1.12

नाभावो भाव्यतामेति न च तत्रास्त्य् अमूढता

nābhāvo bhāvyatāmeti na ca tatrāsty amūḍhatā

1.12.2

यतो ऽभियोगसंस्पर्शात् तदासीद् इति निश्चयः

yato 'bhiyogasaṃsparśāt tadāsīd iti niścayaḥ

1.13

अतस् तत् कृत्रिमं ज्ञेयं सौषुप्तपदवत् सदा

atas tat kṛtrimaṃ jñeyaṃ sauṣuptapadavat sadā

1.13.2

न त्व् एवं स्मर्यमाणत्वं तत् तत्त्वं प्रतिपद्यते

na tv evaṃ smaryamāṇatvaṃ tat tattvaṃ pratipadyate

1.14

अवस्थायुगलं चात्र कार्यकर्तृत्वशब्दितम्

avasthāyugalaṃ cātra kāryakartṛtvaśabditam

1.14.2

कार्यता क्षयिणी तत्र कर्तृत्वं पुनरक्षयम्

kāryatā kṣayiṇī tatra kartṛtvaṃ punarakṣayam

1.15

कार्योन्मुखः प्रयत्नो यः केवलं सो ऽत्र लुप्यते

kāryonmukhaḥ prayatno yaḥ kevalaṃ so 'tra lupyate

1.15.2

तस्मिंल् लुप्ते विलुप्तो ऽस्मीत्यबुधः प्रतिपद्यते

tasmiṃl lupte vilupto 'smītyabudhaḥ pratipadyate

1.16

न तु यो ऽन्तर्मुखो भावः सर्वज्ञत्वगुणास्पदम्

na tu yo 'ntarmukho bhāvaḥ sarvajñatvaguṇāspadam

1.16.2

तस्य लोपः कदाचित्स्याद् अन्यस्यानुपलम्भनात्

tasya lopaḥ kadācitsyād anyasyānupalambhanāt

1.17

तस्योपलब्धिः सततं त्रिपदाव्यभिचारिणी

tasyopalabdhiḥ satataṃ tripadāvyabhicāriṇī

1.17.2

नित्यं स्यात् सुप्रबुद्धस्य तदाद्यन्ते परस्य तु

nityaṃ syāt suprabuddhasya tadādyante parasya tu

1.18

ज्ञानज्ञेयस्वरूपिण्या शक्त्या परमया युतः

jñānajñeyasvarūpiṇyā śaktyā paramayā yutaḥ

1.18.2

पदद्वये विभुर्भाति तदन्यत्र तु चिन्मयः

padadvaye vibhurbhāti tadanyatra tu cinmayaḥ

1.19

गुणादिस्पन्दनिःष्यन्दाः सामान्यस्पन्दसंश्रयात्

guṇādispandaniḥṣyandāḥ sāmānyaspandasaṃśrayāt

1.19.2

लब्धात्मलाभाः सततं स्युर् ज्ञस्यापरिपन्थिनः

labdhātmalābhāḥ satataṃ syur jñasyāparipanthinaḥ

1.20

अप्रबुद्धधियस् त्व् एते स्वस्थितिस्थगनोद्यताः

aprabuddhadhiyas tv ete svasthitisthaganodyatāḥ

1.20.2

पातयन्ति दुरुत्तारे घोरे संसारवर्त्मनि

pātayanti duruttāre ghore saṃsāravartmani

1.21

अतः सततम् उद्युक्तः स्पन्दतत्त्वविविक्तये

ataḥ satatam udyuktaḥ spandatattvaviviktaye

1.21.2

जाग्रदेव निजं भावम् अचिरेणाधिगच्छति

jāgradeva nijaṃ bhāvam acireṇādhigacchati

Spandakārikā