7.6.2

कोष्ठादुपस्नेहवदन्नसारो निःसृत्य दुष्टो ऽनिलवेगनुन्नः

koṣṭhādupasnehavadannasāro niḥsṛtya duṣṭo 'nilaveganunnaḥ

7.7

त्वचः समुन्नम्य शनैः समन्ताद्विवर्धमानो जठरं करोति

tvacaḥ samunnamya śanaiḥ samantādvivardhamāno jaṭharaṃ karoti

7.7.2

तत्पूर्वरूपं बलवर्णकाङ्क्षावलीविनाशो जठरे हि राज्यः

tatpūrvarūpaṃ balavarṇakāṅkṣāvalīvināśo jaṭhare hi rājyaḥ

7.8

जीर्णापरिज्ञानविदाहवत्यो बस्तौ रुजः पादगतश्च शोफः

jīrṇāparijñānavidāhavatyo bastau rujaḥ pādagataśca śophaḥ

7.8.2

संगृह्य पार्श्वोदरपृष्ठनाभीर्यद्वर्धते कृष्णसिरावनद्धम्

saṃgṛhya pārśvodarapṛṣṭhanābhīryadvardhate kṛṣṇasirāvanaddham

7.9

सशूलम् आनाहवद् उग्रशब्दं सतोदभेदं पवनात्मकं तत्

saśūlam ānāhavad ugraśabdaṃ satodabhedaṃ pavanātmakaṃ tat

7.9.2

यच्चोषतृष्णाज्वरदाहयुक्तं पीतं सिरा भान्ति च यत्र पीताः

yaccoṣatṛṣṇājvaradāhayuktaṃ pītaṃ sirā bhānti ca yatra pītāḥ

7.10

पीताक्षिविण्मूत्रनखाननस्य पित्तोदरं तत्त्वचिराभिवृद्धि

pītākṣiviṇmūtranakhānanasya pittodaraṃ tattvacirābhivṛddhi

7.10.2

यच्छीतलं शुक्लसिरावनद्धं गुरु स्थिरं शुक्लनखाननस्य

yacchītalaṃ śuklasirāvanaddhaṃ guru sthiraṃ śuklanakhānanasya

7.11

स्निग्धं महच्छोफयुतं ससादं कफोदरं तत्तु चिराभिवृद्धि

snigdhaṃ mahacchophayutaṃ sasādaṃ kaphodaraṃ tattu cirābhivṛddhi

7.11.2

स्त्रियो ऽन्नपानं नखरोममूत्रविडार्तवैर् युक्तमसाधुवृत्ताः

striyo 'nnapānaṃ nakharomamūtraviḍārtavair yuktamasādhuvṛttāḥ

7.12

यस्मै प्रयच्छन्त्यरयो गरांश्च दुष्टाम्बुदूषीविषसेवनाद्वा

yasmai prayacchantyarayo garāṃśca duṣṭāmbudūṣīviṣasevanādvā

7.12.2

तेनाशु रक्तं कुपिताश्च दोषाः कुर्वन्ति घोरं जठरं त्रिलिङ्गम्

tenāśu raktaṃ kupitāśca doṣāḥ kurvanti ghoraṃ jaṭharaṃ triliṅgam

7.13

तच्छीतवाताभ्रसमुद्भवेषु विशेषतः कुप्यति दह्यते च

tacchītavātābhrasamudbhaveṣu viśeṣataḥ kupyati dahyate ca

7.13.2

स चातुरो मूर्च्छति सम्प्रसक्तं पाण्डुः कृशः शुष्यति तृष्णया च

sa cāturo mūrcchati samprasaktaṃ pāṇḍuḥ kṛśaḥ śuṣyati tṛṣṇayā ca

7.14

प्रकीर्तितं दूष्युदरं तु घोरं प्लीहोदरं कीर्तयतो निबोध

prakīrtitaṃ dūṣyudaraṃ tu ghoraṃ plīhodaraṃ kīrtayato nibodha

7.14.2

विदाह्यभिष्यन्दिरतस्य जन्तोः प्रदुष्टमत्यर्थमसृक् कफश्च

vidāhyabhiṣyandiratasya jantoḥ praduṣṭamatyarthamasṛk kaphaśca

7.15

प्लीहाभिवृद्धिं सततं करोति प्लीहोदरं तत् प्रवदन्ति तज्ज्ञाः

plīhābhivṛddhiṃ satataṃ karoti plīhodaraṃ tat pravadanti tajjñāḥ

7.15.2

वामे च पार्श्वे परिवृद्धिमेति विशेषतः सीदति चातुरो ऽत्र

vāme ca pārśve parivṛddhimeti viśeṣataḥ sīdati cāturo 'tra

7.16

मन्दज्वराग्निः कफपित्तलिङ्गैर् उपद्रुतः क्षीणबलो ऽतिपाण्डुः

mandajvarāgniḥ kaphapittaliṅgair upadrutaḥ kṣīṇabalo 'tipāṇḍuḥ

Suśrutasaṃhitā