6.28.2

शोफान्वितं लोहितकैः सनीलैर् एतादृग् अम्लाध्युषितं वदन्ति

śophānvitaṃ lohitakaiḥ sanīlair etādṛg amlādhyuṣitaṃ vadanti

6.29

अवेदना वापि सवेदना वा यस्याक्षिराज्यो हि भवन्ति ताम्राः

avedanā vāpi savedanā vā yasyākṣirājyo hi bhavanti tāmrāḥ

6.29.2

मुहुर्विरज्यन्ति च ताः समन्ताद् व्याधिः सिरोत्पात इति प्रदिष्टः

muhurvirajyanti ca tāḥ samantād vyādhiḥ sirotpāta iti pradiṣṭaḥ

6.30

मोहात् सिरोत्पात उपेक्षितस्तु जायेत रोगस्तु सिराप्रहर्षः

mohāt sirotpāta upekṣitastu jāyeta rogastu sirāpraharṣaḥ

6.30.2

ताम्राच्छमस्रं स्रवति प्रगाढं तथा न शक्नोत्यभिवीक्षितुं च

tāmrācchamasraṃ sravati pragāḍhaṃ tathā na śaknotyabhivīkṣituṃ ca

7.1

अथातो दृष्टिगतरोगविज्ञानीयमध्यायं व्याख्यास्यामः

athāto dṛṣṭigatarogavijñānīyamadhyāyaṃ vyākhyāsyāmaḥ

7.2

यथोवाच भगवान् धन्वन्तरिः

yathovāca bhagavān dhanvantariḥ

7.3

मसूरदलमात्रां तु पञ्चभूतप्रसादजाम्

masūradalamātrāṃ tu pañcabhūtaprasādajām

7.3.2

खद्योतविस्फुलिङ्गाभामिद्धां तेजोभिरव्ययैः

khadyotavisphuliṅgābhāmiddhāṃ tejobhiravyayaiḥ

7.4

आवृतां पटलेनाक्ष्णोर् बाह्येन

āvṛtāṃ paṭalenākṣṇor bāhyena

7.4.2

शीतसात्म्यां नृणां दृष्टिमाहुर् नयनचिन्तकाः

śītasātmyāṃ nṛṇāṃ dṛṣṭimāhur nayanacintakāḥ

7.5

रोगांस्तदाश्रयान् घोरान् षट् च षट् च प्रचक्ष्महे

rogāṃstadāśrayān ghorān ṣaṭ ca ṣaṭ ca pracakṣmahe

7.5.2

पटलानुप्रविष्टस्य तिमिरस्य च लक्षणम्

paṭalānupraviṣṭasya timirasya ca lakṣaṇam

7.6

सिराभिरभिसम्प्राप्य विगुणो ऽभ्यन्तरे भृशम्

sirābhirabhisamprāpya viguṇo 'bhyantare bhṛśam

7.6.2

प्रथमे पटले दोषो यस्य दृष्टौ व्यवस्थितः

prathame paṭale doṣo yasya dṛṣṭau vyavasthitaḥ

7.7

अव्यक्तानि स रूपाणि सर्वाण्येव प्रपश्यति

avyaktāni sa rūpāṇi sarvāṇyeva prapaśyati

7.7.2

दृष्टिर्भृशं विह्वलति द्वितीयं पटलं गते

dṛṣṭirbhṛśaṃ vihvalati dvitīyaṃ paṭalaṃ gate

7.8

मक्षिका मशकान् केशाञ्जालकानि च पश्यति

makṣikā maśakān keśāñjālakāni ca paśyati

7.8.2

मण्डलानि पताकांश्च मरीचीः कुण्डलानि च

maṇḍalāni patākāṃśca marīcīḥ kuṇḍalāni ca

7.9

परिप्लवांश्च विविधान् वर्षमभ्रं तमांसि च

pariplavāṃśca vividhān varṣamabhraṃ tamāṃsi ca

Suśrutasaṃhitā