2.29.2

अत ऊर्ध्वं प्रवक्ष्यामि छिन्नानां तु चिकित्सितम्

ata ūrdhvaṃ pravakṣyāmi chinnānāṃ tu cikitsitam

2.30

ये व्रणा विवृताः केचिच्छिरःपार्श्वावलम्बिनः

ye vraṇā vivṛtāḥ kecicchiraḥpārśvāvalambinaḥ

2.30.2

तान् सीव्येद्विधिनोक्तेन बध्नीयाद्गाढम् एव च

tān sīvyedvidhinoktena badhnīyādgāḍham eva ca

2.31

कर्णं स्थानादपहृतं स्थापयित्वा यथास्थितम्

karṇaṃ sthānādapahṛtaṃ sthāpayitvā yathāsthitam

2.31.2

सीव्येद्यथोक्तं तैलेन स्रोतश्चाभिप्रतर्पयेत्

sīvyedyathoktaṃ tailena srotaścābhipratarpayet

2.32

कृकाटिकान्ते छिन्ने तु गच्छत्यपि समीरणे

kṛkāṭikānte chinne tu gacchatyapi samīraṇe

2.32.2

सम्यङ्निवेश्य बध्नीयात् सीव्येच्चापि निरन्तरम्

samyaṅniveśya badhnīyāt sīvyeccāpi nirantaram

2.33

आजेन सर्पिषा चैवं परिषेकं तु कारयेत्

ājena sarpiṣā caivaṃ pariṣekaṃ tu kārayet

2.33.2

उत्तानो ऽन्नं समश्नीयाच्छयीत च सुयन्त्रितः

uttāno 'nnaṃ samaśnīyācchayīta ca suyantritaḥ

2.34

शाखासु पतितांस्तिर्यक् प्रहारान् विवृतान् भृशम्

śākhāsu patitāṃstiryak prahārān vivṛtān bhṛśam

2.34.2

सीव्येत् सम्यङ्निवेश्याशु सन्ध्यस्थीन्यनुपूर्वशः

sīvyet samyaṅniveśyāśu sandhyasthīnyanupūrvaśaḥ

2.35

बद्ध्वा वेल्लितकेनाशु ततस्तैलेन सेचयेत्

baddhvā vellitakenāśu tatastailena secayet

2.35.2

चर्मणा गोफणाबन्धः कार्यो यो वा हितो भवेत्

carmaṇā gophaṇābandhaḥ kāryo yo vā hito bhavet

2.36

पृष्ठे व्रणो यस्य भवेदुत्तानं शाययेत्तु तम्

pṛṣṭhe vraṇo yasya bhaveduttānaṃ śāyayettu tam

2.36.2

अतो ऽन्यथा चोरसिजे शाययेत् पुरुषं व्रणे

ato 'nyathā corasije śāyayet puruṣaṃ vraṇe

2.37

छिन्नां निःशेषतः शाखां दग्ध्वा तैलेन बुद्धिमान्

chinnāṃ niḥśeṣataḥ śākhāṃ dagdhvā tailena buddhimān

2.37.2

बध्नीयात् कोशबन्धेन प्राप्तं कार्यं च रोपणम्

badhnīyāt kośabandhena prāptaṃ kāryaṃ ca ropaṇam

2.38

चन्दनं पद्मकं रोध्रमुत्पलानि प्रियङ्गवः

candanaṃ padmakaṃ rodhramutpalāni priyaṅgavaḥ

2.38.2

हरिद्रा मधुकं चैव पयः स्यादत्र चाष्टमम्

haridrā madhukaṃ caiva payaḥ syādatra cāṣṭamam

2.39

तैलमेभिर् विपक्वं तु प्रधानं व्रणरोपणम्

tailamebhir vipakvaṃ tu pradhānaṃ vraṇaropaṇam

Suśrutasaṃhitā