18.7

प्रत्येकं मातृकायुग्मवर्णैस्तत्त्वानि शोधयेत्

pratyekaṃ mātṛkāyugmavarṇaistattvāni śodhayet

18.7.2

यदि वा पिण्डमन्त्रेण सर्वमन्त्रेष्वयं विधिः

yadi vā piṇḍamantreṇa sarvamantreṣvayaṃ vidhiḥ

18.8

यथा यथा च स्वभ्यस्तज्ञानस्तन्मयतात्मकः

yathā yathā ca svabhyastajñānastanmayatātmakaḥ

18.8.2

गुरुस्तथा तथा कुर्यात् संक्षिप्तं कर्म नान्यथा

gurustathā tathā kuryāt saṃkṣiptaṃ karma nānyathā

18.9

श्रीब्रह्मयामले चोक्तं संक्षिप्ते ऽपि हि भावयेत्

śrībrahmayāmale coktaṃ saṃkṣipte 'pi hi bhāvayet

18.9.2

व्याप्तिं सर्वाध्वसामान्यां किंतु यागे न विस्तरः

vyāptiṃ sarvādhvasāmānyāṃ kiṃtu yāge na vistaraḥ

18.10

अतन्मयीभूतमिति विक्षिप्तं कर्म संदधत्

atanmayībhūtamiti vikṣiptaṃ karma saṃdadhat

18.10.2

क्रमात्तादात्म्यमेतीति विक्षिप्तं विधिमाचरेत्

kramāttādātmyametīti vikṣiptaṃ vidhimācaret

18.11

संक्षिप्तो विधिरुक्तो ऽयं कृपया यः शिवोदितः

saṃkṣipto vidhirukto 'yaṃ kṛpayā yaḥ śivoditaḥ

18.11.2

दीक्षोत्तरे कैरणे च तत्र तत्रापि शासने

dīkṣottare kairaṇe ca tatra tatrāpi śāsane

19.1

अथ सद्यःसमुत्क्रान्तिप्रदा दीक्षा निरूप्यते

atha sadyaḥsamutkrāntipradā dīkṣā nirūpyate

19.1.2

तत्क्षणाच्चोपभोगाद्वा देहपाते शिवं व्रजेत्

tatkṣaṇāccopabhogādvā dehapāte śivaṃ vrajet

19.1.3

इत्युक्त्या मालिनीशास्त्रे सूचितासौ महेशिना

ityuktyā mālinīśāstre sūcitāsau maheśinā

19.2

देहपाते समीपस्थे शक्तिपातस्फुटत्वतः

dehapāte samīpasthe śaktipātasphuṭatvataḥ

19.2.2

आसाद्य शांकरीं दीक्षां तस्माद्दीक्षाक्षणात्परम्

āsādya śāṃkarīṃ dīkṣāṃ tasmāddīkṣākṣaṇātparam

19.3

शिवं व्रजेदित्यर्थो ऽत्र पूर्वापरविवेचनात्

śivaṃ vrajedityartho 'tra pūrvāparavivecanāt

19.3.2

व्याख्यातः श्रीमतास्माकं गुरुणा शम्भुमूर्तिना

vyākhyātaḥ śrīmatāsmākaṃ guruṇā śambhumūrtinā

19.4

यदा ह्यासन्नमरणे शक्तिपातः प्रजायते

yadā hyāsannamaraṇe śaktipātaḥ prajāyate

19.4.2

तत्र मन्दे ऽथ गुर्वादिसेवयायुः क्षयं व्रजेत्

tatra mande 'tha gurvādisevayāyuḥ kṣayaṃ vrajet

19.5

अथवा बन्धुमित्रादिद्वारा सास्य विभोः पतेत्

athavā bandhumitrādidvārā sāsya vibhoḥ patet

Tantrāloka