2.17.2

तस्यानशनं दीक्षा स्थानम् उपसद आसनं सुत्या वाग् जुहूर् मन उपभृद् धृतिर् ध्रुवा प्राणो हविः सामाध्वर्युः स वा एष यज्ञः प्राणदक्षिणो ऽनन्तदक्षिणः समृद्धतरः

tasyānaśanaṃ dīkṣā sthānam upasada āsanaṃ sutyā vāg juhūr mana upabhṛd dhṛtir dhruvā prāṇo haviḥ sāmādhvaryuḥ sa vā eṣa yajñaḥ prāṇadakṣiṇo 'nantadakṣiṇaḥ samṛddhataraḥ

2.18.1

कतिधावकीर्णी प्रविशति चतुर्धेत्य् आहुर् ब्रह्मवादिनो मरुतः प्राणैर् इन्द्रं बलेन बृहस्पतिं ब्रह्मवर्चसेनाग्निम् एवेतरेण सर्वेण तस्यैतां प्रायश्चित्तिं विदांचकार सुदेवः काश्यपः

katidhāvakīrṇī praviśati caturdhety āhur brahmavādino marutaḥ prāṇair indraṃ balena bṛhaspatiṃ brahmavarcasenāgnim evetareṇa sarveṇa tasyaitāṃ prāyaścittiṃ vidāṃcakāra sudevaḥ kāśyapaḥ

2.18.2

यो ब्रह्मचार्यवकिरेद् अमावास्यायां रात्र्याम् अग्निं प्रणीयोपसमाधाय द्विर् आज्यस्योपघातं जुहोति कामावकीर्णो ऽस्म्य् अवकीर्णो ऽस्मि काम कामाय स्वाहा कामाभिद्रुग्धो ऽस्म्य् अभिद्रुग्धो ऽस्मि काम कामाय स्वाहेत्य् अमृतं वा आज्यम् अमृतम् एवात्मन् धत्ते

yo brahmacāryavakired amāvāsyāyāṃ rātryām agniṃ praṇīyopasamādhāya dvir ājyasyopaghātaṃ juhoti kāmāvakīrṇo 'smy avakīrṇo 'smi kāma kāmāya svāhā kāmābhidrugdho 'smy abhidrugdho 'smi kāma kāmāya svāhety amṛtaṃ vā ājyam amṛtam evātman dhatte

2.18.3

हुत्वा प्रयताञ्जलिः कवातिर्यङ्ङ् अग्निम्

hutvā prayatāñjaliḥ kavātiryaṅṅ agnim

2.18.4

सं मा सिञ्चन्तु मरुतः सम् इन्द्रः सं बृहस्पतिः

saṃ mā siñcantu marutaḥ sam indraḥ saṃ bṛhaspatiḥ

2.18.4.2

सं मायम् अग्निः सिञ्चत्व् आयुषा च बलेन चायुष्मन्तं करोत

saṃ māyam agniḥ siñcatv āyuṣā ca balena cāyuṣmantaṃ karota

2.18.5

प्रति हास्मै मरुतः प्राणान् दधति प्रतीन्द्रो बलं प्रति बृहस्पतिर् ब्रह्मवर्चसं प्रत्य् अग्निर् इतरः सर्वं सर्वतनुर् भूत्वा सर्वम् आयुर् एति

prati hāsmai marutaḥ prāṇān dadhati pratīndro balaṃ prati bṛhaspatir brahmavarcasaṃ praty agnir itaraḥ sarvaṃ sarvatanur bhūtvā sarvam āyur eti

2.18.6

त्रिर् अभिमन्त्रयेत त्रिषत्या हि देवाः

trir abhimantrayeta triṣatyā hi devāḥ

2.18.7

यो ऽपूत इव मन्येत स इत्थं जुहुयाद् इत्थम् अभिमन्त्रयेत पुनीत एवात्मानम् आयुर् एवात्मन् धत्ते

yo 'pūta iva manyeta sa itthaṃ juhuyād ittham abhimantrayeta punīta evātmānam āyur evātman dhatte

2.18.8

वरो दक्षिणा वरेणैव वरं स्पृणोत्य् आत्मा हि वरः

varo dakṣiṇā vareṇaiva varaṃ spṛṇoty ātmā hi varaḥ

2.19.1

भूः प्रपद्ये भुवः प्रपद्ये स्वः प्रपद्ये भूर् भुवः स्वः प्रपद्ये ब्रह्म प्रपद्ये ब्रह्मकोशं प्रपद्ये ऽमृतं प्रपद्ये ऽमृतकोशं प्रपद्ये चतुर्जालं ब्रह्मकोशं यं मृत्युर् नावपश्यति तं प्रपद्ये देवान् प्रपद्ये देवपुरं प्रपद्ये परिवृतो वरीवृतो ब्रह्मणा वर्मणाहं तेजसा कश्यपस्य

bhūḥ prapadye bhuvaḥ prapadye svaḥ prapadye bhūr bhuvaḥ svaḥ prapadye brahma prapadye brahmakośaṃ prapadye 'mṛtaṃ prapadye 'mṛtakośaṃ prapadye caturjālaṃ brahmakośaṃ yaṃ mṛtyur nāvapaśyati taṃ prapadye devān prapadye devapuraṃ prapadye parivṛto varīvṛto brahmaṇā varmaṇāhaṃ tejasā kaśyapasya

