7.34

निशाम्य शान्तां नरदेवकन्यां वने ऽपि शान्ते ऽपि च वर्तमानः

niśāmya śāntāṃ naradevakanyāṃ vane 'pi śānte 'pi ca vartamānaḥ

7.34.2

चचाल धैर्यान्मुनिर् ऋष्यशृङ्गः शैलो महीकम्प इवोच्चशृङ्गः

cacāla dhairyānmunir ṛṣyaśṛṅgaḥ śailo mahīkampa ivoccaśṛṅgaḥ

7.35

ब्रह्मर्षिभावार्थम् अपास्य राज्यं भेजे वनं यो विषयेष्वनास्थः

brahmarṣibhāvārtham apāsya rājyaṃ bheje vanaṃ yo viṣayeṣvanāsthaḥ

7.35.2

स गाधिजश्चापहृतो घृताच्या समा दशैकं दिवसं विवेद

sa gādhijaścāpahṛto ghṛtācyā samā daśaikaṃ divasaṃ viveda

7.36

तथैव कन्दर्पशराभिमृष्टो रम्भां प्रति स्थूलशिरा मुमूर्छ

tathaiva kandarpaśarābhimṛṣṭo rambhāṃ prati sthūlaśirā mumūrcha

7.36.2

यः कामरोषात्मतयानपेक्षः शशाप ताम् अप्रतिगृह्यमाणः

yaḥ kāmaroṣātmatayānapekṣaḥ śaśāpa tām apratigṛhyamāṇaḥ

7.37

प्रमद्वरायां च रुरुः प्रियायां भुजङ्गमेनापहृतेन्द्रियायाम्

pramadvarāyāṃ ca ruruḥ priyāyāṃ bhujaṅgamenāpahṛtendriyāyām

7.37.2

संदृश्य संदृश्य जघान सर्पान् प्रियं न रोषेण तपो ररक्ष

saṃdṛśya saṃdṛśya jaghāna sarpān priyaṃ na roṣeṇa tapo rarakṣa

7.38

नप्ता शशाङ्कस्य यशोगुणाङ्को बुधस्य सूनुर्विबुधप्रभावः

naptā śaśāṅkasya yaśoguṇāṅko budhasya sūnurvibudhaprabhāvaḥ

7.38.2

तथोर्वशीमप्सरसं विचिन्त्य राजर्षिरुन्मादम् अगच्छद् ऐडः

tathorvaśīmapsarasaṃ vicintya rājarṣirunmādam agacchad aiḍaḥ

7.39

रक्तो गिरेर्मूर्धनि मेनकायां कामात्मकत्वाच्च स तालजङ्घः

rakto girermūrdhani menakāyāṃ kāmātmakatvācca sa tālajaṅghaḥ

7.39.2

पादेन विश्वावसुना सरोषं वज्रेण हिन्ताल इवाभिजघ्ने

pādena viśvāvasunā saroṣaṃ vajreṇa hintāla ivābhijaghne

7.40

नाशं गतायां परमाङ्गनायां गंगाजले ऽनङ्गपरीतचेताः

nāśaṃ gatāyāṃ paramāṅganāyāṃ gaṃgājale 'naṅgaparītacetāḥ

7.40.2

जह्नुश्च गङ्गां नृपतिर्भुजाभ्यां रुरोध मैनाक इवाचलेन्द्रः

jahnuśca gaṅgāṃ nṛpatirbhujābhyāṃ rurodha maināka ivācalendraḥ

7.41

नृपश्च गङ्गाविरहाज्जुघूर्ण गङ्गाम्भसा साल इवात्तमूलः

nṛpaśca gaṅgāvirahājjughūrṇa gaṅgāmbhasā sāla ivāttamūlaḥ

7.41.2

कुलप्रदीपः प्रतिपस्य सूनुः श्रीमत्तनुः शन्तनुरस्वतन्त्रः

kulapradīpaḥ pratipasya sūnuḥ śrīmattanuḥ śantanurasvatantraḥ

7.42

हृतां च सौनन्दकिनानुशोचन् प्राप्तामिवोर्वीं स्त्रियमुर्वशीं ताम्

hṛtāṃ ca saunandakinānuśocan prāptāmivorvīṃ striyamurvaśīṃ tām

7.42.2

सद्वृत्तवर्मा किल सोमवर्मा बभ्राम चितोद्भवभिन्नवर्मा

sadvṛttavarmā kila somavarmā babhrāma citodbhavabhinnavarmā

7.43

भार्यां मृतां चानुममार राजा भीमप्रभावो भुवि भीमकः सः

bhāryāṃ mṛtāṃ cānumamāra rājā bhīmaprabhāvo bhuvi bhīmakaḥ saḥ

7.43.2

बलेन सेनाक इति प्रकाशः सेनापतिर्देव इवात्तसेनः

balena senāka iti prakāśaḥ senāpatirdeva ivāttasenaḥ

Saundarānanda