1.39

समं लिखेत् सुलिखितं लिखेन्निरवशेषतः

samaṃ likhet sulikhitaṃ likhenniravaśeṣataḥ

1.39.2

वर्त्मनां तु प्रमाणेन समं शस्त्रेण निर्लिखेत्

vartmanāṃ tu pramāṇena samaṃ śastreṇa nirlikhet

1.40

क्षौमं प्लोतं पिचुं फेनं यावशूकं ससैन्धवम्

kṣaumaṃ plotaṃ picuṃ phenaṃ yāvaśūkaṃ sasaindhavam

1.40.2

कर्कशानि च पत्राणि लेखनार्थे प्रदापयेत्

karkaśāni ca patrāṇi lekhanārthe pradāpayet

1.41

नाडीव्रणाञ् शल्यगर्भानुन्मार्ग्युत्सङ्गिनः शनैः

nāḍīvraṇāñ śalyagarbhānunmārgyutsaṅginaḥ śanaiḥ

1.41.2

करीरवालाङ्गुलिभिर् एषण्या वैषयेद्भिषक्

karīravālāṅgulibhir eṣaṇyā vaiṣayedbhiṣak

1.42

नेत्रवर्त्मगुदाभ्यासनाड्यो ऽवक्त्राः सशोणिताः

netravartmagudābhyāsanāḍyo 'vaktrāḥ saśoṇitāḥ

1.42.2

चुच्चूपोदकजैः श्लक्ष्णैः करीरैर् एषयेत्तु ताः

cuccūpodakajaiḥ ślakṣṇaiḥ karīrair eṣayettu tāḥ

1.43

संवृतासंवृतास्येषु व्रणेषु मतिमान् भिषक्

saṃvṛtāsaṃvṛtāsyeṣu vraṇeṣu matimān bhiṣak

1.43.2

यथोक्तमाहरेच्छल्यं प्राप्तोद्धरणलक्षणम्

yathoktamāharecchalyaṃ prāptoddharaṇalakṣaṇam

1.44

रोगे व्यधनसाध्ये तु यथोद्देशं प्रमाणतः

roge vyadhanasādhye tu yathoddeśaṃ pramāṇataḥ

1.44.2

शस्त्रं निदध्याद्दोषं च स्रावयेत् कीर्तितं यथा

śastraṃ nidadhyāddoṣaṃ ca srāvayet kīrtitaṃ yathā

1.45

अपाकोपद्रुता ये च मांसस्था विवृताश्च ये

apākopadrutā ye ca māṃsasthā vivṛtāśca ye

1.45.2

यथोक्तं सीवनं तेषु कार्यं संधानम् एव च

yathoktaṃ sīvanaṃ teṣu kāryaṃ saṃdhānam eva ca

1.46

पूयगर्भानणुद्वारान् व्रणान्मर्मगतान् अपि

pūyagarbhānaṇudvārān vraṇānmarmagatān api

1.46.2

यथोक्तैः पीडनद्रव्यैः समन्तात् परिपीडयेत्

yathoktaiḥ pīḍanadravyaiḥ samantāt paripīḍayet

1.47

शुष्यमाणमुपेक्षेत प्रदेहं पीडनं प्रति

śuṣyamāṇamupekṣeta pradehaṃ pīḍanaṃ prati

1.47.2

न चाभिमुखमालिम्पेत्तथा दोषः प्रसिच्यते

na cābhimukhamālimpettathā doṣaḥ prasicyate

1.48

तैस्तैर् निमित्तैर् बहुधा शोणिते प्रस्रुते भृशम्

taistair nimittair bahudhā śoṇite prasrute bhṛśam

1.48.2

कार्यं यथोक्तं वैद्येन शोणितास्थापनं भवेत्

kāryaṃ yathoktaṃ vaidyena śoṇitāsthāpanaṃ bhavet

Suśrutasaṃhitā