3.23.2

अवमथ्य स्रुते रक्ते शालिपिष्टेन लेपयेत्

avamathya srute rakte śālipiṣṭena lepayet

3.24

भग्नां वा सन्धिमुक्तां वा स्थापयित्वाङ्गुलीं समाम्

bhagnāṃ vā sandhimuktāṃ vā sthāpayitvāṅgulīṃ samām

3.24.2

अणुनावेष्ट्य पट्टेन घृतसेकं प्रदापयेत्

aṇunāveṣṭya paṭṭena ghṛtasekaṃ pradāpayet

3.25

अभ्यज्य सर्पिषा पादं तलभग्नं कुशोत्तरम्

abhyajya sarpiṣā pādaṃ talabhagnaṃ kuśottaram

3.25.2

वस्त्रपट्टेन बध्नीयान्न च व्यायाममाचरेत्

vastrapaṭṭena badhnīyānna ca vyāyāmamācaret

3.26

अभ्यज्यायामयेज्जङ्घामूरुं च सुसमाहितः

abhyajyāyāmayejjaṅghāmūruṃ ca susamāhitaḥ

3.26.2

दत्त्वा वृक्षत्वचः शीता वस्त्रपट्टेन वेष्टयेत्

dattvā vṛkṣatvacaḥ śītā vastrapaṭṭena veṣṭayet

3.27

मतिमांश्चक्रयोगेन ह्य् आञ्छेदूर्वस्थि निर्गतम्

matimāṃścakrayogena hy āñchedūrvasthi nirgatam

3.27.2

स्फुटितं पिच्चितं चापि बध्नीयात् पूर्ववद्भिषक्

sphuṭitaṃ piccitaṃ cāpi badhnīyāt pūrvavadbhiṣak

3.28

आञ्छेदूर्ध्वमधो वापि कटिभग्नं तु मानवम्

āñchedūrdhvamadho vāpi kaṭibhagnaṃ tu mānavam

3.28.2

ततः स्थानस्थिते संधौ बस्तिभिः समुपाचरेत्

tataḥ sthānasthite saṃdhau bastibhiḥ samupācaret

3.29

पर्शुकास्वथ भग्नासु घृताभ्यक्तस्य तिष्ठतः

parśukāsvatha bhagnāsu ghṛtābhyaktasya tiṣṭhataḥ

3.29.2

दक्षिणास्वथवा वामास्वनुमृज्य निबन्धनीः

dakṣiṇāsvathavā vāmāsvanumṛjya nibandhanīḥ

3.30

ततः कवलिकां दत्त्वा वेष्टयेत् सुसमाहितः

tataḥ kavalikāṃ dattvā veṣṭayet susamāhitaḥ

3.30.2

तैलपूर्णे कटाहे वा द्रोण्यां वा शाययेन्नरम्

tailapūrṇe kaṭāhe vā droṇyāṃ vā śāyayennaram

3.31

मुसलेनोत्क्षिपेत् कक्षामंससन्धौ विसंहते

musalenotkṣipet kakṣāmaṃsasandhau visaṃhate

3.31.2

स्थानस्थितं च बध्नीयात् स्वस्तिकेन विचक्षणः

sthānasthitaṃ ca badhnīyāt svastikena vicakṣaṇaḥ

3.32

कौर्परं तु तथा सन्धिमङ्गुष्ठेनानुमार्जयेत्

kaurparaṃ tu tathā sandhimaṅguṣṭhenānumārjayet

3.32.2

अनुमृज्य ततः सन्धिं पीडयेत् कूर्पराच्च्युतम्

anumṛjya tataḥ sandhiṃ pīḍayet kūrparāccyutam

3.33

प्रसार्याकुञ्चयेच्चैनं स्नेहसेकं च दापयेत्

prasāryākuñcayeccainaṃ snehasekaṃ ca dāpayet

Suśrutasaṃhitā