4.4.2

ज्ञानं च विषवेगानां भगवन् वक्तुमर्हसि

jñānaṃ ca viṣavegānāṃ bhagavan vaktumarhasi

4.5

तस्य तद्वचनं श्रुत्वा प्राब्रवीद्भिषजां वरः

tasya tadvacanaṃ śrutvā prābravīdbhiṣajāṃ varaḥ

4.5.2

असंख्या वासुकिश्रेष्ठा विख्यातास्तक्षकादयः

asaṃkhyā vāsukiśreṣṭhā vikhyātāstakṣakādayaḥ

4.6

महीधराश्च नागेन्द्रा हुताग्निसमतेजसः

mahīdharāśca nāgendrā hutāgnisamatejasaḥ

4.6.2

ये चाप्यजस्रं गर्जन्ति वर्षन्ति च तपन्ति च

ye cāpyajasraṃ garjanti varṣanti ca tapanti ca

4.7

ससागरगिरिद्वीपा यैरियं धार्यते मही

sasāgaragiridvīpā yairiyaṃ dhāryate mahī

4.7.2

क्रुद्धा निःश्वासदृष्टिभ्यां ये हन्युरखिलं जगत्

kruddhā niḥśvāsadṛṣṭibhyāṃ ye hanyurakhilaṃ jagat

4.8

नमस्तेभ्यो ऽस्ति नो तेषां कार्यं किंचिच् चिकित्सया

namastebhyo 'sti no teṣāṃ kāryaṃ kiṃcic cikitsayā

4.8.2

ये तु दंष्ट्राविषा भौमा ये दशन्ति च मानुषान्

ye tu daṃṣṭrāviṣā bhaumā ye daśanti ca mānuṣān

4.9

तेषां संख्यां प्रवक्ष्यामि यथावदनुपूर्वशः

teṣāṃ saṃkhyāṃ pravakṣyāmi yathāvadanupūrvaśaḥ

4.9.2

अशीतिस्त्वेव सर्पाणां भिद्यते पञ्चधा तु सा

aśītistveva sarpāṇāṃ bhidyate pañcadhā tu sā

4.10

दर्वीकरा मण्डलिनो राजिमन्तस्तथैव च

darvīkarā maṇḍalino rājimantastathaiva ca

4.10.2

निर्विषा वैकरञ्जाश्च त्रिविधास्ते पुनः स्मृताः

nirviṣā vaikarañjāśca trividhāste punaḥ smṛtāḥ

4.11

दर्वीकरा मण्डलिनो राजिमन्तश्च पन्नगाः

darvīkarā maṇḍalino rājimantaśca pannagāḥ

4.11.2

तेषु दर्वीकरा ज्ञेया विंशतिः षट् च पन्नगाः

teṣu darvīkarā jñeyā viṃśatiḥ ṣaṭ ca pannagāḥ

4.12

द्वाविंशतिर्मण्डलिनो राजिमन्तस्तथा दश

dvāviṃśatirmaṇḍalino rājimantastathā daśa

4.12.2

निर्विषा द्वादश ज्ञेया वैकरञ्जास्त्रयस्तथा

nirviṣā dvādaśa jñeyā vaikarañjāstrayastathā

4.13

वैकरञ्जोद्भवाः सप्त चित्रा मण्डलिराजिलाः

vaikarañjodbhavāḥ sapta citrā maṇḍalirājilāḥ

4.13.2

पादाभिमृष्टा दुष्टा वा क्रुद्धा ग्रासार्थिनो ऽपि वा

pādābhimṛṣṭā duṣṭā vā kruddhā grāsārthino 'pi vā

4.14

ते दशन्ति महाक्रोधास्त्रिविधं भीमदर्शनाः

te daśanti mahākrodhāstrividhaṃ bhīmadarśanāḥ

Suśrutasaṃhitā