3.7

दुष्टं जलं पिच्छिलमुग्रगन्धि फेनान्वितं राजिभिर् आवृतं च

duṣṭaṃ jalaṃ picchilamugragandhi phenānvitaṃ rājibhir āvṛtaṃ ca

3.7.2

मण्डूकमत्स्यं म्रियते विहङ्गा मत्ताश्च सानूपचरा भ्रमन्ति

maṇḍūkamatsyaṃ mriyate vihaṅgā mattāśca sānūpacarā bhramanti

3.8

मज्जन्ति ये चात्र नराश्वनागास्ते छर्दिमोहज्वरदाहशोफान्

majjanti ye cātra narāśvanāgāste chardimohajvaradāhaśophān

3.8.2

ऋच्छन्ति तेषामपहृत्य दोषान् दुष्टं जलं शोधयितुं यतेत

ṛcchanti teṣāmapahṛtya doṣān duṣṭaṃ jalaṃ śodhayituṃ yateta

3.9

धवाश्वकर्णासनपारिभद्रान् सपाटलान् सिद्धकमोक्षकौ च

dhavāśvakarṇāsanapāribhadrān sapāṭalān siddhakamokṣakau ca

3.9.2

दग्ध्वा सराजद्रुमसोमवल्कांस्तद्भस्म शीतं वितरेत् सरःसु

dagdhvā sarājadrumasomavalkāṃstadbhasma śītaṃ vitaret saraḥsu

3.10

भस्माञ्जलिं चापि घटे निधाय विशोधयेदीप्सितमेवमम्भः

bhasmāñjaliṃ cāpi ghaṭe nidhāya viśodhayedīpsitamevamambhaḥ

3.10.2

क्षितिप्रदेशं विषदूषितं तु शिलातलं तीर्थमथेरिणं वा

kṣitipradeśaṃ viṣadūṣitaṃ tu śilātalaṃ tīrthamatheriṇaṃ vā

3.11

स्पृशन्ति गात्रेण तु येन येन गोवाजिनागोष्ट्रखरा नरा वा

spṛśanti gātreṇa tu yena yena govājināgoṣṭrakharā narā vā

3.11.2

तच्छूनतां यात्यथ दह्यते च विशीर्यते रोमनखं तथैव

tacchūnatāṃ yātyatha dahyate ca viśīryate romanakhaṃ tathaiva

3.12

तत्राप्यनन्तां सह सर्वगन्धैः पिष्ट्वा सुराभिर् विनियोज्य मार्गम्

tatrāpyanantāṃ saha sarvagandhaiḥ piṣṭvā surābhir viniyojya mārgam

3.12.2

सिञ्चेत् पयोभिः सुमृदन्वितैस्तं विडङ्गपाठाकटभीजलैर् वा

siñcet payobhiḥ sumṛdanvitaistaṃ viḍaṅgapāṭhākaṭabhījalair vā

3.13

तृणेषु भक्तेषु च दूषितेषु सीदन्ति मूर्छन्ति वमन्ति चान्ये

tṛṇeṣu bhakteṣu ca dūṣiteṣu sīdanti mūrchanti vamanti cānye

3.13.2

विड्भेदमृच्छन्त्यथवा म्रियन्ते तेषां चिकित्सां प्रणयेद्यथोक्ताम्

viḍbhedamṛcchantyathavā mriyante teṣāṃ cikitsāṃ praṇayedyathoktām

3.14

विषापहैर् वाप्यगदैर् विलिप्य वाद्यानि चित्राण्यपि वादयेत

viṣāpahair vāpyagadair vilipya vādyāni citrāṇyapi vādayeta

3.14.2

तारः सुतारः ससुरेन्द्रगोपः सर्वैश्च तुल्यः कुरुविन्दभागः

tāraḥ sutāraḥ sasurendragopaḥ sarvaiśca tulyaḥ kuruvindabhāgaḥ

3.15

पित्तेन युक्तः कपिलान्वयेन वाद्यप्रलेपो विहितः प्रशस्तः

pittena yuktaḥ kapilānvayena vādyapralepo vihitaḥ praśastaḥ

3.15.2

वाद्यस्य शब्देन हि यान्ति नाशं विषाणि घोराण्यपि यानि सन्ति

vādyasya śabdena hi yānti nāśaṃ viṣāṇi ghorāṇyapi yāni santi

3.16

धूमे ऽनिले वा विषसम्प्रयुक्ते खगाः श्रमार्ताः प्रपतन्ति भूमौ

dhūme 'nile vā viṣasamprayukte khagāḥ śramārtāḥ prapatanti bhūmau

3.16.2

कासप्रतिश्यायशिरोरुजश्च भवन्ति तीव्रा नयनामयाश्च

kāsapratiśyāyaśirorujaśca bhavanti tīvrā nayanāmayāśca

Suśrutasaṃhitā