2.19.2

यस्मै नमस् तच्छिरो धर्मो मूर्धानं ब्रह्मोत्तरा हनुर् यज्ञो ऽधरा विष्णुर् हृदयं संवत्सरः प्रजननम् अश्विनौ पूर्वपादाव् अत्रिर् मध्यं मित्रावरुणाव् अपरपादाव् अग्निः पुच्छस्य प्रथमं काण्डं तत इन्द्रस् ततः प्रजापतिर् अभयं चतुर्थम्

yasmai namas tacchiro dharmo mūrdhānaṃ brahmottarā hanur yajño 'dharā viṣṇur hṛdayaṃ saṃvatsaraḥ prajananam aśvinau pūrvapādāv atrir madhyaṃ mitrāvaruṇāv aparapādāv agniḥ pucchasya prathamaṃ kāṇḍaṃ tata indras tataḥ prajāpatir abhayaṃ caturtham

2.19.3

स वा एष दिव्यः शाक्वरः शिशुमारस् तं ह

sa vā eṣa divyaḥ śākvaraḥ śiśumāras taṃ ha

2.19.4

य एवं वेदाप पुनर् मृत्युं जयति जयति स्वर्गं लोकं नाध्वनि प्रमीयते नाग्नौ प्रमीयते नाप्सु प्रमीयते नानपत्यः प्रमीयते लब्धान्नो भवति

ya evaṃ vedāpa punar mṛtyuṃ jayati jayati svargaṃ lokaṃ nādhvani pramīyate nāgnau pramīyate nāpsu pramīyate nānapatyaḥ pramīyate labdhānno bhavati

2.19.5

ध्रुवस् त्वम् असि ध्रुवस्य क्षितम् असि त्वं भूतानाम् अधिपतिर् असि त्वं भूतानां श्रेष्ठो ऽसि त्वां भूतान्य् उपपर्यावर्तन्ते नमस् ते नमः सर्वं ते नमो नमः शिशुकुमाराय नमः

dhruvas tvam asi dhruvasya kṣitam asi tvaṃ bhūtānām adhipatir asi tvaṃ bhūtānāṃ śreṣṭho 'si tvāṃ bhūtāny upaparyāvartante namas te namaḥ sarvaṃ te namo namaḥ śiśukumārāya namaḥ

2.20.1

नमः प्राच्यै दिशे याश् च देवता एतस्यां प्रतिवसन्त्य् एताभ्यश् च नमः

namaḥ prācyai diśe yāś ca devatā etasyāṃ prativasanty etābhyaś ca namaḥ

2.20.2

नमो दक्षिणायै दिशो याश् च देवता एतस्यां प्रतिवसन्त्य् एताभ्यश् च नमो नमः प्रतीच्यै दिशे याश् च देवता एतस्यां प्रतिवसन्त्य् एताभ्यश् च नमो नम उदीच्यै दिशो याश् च देवता एतस्यां प्रतिवसन्त्य् एताभ्यश् च नमो नम ऊर्ध्वायै दिशे याश् च देवता एतस्यां प्रतिवसन्त्य् एताभ्यश् च नमो नमो ऽधरायै दिशे याश् च देवता एतस्यां प्रतिवसन्त्य् एताभ्यश् च नमो नमो ऽवान्तरायै दिशे याश् च देवता एतस्यां प्रतिवसन्त्य् एताभ्यश् च नमः

namo dakṣiṇāyai diśo yāś ca devatā etasyāṃ prativasanty etābhyaś ca namo namaḥ pratīcyai diśe yāś ca devatā etasyāṃ prativasanty etābhyaś ca namo nama udīcyai diśo yāś ca devatā etasyāṃ prativasanty etābhyaś ca namo nama ūrdhvāyai diśe yāś ca devatā etasyāṃ prativasanty etābhyaś ca namo namo 'dharāyai diśe yāś ca devatā etasyāṃ prativasanty etābhyaś ca namo namo 'vāntarāyai diśe yāś ca devatā etasyāṃ prativasanty etābhyaś ca namaḥ

2.20.3

नमो गङ्गायमुनयोर् मध्ये ये वसन्ति ते मे प्रसन्नात्मानश् चिरं जीवितं वर्धयन्ति नमो गङ्गायमुनयोर् मुनिभ्यश् च नमो नमो गङ्गायमुनयोर् मुनिभ्यश् च नमः

namo gaṅgāyamunayor madhye ye vasanti te me prasannātmānaś ciraṃ jīvitaṃ vardhayanti namo gaṅgāyamunayor munibhyaś ca namo namo gaṅgāyamunayor munibhyaś ca namaḥ

2.20.4

सह रक्षांसि यद् देवाः सप्तदश यद् अदीव्यन् पञ्चदशायुष्टे चतुस्त्रिंशद् वैश्वानराय षड्विंशतिर् वातरशना ह कूश्माण्डैर् अजान् ह पञ्च ब्रह्मयज्ञेन ग्रामे मध्यन्दिने तस्य वै मेघस् तस्य वै द्वौ रिच्यते दुहे ह कतिधावकीर्णी भूर् नमः प्राच्यै विंशतिः

saha rakṣāṃsi yad devāḥ saptadaśa yad adīvyan pañcadaśāyuṣṭe catustriṃśad vaiśvānarāya ṣaḍviṃśatir vātaraśanā ha kūśmāṇḍair ajān ha pañca brahmayajñena grāme madhyandine tasya vai meghas tasya vai dvau ricyate duhe ha katidhāvakīrṇī bhūr namaḥ prācyai viṃśatiḥ

2.20.5

नमो ब्रह्मणे नमो अस्त्व् अग्नये नमः पृथिव्यै नम ओषधीभ्यः

namo brahmaṇe namo astv agnaye namaḥ pṛthivyai nama oṣadhībhyaḥ

Taittirīyāraṇyaka