3.27

श्लेष्मणावृतमार्गत्वादुच्छ्वासो ऽस्य निरुध्यते

śleṣmaṇāvṛtamārgatvāducchvāso 'sya nirudhyate

3.27.2

विसंज्ञः सति जीवे ऽपि तस्मात् तिष्ठति मानवः

visaṃjñaḥ sati jīve 'pi tasmāt tiṣṭhati mānavaḥ

3.28

शुक्रवत् सर्वसर्पाणां विषं सर्वशरीरगम्

śukravat sarvasarpāṇāṃ viṣaṃ sarvaśarīragam

3.28.2

क्रुद्धानामेति चाङ्गेभ्यः शुक्रं निर्मन्थनादिव

kruddhānāmeti cāṅgebhyaḥ śukraṃ nirmanthanādiva

3.29

तेषां बडिशवद्दंष्ट्रास्तासु सजति चागतम्

teṣāṃ baḍiśavaddaṃṣṭrāstāsu sajati cāgatam

3.29.2

अनुद्वृत्ता विषं तस्मान्न मुञ्चन्ति च भोगिनः

anudvṛttā viṣaṃ tasmānna muñcanti ca bhoginaḥ

3.30

यस्मादत्यर्थमुष्णं च तीक्ष्णं च पठितं विषम्

yasmādatyarthamuṣṇaṃ ca tīkṣṇaṃ ca paṭhitaṃ viṣam

3.30.2

अतः सर्वविषेषूक्तः परिषेकस्तु शीतलः

ataḥ sarvaviṣeṣūktaḥ pariṣekastu śītalaḥ

3.31

मन्दं कीटेषु नात्युष्णं बहुवातकफं विषम्

mandaṃ kīṭeṣu nātyuṣṇaṃ bahuvātakaphaṃ viṣam

3.31.2

अतः कीटविषे चापि स्वेदो न प्रतिषिध्यते

ataḥ kīṭaviṣe cāpi svedo na pratiṣidhyate

3.32

कीटैर् दष्टानुग्रविषैः सर्पवत् समुपाचरेत्

kīṭair daṣṭānugraviṣaiḥ sarpavat samupācaret

3.32.2

स्वभावादेव तिष्ठेत्तु प्रहारादंशयोर् विषम्

svabhāvādeva tiṣṭhettu prahārādaṃśayor viṣam

3.33

व्याप्य सावयवं देहं दिग्धविद्धाहिदष्टयोः

vyāpya sāvayavaṃ dehaṃ digdhaviddhāhidaṣṭayoḥ

3.33.2

लौल्याद्विषान्वितं मांसं यः खादेन्मृतमात्रयोः

laulyādviṣānvitaṃ māṃsaṃ yaḥ khādenmṛtamātrayoḥ

3.34

यथाविषं स रोगेण क्लिश्यते म्रियते ऽपि वा

yathāviṣaṃ sa rogeṇa kliśyate mriyate 'pi vā

3.34.2

अतश्चाप्यनयोर् मांसमभक्ष्यं मृतमात्रयोः

ataścāpyanayor māṃsamabhakṣyaṃ mṛtamātrayoḥ

3.35

मुहूर्तात्तदुपादेयं प्रहाराद् अंशवर्जितम्

muhūrtāttadupādeyaṃ prahārād aṃśavarjitam

3.35.2

सवातं गृहधूमाभं पुरीषं यो ऽतिसार्यते

savātaṃ gṛhadhūmābhaṃ purīṣaṃ yo 'tisāryate

3.36

आध्मातो ऽत्यर्थमुष्णास्रो विवर्णः सादपीडितः

ādhmāto 'tyarthamuṣṇāsro vivarṇaḥ sādapīḍitaḥ

3.36.2

उद्वमत्यथ फेनं च विषपीतं तमादिशेत्

udvamatyatha phenaṃ ca viṣapītaṃ tamādiśet

Suśrutasaṃhitā