5.2.4

न संशयः इत्यनेन इदं ध्वनयति दीक्षादिना गुरुप्रत्ययतो मुक्तिः ईदृशात् तु ज्ञानात् समाचाराद्वा स्वप्रत्ययत एवेति

na saṃśayaḥ ityanena idaṃ dhvanayati dīkṣādinā gurupratyayato muktiḥ īdṛśāt tu jñānāt samācārādvā svapratyayata eveti

5.2.5

इयमेव महासमापत्तिः साधकाचार्यादीनाम् अभीष्टप्राप्तिहेतुः इति श्लोकद्वयेनाह

iyameva mahāsamāpattiḥ sādhakācāryādīnām abhīṣṭaprāptihetuḥ iti ślokadvayenāha

7.2.1

इह शिवो भूत्वा शिवं यजेत् इति यद् उद्घोष्यते तत्र ध्यायिनश् चेतसि संवेदने तस्येति न सावस्था न या शिवः इति प्रतिपादितशिवस्वभावस्य ध्येयस्य अन्यस्य वा कस्यचित् तत्तत्सिद्धिहेतोर् मन्त्रदेवताविशेषस्य अयम् एवोदयः प्रकटीभावः या साधकस्य ध्यातुराचार्यादेः

iha śivo bhūtvā śivaṃ yajet iti yad udghoṣyate tatra dhyāyinaś cetasi saṃvedane tasyeti na sāvasthā na yā śivaḥ iti pratipāditaśivasvabhāvasya dhyeyasya anyasya vā kasyacit tattatsiddhihetor mantradevatāviśeṣasya ayam evodayaḥ prakaṭībhāvaḥ yā sādhakasya dhyāturācāryādeḥ

7.2.1.2

तस्माच्छब्दार्थचिन्तासु न सावस्था न या शिवः

tasmācchabdārthacintāsu na sāvasthā na yā śivaḥ

7.2.2

इति प्रतिपादितरूपा तदात्मतासमापत्तिः शिवैक्यावेशो न तु पञ्चवक्त्रादेर्व्यतिरिक्तस्याकारस्य दर्शनं न तु निश्चयमात्रेण तदात्मतासमापत्तिः अपि तु इच्छतो ऽविकल्पविश्वाहंतात्मकशिवैक्यरूपेच्छापरामर्शाधिरूढस्य

iti pratipāditarūpā tadātmatāsamāpattiḥ śivaikyāveśo na tu pañcavaktrādervyatiriktasyākārasya darśanaṃ na tu niścayamātreṇa tadātmatāsamāpattiḥ api tu icchato 'vikalpaviśvāhaṃtātmakaśivaikyarūpecchāparāmarśādhirūḍhasya

7.2.3

एतद् उक्तं भवति अहमेव तत्संवेदनरूपेण तादात्म्यप्रतिपत्तितो विश्वशरीरश् चिदानन्दघनः शिव इति संकल्पो यस्याविकल्पशेषीभूतत्वेन फलति तस्य ध्येयमन्त्रदेवतादि किं न नाम अभिमुखीभवति सर्वस्यैतदद्वयप्रथालग्नत्वात्

etad uktaṃ bhavati ahameva tatsaṃvedanarūpeṇa tādātmyapratipattito viśvaśarīraś cidānandaghanaḥ śiva iti saṃkalpo yasyāvikalpaśeṣībhūtatvena phalati tasya dhyeyamantradevatādi kiṃ na nāma abhimukhībhavati sarvasyaitadadvayaprathālagnatvāt

7.2.4

यथोक्तमस्मत्परमेष्ठिपादैः

yathoktamasmatparameṣṭhipādaiḥ

7.2.4.2

साक्षाद्भवन्मये नाथ सर्वस्मिन् भुवनान्तरे

sākṣādbhavanmaye nātha sarvasmin bhuvanāntare

7.2.4.3

किं न भक्तिमतां क्षेत्रं मन्त्रः क्वैषां न सिध्यति

kiṃ na bhaktimatāṃ kṣetraṃ mantraḥ kvaiṣāṃ na sidhyati

7.2.5

इति

iti

7.2.6

इयमेव च समापत्तिः परमाद्वयरूपस्यामृतस्य प्राप्तिः अन्यस्मिंस् त्व् अमृते कतिपयकालशरीरदार्ढ्यदायिनि प्राप्तेऽपि साधकैर्मरणमवश्यमवाप्यत एवेत्य् एवकाराशयः

iyameva ca samāpattiḥ paramādvayarūpasyāmṛtasya prāptiḥ anyasmiṃs tv amṛte katipayakālaśarīradārḍhyadāyini prāpte'pi sādhakairmaraṇamavaśyamavāpyata evety evakārāśayaḥ

7.2.7

एवं सर्वत्रानेनैवाशयेन श्रीस्वच्छन्दे स्थूलदृष्ट्यामृतप्राप्तिप्रकरणे

evaṃ sarvatrānenaivāśayena śrīsvacchande sthūladṛṣṭyāmṛtaprāptiprakaraṇe

7.2.7.2

नैव चामृतयोगेन कालमृत्युजयो भवेत्

naiva cāmṛtayogena kālamṛtyujayo bhavet

7.2.8

इत्युक्त्योपसंहृत्य तात्त्विकस् तत्प्राप्तिप्रकारः

ityuktyopasaṃhṛtya tāttvikas tatprāptiprakāraḥ

7.2.8.2

अथवा परतत्त्वस्थः सर्वकालैर्न बाध्यते

athavā paratattvasthaḥ sarvakālairna bādhyate

7.2.9

इत्यादिना

ityādinā

7.2.10

सर्वं शिवशक्तिमयं स्मरेत्

sarvaṃ śivaśaktimayaṃ smaret

7.2.11

इति मध्येन

iti madhyena

7.2.11.2

जीवन्न् एव विमुक्तो ऽसौ यस्येयं भावना सदा

jīvann eva vimukto 'sau yasyeyaṃ bhāvanā sadā

7.2.11.3

यः शिवं भावयेन् नित्यं न कालः कलयेत्तु तम्

yaḥ śivaṃ bhāvayen nityaṃ na kālaḥ kalayettu tam

Spandakārikānirṇaya