7.14

तावद् दृढं बन्धनमस्ति लोके न दारवं तान्तवमायसं वा

tāvad dṛḍhaṃ bandhanamasti loke na dāravaṃ tāntavamāyasaṃ vā

7.14.2

यावद् दृढं बन्धनमेतदेव मुखं चलाक्षं ललितं च वाक्यम्

yāvad dṛḍhaṃ bandhanametadeva mukhaṃ calākṣaṃ lalitaṃ ca vākyam

7.15

छित्त्वा च भित्त्वा च हि यान्ति तानि स्वपौरुषाच्चैव सुहृद्बलाच्च

chittvā ca bhittvā ca hi yānti tāni svapauruṣāccaiva suhṛdbalācca

7.15.2

ज्ञानाच्च रौक्ष्याच्च विना विमोक्तुं न शक्यते स्नेहमयस्तु पाशः

jñānācca raukṣyācca vinā vimoktuṃ na śakyate snehamayastu pāśaḥ

7.16

ज्ञानं न मे तच्च शमाय यत् स्यान्न न चास्ति रौक्ष्यं करुणात्मको ऽस्मि

jñānaṃ na me tacca śamāya yat syānna na cāsti raukṣyaṃ karuṇātmako 'smi

7.16.2

कामात्मकश्चास्मि गुरुश्च बुद्धः स्थितो ऽन्तरे चक्रगतेरिवास्मि

kāmātmakaścāsmi guruśca buddhaḥ sthito 'ntare cakragaterivāsmi

7.17

अहं गृहीत्वापि हि भिक्षुलिङ्गं भ्रातॄषिणा द्विर् गुरुणानुशिष्टः

ahaṃ gṛhītvāpi hi bhikṣuliṅgaṃ bhrātṝṣiṇā dvir guruṇānuśiṣṭaḥ

7.17.2

सर्वास्ववस्थासु लभे न शान्तिं प्रियावियोगादिव चक्रवाकः

sarvāsvavasthāsu labhe na śāntiṃ priyāviyogādiva cakravākaḥ

7.18

अद्यापि तन्मे हृदि वर्तते च यद्दर्पणे व्याकुलिते मया सा

adyāpi tanme hṛdi vartate ca yaddarpaṇe vyākulite mayā sā

7.18.2

कृतानृतक्रोधकम् अब्रवीन्मां कथं कृतो ऽसीति शठं हसन्ती

kṛtānṛtakrodhakam abravīnmāṃ kathaṃ kṛto 'sīti śaṭhaṃ hasantī

7.19

यथैष्यनाश्यानविशेषकायां मयीति यन्मामवदच्च साश्रु

yathaiṣyanāśyānaviśeṣakāyāṃ mayīti yanmāmavadacca sāśru

7.19.2

पारिप्लवाक्षेण मुखेन बाला तन्मे वचो ऽद्यापि मनो रुणद्धि

pāriplavākṣeṇa mukhena bālā tanme vaco 'dyāpi mano ruṇaddhi

7.20

बुद्ध्वासनं पर्वतनिर्झरस्थः स्वस्थो यथा ध्यायति भिक्षुरेषः

buddhvāsanaṃ parvatanirjharasthaḥ svastho yathā dhyāyati bhikṣureṣaḥ

7.20.2

सक्तः क्वचिन्नाहमिवैष नूनं शान्तस्तथा तृप्त इवोपविष्टः

saktaḥ kvacinnāhamivaiṣa nūnaṃ śāntastathā tṛpta ivopaviṣṭaḥ

7.21

पुंस्कोकिलानाम् अविचिन्त्य घोषं वसन्तलक्ष्म्याम् अविचार्य चक्षुः

puṃskokilānām avicintya ghoṣaṃ vasantalakṣmyām avicārya cakṣuḥ

7.21.2

शास्त्रं यथाभ्यस्यति चैष युक्तः शङ्के प्रियाकर्षति नास्य चेतः

śāstraṃ yathābhyasyati caiṣa yuktaḥ śaṅke priyākarṣati nāsya cetaḥ

7.22

अस्मै नमो ऽस्तु स्थिरनिश्चयाय निवृत्तकौतूहलविस्मयाय

asmai namo 'stu sthiraniścayāya nivṛttakautūhalavismayāya

7.22.2

शान्तात्मने ऽन्तर्गतमानसाय चङ्क्रम्यमाणाय निरुत्सुकाय

śāntātmane 'ntargatamānasāya caṅkramyamāṇāya nirutsukāya

7.23

निरीक्षमाणस्य जलं सपद्मं वनं च फुल्लं परपुष्टजुष्टम्

nirīkṣamāṇasya jalaṃ sapadmaṃ vanaṃ ca phullaṃ parapuṣṭajuṣṭam

7.23.2

कस्यास्ति धैर्यं नवयौवनस्य मासे मधौ धर्मसपत्नभूते

kasyāsti dhairyaṃ navayauvanasya māse madhau dharmasapatnabhūte

Saundarānanda