5.35

मूत्रैर् वा गुग्गुलं श्रेष्ठं पिबेद्वापि शिलाजतु

mūtrair vā guggulaṃ śreṣṭhaṃ pibedvāpi śilājatu

5.35.2

ततो हन्ति कफाक्रान्तं समेदस्कं प्रभञ्जनम्

tato hanti kaphākrāntaṃ samedaskaṃ prabhañjanam

5.36

हृद्रोगमरुचिं गुल्मं तथाभ्यन्तरविद्रधिम्

hṛdrogamaruciṃ gulmaṃ tathābhyantaravidradhim

5.36.2

सक्षारमूत्रस्वेदांश् च रूक्षाण्युत्सादनानि च

sakṣāramūtrasvedāṃś ca rūkṣāṇyutsādanāni ca

5.37

कुर्याद्दिह्याच्च मूत्राढ्यैः करञ्जफलसर्षपैः

kuryāddihyācca mūtrāḍhyaiḥ karañjaphalasarṣapaiḥ

5.37.2

भोज्याः पुराणश्यामाककोद्रवोद्दालशालयः

bhojyāḥ purāṇaśyāmākakodravoddālaśālayaḥ

5.38

शुष्कमूलकयूषेण पटोलस्य रसेन वा

śuṣkamūlakayūṣeṇa paṭolasya rasena vā

5.38.2

जाङ्गलैर् अघृतैर् मांसैः शाकैश्चालवणैर् हितैः

jāṅgalair aghṛtair māṃsaiḥ śākaiścālavaṇair hitaiḥ

5.39

यदा स्यातां परिक्षीणे भूयिष्ठे कफमेदसी

yadā syātāṃ parikṣīṇe bhūyiṣṭhe kaphamedasī

5.39.2

तदा स्नेहादिकं कर्म पुनरत्रावचारयेत्

tadā snehādikaṃ karma punaratrāvacārayet

5.40

सुगन्धिः सुलघुः सूक्ष्मस्तीक्ष्णोष्णः कटुको रसे

sugandhiḥ sulaghuḥ sūkṣmastīkṣṇoṣṇaḥ kaṭuko rase

5.40.2

कटुपाकः सरो हृद्यो गुग्गुलुः स्निग्धपिच्छिलः

kaṭupākaḥ saro hṛdyo gugguluḥ snigdhapicchilaḥ

5.41

स नवो बृंहणो वृष्यः पुराणस्त्वपकर्षणः

sa navo bṛṃhaṇo vṛṣyaḥ purāṇastvapakarṣaṇaḥ

5.41.2

तैक्ष्ण्यौष्ण्यात्कफवातघ्नः सरत्वान्मलपित्तनुत्

taikṣṇyauṣṇyātkaphavātaghnaḥ saratvānmalapittanut

5.42

सौगन्ध्यात् पूतिकोष्ठघ्नः सौक्ष्म्याच्चानलदीपनः

saugandhyāt pūtikoṣṭhaghnaḥ saukṣmyāccānaladīpanaḥ

5.42.2

तं प्रातस्त्रिफलादार्वीपटोलकुशवारिभिः

taṃ prātastriphalādārvīpaṭolakuśavāribhiḥ

5.43

पिबेदावाप्य वा मूत्रैः क्षारैर् उष्णोदकेन वा

pibedāvāpya vā mūtraiḥ kṣārair uṣṇodakena vā

5.43.2

जीर्णे यूषरसैः क्षीरैर् भुञ्जानो हन्ति मासतः

jīrṇe yūṣarasaiḥ kṣīrair bhuñjāno hanti māsataḥ

5.44

गुल्मं मेहमुदावर्तमुदरं सभगन्दरम्

gulmaṃ mehamudāvartamudaraṃ sabhagandaram

5.44.2

कृमिकण्ड्वरुचिश्वित्राण्यर्बुदं ग्रन्थिम् एव च

kṛmikaṇḍvaruciśvitrāṇyarbudaṃ granthim eva ca

Suśrutasaṃhitā