8.2

किमिदं मुखमश्रुदुर्दिनं हृदयस्थं विवृणोति ते तमः

kimidaṃ mukhamaśrudurdinaṃ hṛdayasthaṃ vivṛṇoti te tamaḥ

8.2.2

धृतिमेहि नियच्छ विक्रियां न हि बाष्पश्च शमश्च शोभते

dhṛtimehi niyaccha vikriyāṃ na hi bāṣpaśca śamaśca śobhate

8.3

द्विविधा समुदेति वेदना नियतं चेतसि देह एव च

dvividhā samudeti vedanā niyataṃ cetasi deha eva ca

8.3.2

श्रुतविध्युपचारकोविदा द्विविधा एव तयोश्चिकित्सकाः

śrutavidhyupacārakovidā dvividhā eva tayościkitsakāḥ

8.4

तदियं यदि कायिकी रुजा भिषजे तूर्णमनूनमुच्यताम्

tadiyaṃ yadi kāyikī rujā bhiṣaje tūrṇamanūnamucyatām

8.4.2

विनिगुह्य हि रोगमातुरो नचिरात्तीव्रमनर्थमृच्छति

viniguhya hi rogamāturo nacirāttīvramanarthamṛcchati

8.5

अथ दुःखमिदं मनोमयं वद वक्ष्यामि यदत्र भेषजम्

atha duḥkhamidaṃ manomayaṃ vada vakṣyāmi yadatra bheṣajam

8.5.2

मनसो हि रजस्तमस्विनो भिषजो ऽध्यात्मविदः परीक्षकाः

manaso hi rajastamasvino bhiṣajo 'dhyātmavidaḥ parīkṣakāḥ

8.6

निखिलेन च सत्यमुच्यतां यदि वाच्यं मयि सौम्य मन्यसे

nikhilena ca satyamucyatāṃ yadi vācyaṃ mayi saumya manyase

8.6.2

गतयो विविधा हि चेतसां बहुगुह्यानि महाकुलानि च

gatayo vividhā hi cetasāṃ bahuguhyāni mahākulāni ca

8.7

इति तेन स चोदितस्तदा व्यवसायं प्रविवक्षुर् आत्मनः

iti tena sa coditastadā vyavasāyaṃ pravivakṣur ātmanaḥ

8.7.2

अवलम्ब्य करे करेण तं प्रविवेशान्यतरद् वनान्तरम्

avalambya kare kareṇa taṃ praviveśānyatarad vanāntaram

8.8

अथ तत्र शुचौ लतागृहे कुसुमोद्गारिणि तौ निषेदतुः

atha tatra śucau latāgṛhe kusumodgāriṇi tau niṣedatuḥ

8.8.2

मृदुभिर्मृदुमारुतेरितैरुपगूढाविव बालपल्लवैः

mṛdubhirmṛdumāruteritairupagūḍhāviva bālapallavaiḥ

8.9

स जगाद ततश्चिकीर्षितं घननिश्वासगृहीतमन्तरा

sa jagāda tataścikīrṣitaṃ ghananiśvāsagṛhītamantarā

8.9.2

श्रुतवाग्विशदाय भिक्षवे विदुषा प्रव्रजितेन दुर्वचम्

śrutavāgviśadāya bhikṣave viduṣā pravrajitena durvacam

8.10

सदृशं यदि धर्मचारिणः सततं प्राणिषु मैत्रचेतसः

sadṛśaṃ yadi dharmacāriṇaḥ satataṃ prāṇiṣu maitracetasaḥ

8.10.2

अधृतौ यदि हितैषिता मयि ते स्यात् करुणात्मनः सतः

adhṛtau yadi hitaiṣitā mayi te syāt karuṇātmanaḥ sataḥ

8.11

अत एव च मे विशेषतः प्रविवक्षा क्षमवादिनि त्वयि

ata eva ca me viśeṣataḥ pravivakṣā kṣamavādini tvayi

8.11.2

न हि भावमिमं चलात्मने कथयेयं ब्रुवते ऽप्यसाधवे

na hi bhāvamimaṃ calātmane kathayeyaṃ bruvate 'pyasādhave

Saundarānanda