15.2

नासाग्रे वा ललाटे वा भ्रुवोरन्तर एव वा

nāsāgre vā lalāṭe vā bhruvorantara eva vā

15.2.2

कुर्वीथाश्चपलं चित्तमालम्बनपरायणम्

kurvīthāścapalaṃ cittamālambanaparāyaṇam

15.3

सचेत् कामवितर्कस्त्वां धर्षयेन्मानसो ज्वरः

sacet kāmavitarkastvāṃ dharṣayenmānaso jvaraḥ

15.3.2

क्षेप्तव्यो नाधिवास्यः स वस्त्रे रेणुरिवागतः

kṣeptavyo nādhivāsyaḥ sa vastre reṇurivāgataḥ

15.4

यद्यपि प्रतिसंख्यानात् कामानुत्सृष्टवानसि

yadyapi pratisaṃkhyānāt kāmānutsṛṣṭavānasi

15.4.2

तमांसीव प्रकाशेन प्रतिपक्षेण ताञ्जहि

tamāṃsīva prakāśena pratipakṣeṇa tāñjahi

15.5

तिष्ठत्यनुशयस्तेषां छन्नो ऽग्निरिव भस्मना

tiṣṭhatyanuśayasteṣāṃ channo 'gniriva bhasmanā

15.5.2

स ते भावनया सौम्य प्रशाम्यो ऽग्निरिवाम्बुना

sa te bhāvanayā saumya praśāmyo 'gnirivāmbunā

15.6

ते हि तस्मात् प्रवर्तन्ते भूयो बीजादिवाङ्कुराः

te hi tasmāt pravartante bhūyo bījādivāṅkurāḥ

15.6.2

तस्य नाशेन ते न स्युर्बीजनाशादिवाङ्कुराः

tasya nāśena te na syurbījanāśādivāṅkurāḥ

15.7

अर्जनादीनि कामेभ्यो दृष्ट्वा दुःखानि कामिनाम्

arjanādīni kāmebhyo dṛṣṭvā duḥkhāni kāminām

15.7.2

तस्मात्तान्मूलतश्छिन्द्धि मित्रसंज्ञानरीनिव

tasmāttānmūlataśchinddhi mitrasaṃjñānarīniva

15.8

अनित्या मोषधर्माणो रिक्ता व्यसनहेतवः

anityā moṣadharmāṇo riktā vyasanahetavaḥ

15.8.2

बहुसाधारणाः कामा बर्ह्या ह्याशीविषा

bahusādhāraṇāḥ kāmā barhyā hyāśīviṣā

15.9

ये मृग्यमाणा दुःखाय रक्ष्यमाणा न शान्तये

ye mṛgyamāṇā duḥkhāya rakṣyamāṇā na śāntaye

15.9.2

भ्रष्टाः शोकाय महते प्राप्ताश्च न वितृप्तये

bhraṣṭāḥ śokāya mahate prāptāśca na vitṛptaye

15.10

तृप्तिं वित्तप्रकर्षेण स्वर्गावाप्त्या कृतार्थताम्

tṛptiṃ vittaprakarṣeṇa svargāvāptyā kṛtārthatām

15.10.2

कामेभ्यश्च सुखोत्पत्तिं यः पश्यति स नश्यति

kāmebhyaśca sukhotpattiṃ yaḥ paśyati sa naśyati

15.11

चलान् अपरिनिष्पन्नान् असारान् अनवस्थितान्

calān apariniṣpannān asārān anavasthitān

15.11.2

परिकल्पसुखान् कामान्न तान्स्मर्तुमिहार्हसि

parikalpasukhān kāmānna tānsmartumihārhasi

Saundarānanda