5.38

तृड्दाहधर्मसंमोहे पैत्तं पैत्तविषातुरम्

tṛḍdāhadharmasaṃmohe paittaṃ paittaviṣāturam

5.38.2

शीतैः संवाहनस्नानप्रदेहैः समुपाचरेत्

śītaiḥ saṃvāhanasnānapradehaiḥ samupācaret

5.39

शीते शीतप्रसेकार्तं श्लैष्मिकं कफकृद्विषम्

śīte śītaprasekārtaṃ ślaiṣmikaṃ kaphakṛdviṣam

5.39.2

वामयेद्वमनैस्तीक्ष्णैस्तथा मूर्च्छामदान्वितम्

vāmayedvamanaistīkṣṇaistathā mūrcchāmadānvitam

5.40

कोष्ठदाहरुजाध्मानमूत्रसङ्गरुगन्वितम्

koṣṭhadāharujādhmānamūtrasaṅgaruganvitam

5.40.2

विरेचयेच्छकृद्वायुसङ्गपित्तातुरं नरम्

virecayecchakṛdvāyusaṅgapittāturaṃ naram

5.41

शूनाक्षिकूटं निद्रार्तं विवर्णाविललोचनम्

śūnākṣikūṭaṃ nidrārtaṃ vivarṇāvilalocanam

5.41.2

विवर्णं चापि पश्यन्तमञ्जनैः समुपाचरेत्

vivarṇaṃ cāpi paśyantamañjanaiḥ samupācaret

5.42

शिरोरुग्गौरवालस्यहनुस्तम्भगलग्रहे

śiroruggauravālasyahanustambhagalagrahe

5.42.2

शिरो विरेचयेत् क्षिप्रं मन्यास्तम्भे च दारुणे

śiro virecayet kṣipraṃ manyāstambhe ca dāruṇe

5.43

नष्टसंज्ञं विवृत्ताक्षं भग्नग्रीवं विरेचनैः

naṣṭasaṃjñaṃ vivṛttākṣaṃ bhagnagrīvaṃ virecanaiḥ

5.43.2

चूर्णैः प्रधमनैस्तीक्ष्णैर् विषार्तं समुपाचरेत्

cūrṇaiḥ pradhamanaistīkṣṇair viṣārtaṃ samupācaret

5.44

ताडयेच्च सिराः क्षिप्रं तस्य शाखाललाटजाः

tāḍayecca sirāḥ kṣipraṃ tasya śākhālalāṭajāḥ

5.44.2

तास्वप्रसिच्यमानासु मूर्ध्नि शस्त्रेण शस्त्रवित्

tāsvaprasicyamānāsu mūrdhni śastreṇa śastravit

5.45

कुर्यात् काकपदाकारं व्रणमेवं स्रवन्ति ताः

kuryāt kākapadākāraṃ vraṇamevaṃ sravanti tāḥ

5.45.2

सरक्तं चर्म मांसं वा निक्षिपेच्चास्य मूर्धनि

saraktaṃ carma māṃsaṃ vā nikṣipeccāsya mūrdhani

5.46

चर्मवृक्षकषायं वा कल्कं वा कुशलो भिषक्

carmavṛkṣakaṣāyaṃ vā kalkaṃ vā kuśalo bhiṣak

5.46.2

वादयेच्चागदैर् लिप्त्वा दुन्दुभींस्तस्य पार्श्वयोः

vādayeccāgadair liptvā dundubhīṃstasya pārśvayoḥ

5.47

लब्धसंज्ञं पुनश्चैनम् ऊर्ध्वं चाधश्च शोधयेत्

labdhasaṃjñaṃ punaścainam ūrdhvaṃ cādhaśca śodhayet

5.47.2

निःशेषं निर्हरेच्चैवं विषं परमदुर्जयम्

niḥśeṣaṃ nirhareccaivaṃ viṣaṃ paramadurjayam

Suśrutasaṃhitā