5.8.2

विहायसीवाच्छघनानुकारि तदव्रणं साध्यतमं वदन्ति

vihāyasīvācchaghanānukāri tadavraṇaṃ sādhyatamaṃ vadanti

5.9

गम्भीरजातं बहलं च शुक्रं चिरोत्थितं चापि वदन्ति कृच्छ्रम्

gambhīrajātaṃ bahalaṃ ca śukraṃ cirotthitaṃ cāpi vadanti kṛcchram

5.9.2

संछाद्यते श्वेतनिभेन सर्वं दोषेण यस्यासितमण्डलं तु

saṃchādyate śvetanibhena sarvaṃ doṣeṇa yasyāsitamaṇḍalaṃ tu

5.10

तम् अक्षिपाकात्ययम् अक्षिकोपसमुत्थितं तीव्ररुजं वदन्ति

tam akṣipākātyayam akṣikopasamutthitaṃ tīvrarujaṃ vadanti

5.10.2

अजापुरीषप्रतिमो रुजावान् सलोहितो लोहितपिच्छिलाश्रुः

ajāpurīṣapratimo rujāvān salohito lohitapicchilāśruḥ

5.10.3

विदार्य कृष्णं प्रचयो ऽभ्युपैति तं चाजकाजातमिति व्यवस्येत्

vidārya kṛṣṇaṃ pracayo 'bhyupaiti taṃ cājakājātamiti vyavasyet

6.1

अथातः सर्वगतरोगविज्ञानीयमध्यायं व्याख्यास्यामः

athātaḥ sarvagatarogavijñānīyamadhyāyaṃ vyākhyāsyāmaḥ

6.2

यथोवाच भगवान् धन्वन्तरिः

yathovāca bhagavān dhanvantariḥ

6.3

स्यन्दास्तु चत्वार इहोपदिष्टास्तावन्त एवेह तथाधिमन्थाः

syandāstu catvāra ihopadiṣṭāstāvanta eveha tathādhimanthāḥ

6.3.2

शोफान्वितो ऽशोफयुतश्च पाकावित्येवमेते दश सम्प्रदिष्टाः

śophānvito 'śophayutaśca pākāvityevamete daśa sampradiṣṭāḥ

6.4

हताधिमन्थो ऽनिलपर्ययश्च शुष्काक्षिपाको ऽन्यत एव वातः

hatādhimantho 'nilaparyayaśca śuṣkākṣipāko 'nyata eva vātaḥ

6.4.2

दृष्टिस् तथाम्लाध्युषिता सिराणामुत्पातहर्षावपि सर्वभागाः

dṛṣṭis tathāmlādhyuṣitā sirāṇāmutpātaharṣāvapi sarvabhāgāḥ

6.5

प्रायेण सर्वे नयनामयास्तु भवन्त्यभिष्यन्दनिमित्तमूलाः

prāyeṇa sarve nayanāmayāstu bhavantyabhiṣyandanimittamūlāḥ

6.5.2

तस्माद् अभिष्यन्दम् उदीर्यमाणम् उपाचरेदाशु हिताय धीमान्

tasmād abhiṣyandam udīryamāṇam upācaredāśu hitāya dhīmān

6.6

निस्तोदनं स्तम्भनरोमहर्षसंघर्षपारुष्यशिरोभितापाः

nistodanaṃ stambhanaromaharṣasaṃgharṣapāruṣyaśirobhitāpāḥ

6.6.2

विशुष्कभावः शिशिराश्रुता च वाताभिपन्ने नयने भवन्ति

viśuṣkabhāvaḥ śiśirāśrutā ca vātābhipanne nayane bhavanti

6.7

दाहप्रपाकौ शिशिराभिनन्दा धूमायनं बाष्पसमुच्छ्रयश्च

dāhaprapākau śiśirābhinandā dhūmāyanaṃ bāṣpasamucchrayaśca

6.7.2

उष्णाश्रुता पीतकनेत्रता च पित्ताभिपन्ने नयने भवन्ति

uṣṇāśrutā pītakanetratā ca pittābhipanne nayane bhavanti

6.8

उष्णाभिनन्दा गुरुताक्षिशोफः कण्डूपदेहौ सिततातिशैत्यम्

uṣṇābhinandā gurutākṣiśophaḥ kaṇḍūpadehau sitatātiśaityam

6.8.2

स्रावो मुहुः पिच्छिल एव चापि कफाभिपन्ने नयने भवन्ति

srāvo muhuḥ picchila eva cāpi kaphābhipanne nayane bhavanti

Suśrutasaṃhitā