5.35

तत्संविदि ततः संविद्विलीनार्थैव भासते

tatsaṃvidi tataḥ saṃvidvilīnārthaiva bhāsate

5.35.2

चित्स्वाभाव्यात् ततो भूयः सृष्टिर्यच्चिन्महेश्वरी

citsvābhāvyāt tato bhūyaḥ sṛṣṭiryaccinmaheśvarī

5.36

एवं प्रतिक्षणं विश्वं स्वसंविदि विलापयन्

evaṃ pratikṣaṇaṃ viśvaṃ svasaṃvidi vilāpayan

5.36.2

विसृजंश्च ततो भूयः शश्वद्भैरवतां व्रजेत्

visṛjaṃśca tato bhūyaḥ śaśvadbhairavatāṃ vrajet

5.37

एवं त्रिशूलात् प्रभृति चतुष्पञ्चारकक्रमात्

evaṃ triśūlāt prabhṛti catuṣpañcārakakramāt

5.37.2

पञ्चाशदरपर्यन्तं चक्रं योगी विभावयेत्

pañcāśadaraparyantaṃ cakraṃ yogī vibhāvayet

5.38

चतुष्षष्टिशतारं वा सहस्रारम् अथापि वा

catuṣṣaṣṭiśatāraṃ vā sahasrāram athāpi vā

5.38.2

असंख्यारसहस्रं वा चक्रं ध्यायेद् अनन्यधीः

asaṃkhyārasahasraṃ vā cakraṃ dhyāyed ananyadhīḥ

5.39

संविन्नाथस्य महतो देवस्योल्लासिसंविदः

saṃvinnāthasya mahato devasyollāsisaṃvidaḥ

5.39.2

नैवास्ति काचित्कलना विश्वशक्तेर्महेशितुः

naivāsti kācitkalanā viśvaśaktermaheśituḥ

5.40

शक्तयो ऽस्य जगत् कृत्स्नं शक्तिमांस्तु महेश्वरः

śaktayo 'sya jagat kṛtsnaṃ śaktimāṃstu maheśvaraḥ

5.40.2

इति माङ्गलशास्त्रे तु श्रीश्रीकण्ठो न्यरूपयत्

iti māṅgalaśāstre tu śrīśrīkaṇṭho nyarūpayat

5.41

इत्येतत् प्रथमोपायरूपं ध्यानं न्यरूपयत्

ityetat prathamopāyarūpaṃ dhyānaṃ nyarūpayat

5.41.2

श्रीशंभुनाथो मे तुष्टस्तस्मै श्रीसुमतिप्रभुः

śrīśaṃbhunātho me tuṣṭastasmai śrīsumatiprabhuḥ

5.42

अनयैव दिशान्यानि ध्यानान्यपि समाश्रयेत्

anayaiva diśānyāni dhyānānyapi samāśrayet

5.42.2

अनुत्तरोपायधुरां यान्यायान्ति क्रमं विना

anuttaropāyadhurāṃ yānyāyānti kramaṃ vinā

5.43

अथ प्राणस्य या वृत्तिः प्राणनाद्या निरूपिता

atha prāṇasya yā vṛttiḥ prāṇanādyā nirūpitā

5.43.2

तदुपायतया ब्रूमो ऽनुत्तरप्रविकासनम्

tadupāyatayā brūmo 'nuttarapravikāsanam

5.44

निजानन्दे प्रमात्रंशमात्रे हृदि पुरा स्थितः

nijānande pramātraṃśamātre hṛdi purā sthitaḥ

5.44.2

शून्यतामात्रविश्रान्तेर्निरानन्दं विभावयेत्

śūnyatāmātraviśrānternirānandaṃ vibhāvayet

Tantrāloka