntaṃ maṅgalayuktaṃ kumāram āsayitvāgner nairṛtyāṃ mastake darbhau prāguttarāgrau vinyasya saromāṇaṃ darbham indra śastramiti caturbhiḥ pradakṣiṇaṃ caturdiśaṃ chittvā yenāvapadyatkṣureṇeti sarvato vapati nādho jatroḥ

2.5.3.2

गोशकृद्युक्ते शरावे केशान्गृह्णीयात्

gośakṛdyukte śarāve keśāngṛhṇīyāt

2.5.4

यत्र मौण्ड्यं शिखाभ्रूवर्जम् आ नखं वपति

yatra mauṇḍyaṃ śikhābhrūvarjam ā nakhaṃ vapati

Vaikhānasagṛhyasūtra