2.49.2

मेदोग्रन्थौ तु यत्तैलं वक्ष्यते तच्च योजयेत्

medogranthau tu yattailaṃ vakṣyate tacca yojayet

2.50

त्वचो ऽतीत्य सिरादीनि भित्त्वा वा परिहृत्य वा

tvaco 'tītya sirādīni bhittvā vā parihṛtya vā

2.50.2

कोष्ठे प्रतिष्ठितं शल्यं कुर्यादुक्तानुपद्रवान्

koṣṭhe pratiṣṭhitaṃ śalyaṃ kuryāduktānupadravān

2.51

तत्रान्तर्लोहितं पाण्डुं शीतपादकराननम्

tatrāntarlohitaṃ pāṇḍuṃ śītapādakarānanam

2.51.2

शीतोच्छ्वासं रक्तनेत्रमानद्धं च विवर्जयेत्

śītocchvāsaṃ raktanetramānaddhaṃ ca vivarjayet

2.52

आमाशयस्थे रुधिरे वमनं पथ्यम् उच्यते

āmāśayasthe rudhire vamanaṃ pathyam ucyate

2.52.2

पक्वाशयस्थे देयं च विरेचनम् असंशयम्

pakvāśayasthe deyaṃ ca virecanam asaṃśayam

2.53

आस्थापनं च निःस्नेहं कार्यमुष्णैर् विशोधनैः

āsthāpanaṃ ca niḥsnehaṃ kāryamuṣṇair viśodhanaiḥ

2.53.2

यवकोलकुलत्थानां निःस्नेहेन रसेन च

yavakolakulatthānāṃ niḥsnehena rasena ca

2.54

भुञ्जीतान्नं यवागूं वा पिबेत् सैन्धवसंयुताम्

bhuñjītānnaṃ yavāgūṃ vā pibet saindhavasaṃyutām

2.54.2

अतिनिःस्रुतरक्तो वा भिन्नकोष्ठः पिबेदसृक्

atiniḥsrutarakto vā bhinnakoṣṭhaḥ pibedasṛk

2.55

स्वमार्गप्रतिपन्नास्तु यस्य विण्मूत्रमारुताः

svamārgapratipannāstu yasya viṇmūtramārutāḥ

2.55.2

व्युपद्रवः स भिन्ने ऽपि कोष्ठे जीवति मानवः

vyupadravaḥ sa bhinne 'pi koṣṭhe jīvati mānavaḥ

2.56

अभिन्नमन्त्रं निष्क्रान्तं प्रवेश्यं नान्यथा भवेत्

abhinnamantraṃ niṣkrāntaṃ praveśyaṃ nānyathā bhavet

2.56.2

पिपीलिकाशिरोग्रस्तं तदप्येके वदन्ति तु

pipīlikāśirograstaṃ tadapyeke vadanti tu

2.57

प्रक्षाल्य पयसा दिग्धं तृणशोणितपांशुभिः

prakṣālya payasā digdhaṃ tṛṇaśoṇitapāṃśubhiḥ

2.57.2

प्रवेशयेत् कृत्तनखो घृतेनाक्तं शनैः शनैः

praveśayet kṛttanakho ghṛtenāktaṃ śanaiḥ śanaiḥ

2.58

प्रवेशयेत् क्षीरसिक्तं शुष्कम् अन्त्रं घृताप्लुतम्

praveśayet kṣīrasiktaṃ śuṣkam antraṃ ghṛtāplutam

2.58.2

अङ्गुल्याभिमृशेत् कण्ठं जलेनोद्वेजयेद् अपि

aṅgulyābhimṛśet kaṇṭhaṃ jalenodvejayed api

2.59

हस्तपादेषु संगृह्य समुत्थाप्य महाबलाः

hastapādeṣu saṃgṛhya samutthāpya mahābalāḥ

Suśrutasaṃhitā