2.1

अदृश्यरूपाः कालस्य मूर्तयो भगणाश्रिताः

adṛśyarūpāḥ kālasya mūrtayo bhagaṇāśritāḥ

2.1.2

शीघ्रमन्दोच्चपाताख्या ग्रहाणां गतिहेतवः

śīghramandoccapātākhyā grahāṇāṃ gatihetavaḥ

2.2

तद्वातरश्मिभिर् बद्धास् तैः सव्येतरपाणिभिः

tadvātaraśmibhir baddhās taiḥ savyetarapāṇibhiḥ

2.2.2

प्राक् पश्चाद् अपकृष्यन्ते यथासन्नं स्वदिङ्मुखम्

prāk paścād apakṛṣyante yathāsannaṃ svadiṅmukham

2.3

प्रवहाख्यो मरुत् तांस् तु स्वोच्चाभिमुखम् ईरयेत्

pravahākhyo marut tāṃs tu svoccābhimukham īrayet

2.3.2

पूर्वापराकृष्टास् ते गतिं यान्ति पृथग्विधाः

pūrvāparākṛṣṭās te gatiṃ yānti pṛthagvidhāḥ

2.4

ग्रहात् प्राग्भगणार्धस्थः प्राङ्मुखं कर्षति ग्रहम्

grahāt prāgbhagaṇārdhasthaḥ prāṅmukhaṃ karṣati graham

2.4.2

उच्चसंज्ञो ऽपरार्धस्थस् तद्वत् पश्चान्मुखं ग्रहम्

uccasaṃjño 'parārdhasthas tadvat paścānmukhaṃ graham

2.5

स्वोच्चापकृष्टा भगणैः प्राङ्मुखं यान्ति यद् ग्रहाः

svoccāpakṛṣṭā bhagaṇaiḥ prāṅmukhaṃ yānti yad grahāḥ

2.5.2

तत् तेषु धनम् इत्य् उक्तम् ऋणं पश्चान्मुखेषु च

tat teṣu dhanam ity uktam ṛṇaṃ paścānmukheṣu ca

2.6

दक्षिणोत्तरतो ऽप्य् एवं पातो राहुः स्वरंहसा

dakṣiṇottarato 'py evaṃ pāto rāhuḥ svaraṃhasā

2.6.2

विक्षिपत्य् एष विक्षेपं चन्द्रादीनाम् अपक्रमात्

vikṣipaty eṣa vikṣepaṃ candrādīnām apakramāt

2.7

उत्तराभिमुखं पातो विक्षिपत्य् अपरार्धगः

uttarābhimukhaṃ pāto vikṣipaty aparārdhagaḥ

2.7.2

ग्रहं प्राग्भगणार्धस्थो याम्यायाम् अपकर्षति

grahaṃ prāgbhagaṇārdhastho yāmyāyām apakarṣati

2.8

बुधभार्गवयोः शीघ्रात् तद्वत् पातो यदा स्थितः

budhabhārgavayoḥ śīghrāt tadvat pāto yadā sthitaḥ

2.8.2

तच्छीघ्राकर्षणात् तौ तु विक्षिप्येते यथोक्तवत्

tacchīghrākarṣaṇāt tau tu vikṣipyete yathoktavat

2.9

महत्त्वान् मण्डलस्यार्कः स्वल्पम् एवापकृष्यते

mahattvān maṇḍalasyārkaḥ svalpam evāpakṛṣyate

2.9.2

मण्डलाल्पतया चन्द्रस् ततो बह्व् अपकृष्यते

maṇḍalālpatayā candras tato bahv apakṛṣyate

2.10

भौमादयो ऽल्पमूर्तित्वाच् छीघ्रमन्दोच्चसंज्ञकैः

bhaumādayo 'lpamūrtitvāc chīghramandoccasaṃjñakaiḥ

2.10.2

दैवतैर् अपकृष्यन्ते सुदूरम् अतिवेगिताः

daivatair apakṛṣyante sudūram ativegitāḥ

Sūryasiddhānta