3.76

न केवलं मृगव्याया ह्यर्थो मांसार्थमात्रकः

na kevalaṃ mṛgavyāyā hyartho māṃsārthamātrakaḥ

3.76.2

यतो मुक्ताजिनादीनां कस्तूर्यादेः समुद्भवः

yato muktājinādīnāṃ kastūryādeḥ samudbhavaḥ

3.77

दृश्यन्ते हस्तिबन्धाश्च तेन नानार्थसिद्धये

dṛśyante hastibandhāśca tena nānārthasiddhaye

3.77.2

अन्विष्यते प्राणिजातं मृगयेत्युच्यते ततः

anviṣyate prāṇijātaṃ mṛgayetyucyate tataḥ

3.78

अतो नृभिः प्रयुक्तानां तेषां पातोऽत्र कथ्यते

ato nṛbhiḥ prayuktānāṃ teṣāṃ pāto'tra kathyate

3.78.2

तेनाष्टमी मृगव्यैषा श्येनपाता निरूपिता

tenāṣṭamī mṛgavyaiṣā śyenapātā nirūpitā

3.79

एतस्या विशदतया किलाष्ट भेदा निर्दिष्टाः पुनरपरे ह्यवान्तरा ये

etasyā viśadatayā kilāṣṭa bhedā nirdiṣṭāḥ punarapare hyavāntarā ye

3.79.2

ते सर्वे रसजननाय नैकरूपाः कल्प्यन्ते विहितविधानसम्प्रयोगात्

te sarve rasajananāya naikarūpāḥ kalpyante vihitavidhānasamprayogāt

3.80

इति श्रीरुद्रदेवविरचिते श्यैनिके शास्त्रे मृगयाविवेचनस्तृतीयः परिच्छेदः

iti śrīrudradevaviracite śyainike śāstre mṛgayāvivecanastṛtīyaḥ paricchedaḥ

4.1

मोकाद्याचारसम्पन्ना श्यैनलक्षणलक्षिता

mokādyācārasampannā śyainalakṣaṇalakṣitā

4.1.2

विश्रम्भणाद्युपायैश्च विहिता सा निगद्यते

viśrambhaṇādyupāyaiśca vihitā sā nigadyate

4.2

हस्तमुष्टिप्रभेदेन मोको द्विविध उच्यते

hastamuṣṭiprabhedena moko dvividha ucyate

4.2.2

यत्राङ्गुलीभिः सर्वाभिः श्यैनपत्पाशपीडनम्

yatrāṅgulībhiḥ sarvābhiḥ śyainapatpāśapīḍanam

4.3

विधाय क्रियते मोको हस्तमोकः स उच्यते

vidhāya kriyate moko hastamokaḥ sa ucyate

4.3.2

कुह्यादिष्व् अयमेवोक्तो वासादिष्वपि शस्यते

kuhyādiṣv ayamevokto vāsādiṣvapi śasyate

4.4

वस्त्रान्तरितमावेश्य तलोपरि यथाबलम्

vastrāntaritamāveśya talopari yathābalam

4.4.2

असङ्गवत् परीक्षेपो मुष्टिमोकः प्रकीर्तितः

asaṅgavat parīkṣepo muṣṭimokaḥ prakīrtitaḥ

4.5

असक्तं लघु सोल्लासं गतानुगतमञ्जसा

asaktaṃ laghu sollāsaṃ gatānugatamañjasā

4.5.2

प्रशस्यते द्विधा मोको दूरे दूरे यथायथम्

praśasyate dvidhā moko dūre dūre yathāyatham

4.6

तेषां विश्रम्भणं पूर्वं यथावदिह कथ्यते

teṣāṃ viśrambhaṇaṃ pūrvaṃ yathāvadiha kathyate

Śyainikaśāstra