2.19.2

सूक्ष्मास्यशल्याभिहतं यदङ्गं त्वाशयाद्विना

sūkṣmāsyaśalyābhihataṃ yadaṅgaṃ tvāśayādvinā

2.20

उत्तुण्डितं निर्गतं वा तद्विद्धमिति निर्दिशेत्

uttuṇḍitaṃ nirgataṃ vā tadviddhamiti nirdiśet

2.20.2

नातिच्छिन्नं नातिभिन्नमुभयोर् लक्षणान्वितम्

nāticchinnaṃ nātibhinnamubhayor lakṣaṇānvitam

2.21

विषमं व्रणमङ्गे यत्तत् क्षतं त्वभिनिर्दिशेत्

viṣamaṃ vraṇamaṅge yattat kṣataṃ tvabhinirdiśet

2.21.2

प्रहारपीडनाभ्यां तु यदङ्गं पृथुतां गतम्

prahārapīḍanābhyāṃ tu yadaṅgaṃ pṛthutāṃ gatam

2.22

सास्थि तत् पिच्चितं विद्यान्मज्जरक्तपरिप्लुतम्

sāsthi tat piccitaṃ vidyānmajjaraktapariplutam

2.22.2

विगतत्वग्यदङ्गं हि संघर्षादन्यथापि वा

vigatatvagyadaṅgaṃ hi saṃgharṣādanyathāpi vā

2.23

उषास्रावान्वितं तत्तु घृष्टमित्युपदिश्यते

uṣāsrāvānvitaṃ tattu ghṛṣṭamityupadiśyate

2.23.2

छिन्ने भिन्ने तथा विद्धे क्षते वासृगतिस्रवेत्

chinne bhinne tathā viddhe kṣate vāsṛgatisravet

2.24

रक्तक्षयाद्रुजस्तत्र करोति पवनो भृशम्

raktakṣayādrujastatra karoti pavano bhṛśam

2.24.2

स्नेहपानं हितं तत्र तत्सेको विहितस्तथा

snehapānaṃ hitaṃ tatra tatseko vihitastathā

2.25

वेशवारैः सकृशरैः सुस्निग्धैश् चोपनाहनम्

veśavāraiḥ sakṛśaraiḥ susnigdhaiś copanāhanam

2.25.2

धान्यस्वेदांश्च कुर्वीत स्निग्धान्यालेपनानि च

dhānyasvedāṃśca kurvīta snigdhānyālepanāni ca

2.26

वातघ्नौषधसिद्धैश्च स्नेहैर् बस्तिर्विधीयते

vātaghnauṣadhasiddhaiśca snehair bastirvidhīyate

2.26.2

पिच्चिते च विघृष्टे च नातिस्रवति शोणितम्

piccite ca vighṛṣṭe ca nātisravati śoṇitam

2.27

अगच्छति भृशं तस्मिन् दाहः पाकश्च जायते

agacchati bhṛśaṃ tasmin dāhaḥ pākaśca jāyate

2.27.2

तत्रोष्मणो निग्रहार्थं तथा दाहप्रपाकयोः

tatroṣmaṇo nigrahārthaṃ tathā dāhaprapākayoḥ

2.28

शीतमालेपनं कार्यं परिषेकश्च शीतलः

śītamālepanaṃ kāryaṃ pariṣekaśca śītalaḥ

2.28.2

षट्स्वेतेषु यथोक्तेषु छिन्नादिषु समासतः

ṣaṭsveteṣu yathokteṣu chinnādiṣu samāsataḥ

2.29

ज्ञेयं समर्पितं सर्वं सद्योव्रणचिकित्सितम्

jñeyaṃ samarpitaṃ sarvaṃ sadyovraṇacikitsitam

Suśrutasaṃhitā