6.55.2

विपर्ययो ऽपि प्राणात्मशक्तीनां मुख्यतां प्रति

viparyayo 'pi prāṇātmaśaktīnāṃ mukhyatāṃ prati

6.56

वामा संसारिणामीशा प्रभुशक्तिर्विधायिनी

vāmā saṃsāriṇāmīśā prabhuśaktirvidhāyinī

6.56.2

ज्येष्ठा तु सुप्रबुद्धानां बुभुत्सूनां च रौद्रिका

jyeṣṭhā tu suprabuddhānāṃ bubhutsūnāṃ ca raudrikā

6.57

वामा संसारवमना ज्येष्ठा शिवमयी यतः

vāmā saṃsāravamanā jyeṣṭhā śivamayī yataḥ

6.57.2

द्रावयित्री रुजां रौद्री रोद्ध्री चाखिलकर्मणाम्

drāvayitrī rujāṃ raudrī roddhrī cākhilakarmaṇām

6.58

सृष्ट्यादितत्त्वम् अज्ञात्वा न मुक्तो नापि मोचयेत्

sṛṣṭyāditattvam ajñātvā na mukto nāpi mocayet

6.58.2

उक्तं च श्रीयोगचारे मोक्षः सर्वप्रकाशनात्

uktaṃ ca śrīyogacāre mokṣaḥ sarvaprakāśanāt

6.59

उत्पत्तिस्थितिसंहारान् ये न जानन्ति योगिनः

utpattisthitisaṃhārān ye na jānanti yoginaḥ

6.59.2

न मुक्तास्ते तदज्ञानबन्धनैकाधिवासिताः

na muktāste tadajñānabandhanaikādhivāsitāḥ

6.60

सृष्ट्यादयश्च ते सर्वे कालाधीना न संशयः

sṛṣṭyādayaśca te sarve kālādhīnā na saṃśayaḥ

6.60.2

स च प्राणात्मकस्तस्मादुच्चारः कथ्यते स्फुटः

sa ca prāṇātmakastasmāduccāraḥ kathyate sphuṭaḥ

6.61

हृदयात्प्राणचारश्च नासिक्यद्वादशान्ततः

hṛdayātprāṇacāraśca nāsikyadvādaśāntataḥ

6.61.2

षट्त्रिंशदङ्गुलो जन्तोः सर्वस्य स्वाङ्गुलक्रमात्

ṣaṭtriṃśadaṅgulo jantoḥ sarvasya svāṅgulakramāt

6.62

क्षोदिष्ठे वा महिष्ठे वा देहे तादृश एव हि

kṣodiṣṭhe vā mahiṣṭhe vā dehe tādṛśa eva hi

6.62.2

वीर्यमोजो बलं स्पन्दः प्राणचारः समं ततः

vīryamojo balaṃ spandaḥ prāṇacāraḥ samaṃ tataḥ

6.63

षट्त्रिंशदङ्गुले चारे यद्गमागमयुग्मकम्

ṣaṭtriṃśadaṅgule cāre yadgamāgamayugmakam

6.63.2

नालिकातिथिमासाब्दतत्सङ्घो ऽत्र स्फुटं स्थितः

nālikātithimāsābdatatsaṅgho 'tra sphuṭaṃ sthitaḥ

6.64

तुटिः सपादाङ्गुलयुक्प्राणस्ताः षोडशोच्छ्वसन्

tuṭiḥ sapādāṅgulayukprāṇastāḥ ṣoḍaśocchvasan

6.64.2

निःश्वसंश्चात्र चषकः सपञ्चांशे ऽङ्गुले ऽङ्गुले

niḥśvasaṃścātra caṣakaḥ sapañcāṃśe 'ṅgule 'ṅgule

6.65

श्वासप्रश्वासयोर्नाली प्रोक्ताहोरात्र उच्यते

śvāsapraśvāsayornālī proktāhorātra ucyate

Tantrāloka