5.15

अन्यथा तु सिरास्नायुच्छेदनम् अतिमात्रं वेदना चिराद् व्रणसंरोहो मांसकन्दीप्रादुर्भावश् चेति

anyathā tu sirāsnāyucchedanam atimātraṃ vedanā cirād vraṇasaṃroho māṃsakandīprādurbhāvaś ceti

5.16

मूढगर्भोदरार्शोऽश्मरीभगंदरमुखरोगेष्व् अभुक्तवतः कर्म कुर्वीत

mūḍhagarbhodarārśo'śmarībhagaṃdaramukharogeṣv abhuktavataḥ karma kurvīta

5.17

ततः शस्त्रम् अवचार्य शीताभिर् अद्भिर् आतुरम् आश्वास्य समन्तात् परिपीड्याङ्गुल्या व्रणम् अभिमृद्य प्रक्षाल्य कषायेण प्रोतेनोदकमादाय तिलकल्कमधुसर्पिःप्रगाढाम् औषधयुक्तां नातिस्निग्धां नातिरूक्षां वर्तिं प्रणिदध्यात् ततः कल्केनाच्छाद्य घनां कवलिकां दत्त्वा वस्त्रपट्टेन बध्नीयात् वेदनारक्षोघ्नैर् धूपैर् धूपयेत् रक्षोघ्नैश् च मन्त्रै रक्षां कुर्वीत

tataḥ śastram avacārya śītābhir adbhir āturam āśvāsya samantāt paripīḍyāṅgulyā vraṇam abhimṛdya prakṣālya kaṣāyeṇa protenodakamādāya tilakalkamadhusarpiḥpragāḍhām auṣadhayuktāṃ nātisnigdhāṃ nātirūkṣāṃ vartiṃ praṇidadhyāt tataḥ kalkenācchādya ghanāṃ kavalikāṃ dattvā vastrapaṭṭena badhnīyāt vedanārakṣoghnair dhūpair dhūpayet rakṣoghnaiś ca mantrai rakṣāṃ kurvīta

5.18

ततो गुग्गुल्वगुरुसर्जरसवचागौरसर्षपचूर्णैर् लवणनिम्बपत्त्रविमिश्रैर् आज्ययुक्तैर् धूपयेत् आज्यशेषेण चास्य प्राणान् समालभेत

tato guggulvagurusarjarasavacāgaurasarṣapacūrṇair lavaṇanimbapattravimiśrair ājyayuktair dhūpayet ājyaśeṣeṇa cāsya prāṇān samālabheta

5.19

उदकुम्भाच् चापो गृहीत्वाप्रोक्षयन् रक्षाकर्म कुर्यात् तद् वक्ष्यामः

udakumbhāc cāpo gṛhītvāprokṣayan rakṣākarma kuryāt tad vakṣyāmaḥ

5.20

कृत्यानां प्रतिघातार्थं तथा रक्षोभयस्य च

kṛtyānāṃ pratighātārthaṃ tathā rakṣobhayasya ca

5.20.2

रक्षाकर्म करिष्यामि ब्रह्मा तद् अनुमन्यताम्

rakṣākarma kariṣyāmi brahmā tad anumanyatām

5.21

नागाः पिशाचा गन्धर्वाः पितरो यक्षराक्षसाः

nāgāḥ piśācā gandharvāḥ pitaro yakṣarākṣasāḥ

5.21.2

अभिद्रवन्ति ये ये त्वां ब्रह्माद्या घ्नन्तु तान् सदा

abhidravanti ye ye tvāṃ brahmādyā ghnantu tān sadā

5.22

पृथिव्यामन्तरीक्षे च ये चरन्ति निशाचराः

pṛthivyāmantarīkṣe ca ye caranti niśācarāḥ

5.22.2

दिक्षु वास्तुनिवासाश् च पान्तु त्वां ते नमस्कृताः

dikṣu vāstunivāsāś ca pāntu tvāṃ te namaskṛtāḥ

5.23

पान्तु त्वां मुनयो ब्राह्म्या दिव्या राजर्षयस्तथा

pāntu tvāṃ munayo brāhmyā divyā rājarṣayastathā

5.23.2

पर्वताश्चैव नद्यश् च सर्वाः सर्वे च सागराः

parvatāścaiva nadyaś ca sarvāḥ sarve ca sāgarāḥ

5.24

अग्नी रक्षतु ते जिह्वां प्राणान् वायुस् तथैव च

agnī rakṣatu te jihvāṃ prāṇān vāyus tathaiva ca

5.24.2

सोमो व्यानमपानं ते पर्जन्यः परिरक्षतु

somo vyānamapānaṃ te parjanyaḥ parirakṣatu

5.25

उदानं विद्युतः पान्तु समानं स्तनयित्नवः

udānaṃ vidyutaḥ pāntu samānaṃ stanayitnavaḥ

5.25.2

बलमिन्द्रो बलपतिर्मनुर्मन्ये मतिं तथा

balamindro balapatirmanurmanye matiṃ tathā

5.26

कामांस्ते पान्तु गन्धर्वाः सत्त्वमिन्द्रो ऽभिरक्षतु

kāmāṃste pāntu gandharvāḥ sattvamindro 'bhirakṣatu

5.26.2

प्रज्ञां ते वरुणो राजा समुद्रो नाभिमण्डलम्

prajñāṃ te varuṇo rājā samudro nābhimaṇḍalam

5.27

चक्षुः सूर्यो दिशः श्रोत्रे चन्द्रमाः पातु ते मनः

cakṣuḥ sūryo diśaḥ śrotre candramāḥ pātu te manaḥ

Suśrutasaṃhitā