6.43

अथ त्विदानीं लडितः सुखेन स्वस्थः फलस्थो व्यसनान्यदृष्ट्वा

atha tvidānīṃ laḍitaḥ sukhena svasthaḥ phalastho vyasanānyadṛṣṭvā

6.43.2

वीतस्पृहो धर्ममनुप्रपन्नः किं विक्लवा रोदिषि हर्षकाले

vītaspṛho dharmamanuprapannaḥ kiṃ viklavā rodiṣi harṣakāle

6.44

इत्येवमुक्तापि बहुप्रकारं स्नेहात्तया नैव धृतिं चकार

ityevamuktāpi bahuprakāraṃ snehāttayā naiva dhṛtiṃ cakāra

6.44.2

अथापरा तां मनसो ऽनुकूलं कालोपपन्नं प्रणयादुवाच

athāparā tāṃ manaso 'nukūlaṃ kālopapannaṃ praṇayāduvāca

6.45

ब्रवीमि सत्यं सुविनिश्चितं मे प्राप्तं प्रियं द्रक्ष्यसि शीघ्रमेव

bravīmi satyaṃ suviniścitaṃ me prāptaṃ priyaṃ drakṣyasi śīghrameva

6.45.2

त्वया विना स्थास्यति तत्र नासौ सत्त्वाश्रयश्चेतनयेव हीनः

tvayā vinā sthāsyati tatra nāsau sattvāśrayaścetanayeva hīnaḥ

6.46

अङ्के ऽपि लक्ष्म्या न स निर्वृतः स्यात् त्वं तस्य पार्श्वे यदि तत्र न स्याः

aṅke 'pi lakṣmyā na sa nirvṛtaḥ syāt tvaṃ tasya pārśve yadi tatra na syāḥ

6.46.2

आपत्सु कृच्छ्रास्वपि चागतासु त्वां पश्यतस्तस्य भवेन्न दुःखम्

āpatsu kṛcchrāsvapi cāgatāsu tvāṃ paśyatastasya bhavenna duḥkham

6.47

त्वं निर्वृतिं गच्छ नियच्छ बाष्पं तप्ताश्रुमोक्षात् परिरक्ष चक्षुः

tvaṃ nirvṛtiṃ gaccha niyaccha bāṣpaṃ taptāśrumokṣāt parirakṣa cakṣuḥ

6.47.2

यस्तस्य भावस्त्वयि यश्च रागो न रंस्यते त्वद्विरहात् स धर्मे

yastasya bhāvastvayi yaśca rāgo na raṃsyate tvadvirahāt sa dharme

6.48

स्यादत्र नासौ कुलसत्त्वयोगात् काषायमादाय विहास्यतीति

syādatra nāsau kulasattvayogāt kāṣāyamādāya vihāsyatīti

6.48.2

अनात्मनादाय गृहोन्मुखस्य पुनर्विमोक्तुं क इवास्ति दोषः

anātmanādāya gṛhonmukhasya punarvimoktuṃ ka ivāsti doṣaḥ

6.49

इति युवतिजनेन सान्त्व्यमाना हृतहृदया रमणेन सुन्दरी सा

iti yuvatijanena sāntvyamānā hṛtahṛdayā ramaṇena sundarī sā

6.49.2

द्रमिडमभिमुखी पुरेव रम्भा क्षितिमगमत् परिवारिताप्सरोभिः

dramiḍamabhimukhī pureva rambhā kṣitimagamat parivāritāpsarobhiḥ

7.1

लिङ्गं ततः शास्तृविधिप्रदिष्टं गात्रेण बिभ्रन्न तु चेतसा तत्

liṅgaṃ tataḥ śāstṛvidhipradiṣṭaṃ gātreṇa bibhranna tu cetasā tat

7.1.2

भार्यागतैरेव मनोवितर्कैर् जेह्रीयमाणो न ननन्द

bhāryāgataireva manovitarkair jehrīyamāṇo na nananda

7.2

स पुष्पमासस्य च पुष्पलक्ष्म्या सर्वाभिसारेण च पुष्पकेतोः

sa puṣpamāsasya ca puṣpalakṣmyā sarvābhisāreṇa ca puṣpaketoḥ

7.2.2

यानीयभावेन च यौवनस्य विहारसंस्थो न शमं जगाम

yānīyabhāvena ca yauvanasya vihārasaṃstho na śamaṃ jagāma

7.3

स्थितः सः दीनः सहकारवीथ्याम् आलीनसंमूर्छितषट्पदायाम्

sthitaḥ saḥ dīnaḥ sahakāravīthyām ālīnasaṃmūrchitaṣaṭpadāyām

7.3.2

भृशं जजृम्भे युगदीर्घबाहुर्ध्यात्वा प्रियां चापमिवाचकर्ष

bhṛśaṃ jajṛmbhe yugadīrghabāhurdhyātvā priyāṃ cāpamivācakarṣa

Saundarānanda