2.30

सर्वर्तुषु दिवास्वप्नः सोऽपि व्यक्तार्थ एव हि

sarvartuṣu divāsvapnaḥ so'pi vyaktārtha eva hi

2.30.2

बालातिसारिक्षीणेषु स चाजीर्णिषु शोभनः

bālātisārikṣīṇeṣu sa cājīrṇiṣu śobhanaḥ

2.31

त एते सप्तदश च मृगयाष्टादशी तथा

ta ete saptadaśa ca mṛgayāṣṭādaśī tathā

2.31.2

हेयाहेयाः पुरा प्राह भीष्मो धर्मात्मजं यथा

heyāheyāḥ purā prāha bhīṣmo dharmātmajaṃ yathā

2.32

व्यसनानि च सर्वाणि त्यजेथा भूरिदक्षिण

vyasanāni ca sarvāṇi tyajethā bhūridakṣiṇa

2.32.2

न चैव न प्रयुञ्जीत संगं तु परिवर्जयेत्

na caiva na prayuñjīta saṃgaṃ tu parivarjayet

2.33

इत्थमत्र परिचिन्त्य लाघवं गौरवं च गुणयोगतः पृथक्

itthamatra paricintya lāghavaṃ gauravaṃ ca guṇayogataḥ pṛthak

2.33.2

संगमात्रमपहाय योजयेत् रञ्जनाय जगतो यथायथम्

saṃgamātramapahāya yojayet rañjanāya jagato yathāyatham

2.34

इति श्रीरुद्रदेवविरचिते श्यैनिके शास्त्रे व्यसनहेयाहेयतानिरूपणो द्वितीयः परिच्छेदः

iti śrīrudradevaviracite śyainike śāstre vyasanaheyāheyatānirūpaṇo dvitīyaḥ paricchedaḥ

3.1

अथेदानीं मृगव्या तु समासव्यासयोगतः

athedānīṃ mṛgavyā tu samāsavyāsayogataḥ

3.1.2

एकापि चाष्टधा सैषा बहुधात्र निरूप्यते

ekāpi cāṣṭadhā saiṣā bahudhātra nirūpyate

3.2

आमिषाद्यर्थसंसिद्ध्यै नैकोपायैः सुखाय च

āmiṣādyarthasaṃsiddhyai naikopāyaiḥ sukhāya ca

3.2.2

हिंसनं प्राणिमात्रस्य मृगयेति प्रचक्षते

hiṃsanaṃ prāṇimātrasya mṛgayeti pracakṣate

3.3

हिंसनं प्राणिनां यत्र तत्र दोषपरम्परा

hiṃsanaṃ prāṇināṃ yatra tatra doṣaparamparā

3.3.2

यागीयाः पशवः प्रोक्ता ग्राम्यारण्याश्चतुर्दश

yāgīyāḥ paśavaḥ proktā grāmyāraṇyāścaturdaśa

3.4

एषाम् अप्रोक्षितानां च हिंसा दोषाय जायते

eṣām aprokṣitānāṃ ca hiṃsā doṣāya jāyate

3.4.2

अस्मिन् अर्थे पुरा श्लोका यथा द्वैपायनोदिताः

asmin arthe purā ślokā yathā dvaipāyanoditāḥ

3.5

पाण्डुकिन्दमसंवादे मृगहिंसाप्रसंगतः

pāṇḍukindamasaṃvāde mṛgahiṃsāprasaṃgataḥ

3.5.2

शत्रूणां या वधे वृत्तिः सा मृगाणां वधे स्मृता

śatrūṇāṃ yā vadhe vṛttiḥ sā mṛgāṇāṃ vadhe smṛtā

3.6

राज्ञां मृग न मां मोहात् त्वं गर्हयितुमर्हसि

rājñāṃ mṛga na māṃ mohāt tvaṃ garhayitumarhasi

Śyainikaśāstra