7.24

भावेन गर्वेण गतेन लक्ष्म्या स्मितेन कोपेन मदेन वाग्भिः

bhāvena garveṇa gatena lakṣmyā smitena kopena madena vāgbhiḥ

7.24.2

जह्रुः स्त्रियो देवनृपर्षिसंघान् कस्माद्धि नास्मद्विधमाक्षिपेयुः

jahruḥ striyo devanṛparṣisaṃghān kasmāddhi nāsmadvidhamākṣipeyuḥ

7.25

कामाभिभूतो हि हिरण्यरेताः स्वाहां सिषेवे मघवानहल्याम्

kāmābhibhūto hi hiraṇyaretāḥ svāhāṃ siṣeve maghavānahalyām

7.25.2

सत्त्वेन सर्गेण च तेन हीनः स्त्रीनिर्जितः किं बत मानुषो ऽहम्

sattvena sargeṇa ca tena hīnaḥ strīnirjitaḥ kiṃ bata mānuṣo 'ham

7.26

सूर्यः सरण्यूं प्रति जातरागस्तत्प्रीतये तष्ट इति श्रुतं नः

sūryaḥ saraṇyūṃ prati jātarāgastatprītaye taṣṭa iti śrutaṃ naḥ

7.26.2

यामश्वभूतो ऽश्ववधूं समेत्य यतो ऽश्विनौ तौ जनयांबभूव

yāmaśvabhūto 'śvavadhūṃ sametya yato 'śvinau tau janayāṃbabhūva

7.27

स्त्रीकारणं वैरविषक्तबुद्ध्योर् वैवस्वताग्न्योश्चलितात्मधृत्योः

strīkāraṇaṃ vairaviṣaktabuddhyor vaivasvatāgnyoścalitātmadhṛtyoḥ

7.27.2

बहूनि वर्षाणि बभूव युद्धं कः स्त्रीनिमित्तं न चलेदिहान्यः

bahūni varṣāṇi babhūva yuddhaṃ kaḥ strīnimittaṃ na caledihānyaḥ

7.28

भेजे श्वपाकीं मुनिरक्षमालां कामाद्वसिष्ठश्च स सद्वरिष्ठः

bheje śvapākīṃ munirakṣamālāṃ kāmādvasiṣṭhaśca sa sadvariṣṭhaḥ

7.28.2

यस्यां विवस्वानिव भूजलादः सुतः प्रसूतो ऽस्य कपिञ्जलादः

yasyāṃ vivasvāniva bhūjalādaḥ sutaḥ prasūto 'sya kapiñjalādaḥ

7.29

पराशरः शापशरस्तथर्षिः कालीं सिषेवे झषगर्भयोनिम्

parāśaraḥ śāpaśarastatharṣiḥ kālīṃ siṣeve jhaṣagarbhayonim

7.29.2

सुतो ऽस्य यस्यां सुषुवे महात्मा द्वैपायनो वेदविभागकर्ता

suto 'sya yasyāṃ suṣuve mahātmā dvaipāyano vedavibhāgakartā

7.30

द्वैपायनो धर्मपरायणश्च रेमे समं काशिषु वेश्यवध्वा

dvaipāyano dharmaparāyaṇaśca reme samaṃ kāśiṣu veśyavadhvā

7.30.2

यया हतो ऽभूच्चलनूपुरेण पादेन विद्युल्लतयेव मेघः

yayā hato 'bhūccalanūpureṇa pādena vidyullatayeva meghaḥ

7.31

तथाङ्गिरा रागपरीतचेताः सरस्वतीं ब्रह्मसुतः सिषेवे

tathāṅgirā rāgaparītacetāḥ sarasvatīṃ brahmasutaḥ siṣeve

7.31.2

सारस्वतो यत्र सुतो ऽस्य जज्ञे नष्टस्य वेदस्य पुनःप्रवक्ता

sārasvato yatra suto 'sya jajñe naṣṭasya vedasya punaḥpravaktā

7.32

तथा नृपर्षेर्दिलीपस्य यज्ञे स्वर्गस्त्रियां काश्यप आगतास्थः

tathā nṛparṣerdilīpasya yajñe svargastriyāṃ kāśyapa āgatāsthaḥ

7.32.2

स्रुचं गृहीत्वा स्रवदात्मतेजश्चिक्षेप वह्नावसितो यतो ऽभूत्

srucaṃ gṛhītvā sravadātmatejaścikṣepa vahnāvasito yato 'bhūt

7.33

तथाङ्गदो ऽन्तं तपसो ऽपि गत्वा कामाभिभूतो यमुनामगच्छत्

tathāṅgado 'ntaṃ tapaso 'pi gatvā kāmābhibhūto yamunāmagacchat

7.33.2

धीमत्तरं यत्र रथीतरं स सारङ्गजुष्टं जनयांबभूव

dhīmattaraṃ yatra rathītaraṃ sa sāraṅgajuṣṭaṃ janayāṃbabhūva

Saundarānanda